ប៉ៃលិន ៖ ស្ត្រីម្នាក់ដែលគេស្គាល់ថា ជាប្រពន្ធថៅកែកាស៊ីណូម្គុដពេជ្រ បានបញ្ជាឲ្យសន្តិសុខរបស់ ខ្លួនចាប់អ្នកយកព័ត៌មាន ខណៈពេលអ្នកយកព័ត៌មានទាំងនោះចុះទៅផ្ដិតយករូបភាព ពួកបុគ្គលិកកាស៊ីណូហ្កាទ្បាក់ស៊ីហ្គោលហូថែល (Galaxy Gold Hotel) លើកគ្នាតវ៉ានៅមុខកាស៊ីណូ ក្នុងរឿងកាត់ប្រាក់ខែរបស់បុគ្គលិក។ ហេតុការណ៍នេះ បានកើតឡើងកាលពីវេលាម៉ោង៩យប់ថ្ងៃទី២ ខែមករា ឆ្នាំ២០១៦ កន្លងទៅ ស្ថិតនៅជាប់ផ្លូវជាតិលេខ៥៧ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
តាមប្រភពព័ត៌មានពីបុគ្គលិកកាស៊ីណូហ្កាឡាកស៊ីហ្កោហូថែល ដែលនាំគ្នាតវ៉ាបានឲ្យកម្ពុជាថ្មីដឹងថា ពួកគាត់នាំគ្នាតវ៉ានេះគឺចងឲ្យម្ចាស់កាស៊ីណូហ្កាឡាក់ស៊ីហ្កោហូថែល គោរពនូវលក្ខខណ្ឌការងារ និងគោលការណ៍ច្បាប់ បើកប្រាក់ខែឲ្យពួកគេ ដោយមិនត្រូវកាត់ប្រាក់ខែដូច្នោះទេ។ ប្រភពព័ត៌មានបន្តថា នៅក្នុងកិច្ចសន្យាការងារ គឺពួកគេបានទទួលប្រាក់បៀវត្សរ៎៍៨ពាន់បាត (ប្រាក់ថៃ) ដោយធ្វើការរយៈពេល៨ម៉ោង តែក្រោយមកបែរជាថៅកែបញ្ចុះតម្លៃមកត្រឹម៧ពាន់បាត។
ប្រភពព័ត៌មានបន្តឲ្យដឹងថា ក្រោយមកដោយចង់ដឹងថា ចំនួនប្រាក់ខែពួកគេ បាននាំគ្នាទៅមើលក្ដារព័ត៌មាន ដែលរដ្ឋបាលបិទផ្សាយនៅមុខកាស៊ីណូ ស្រាប់តែគេសរសេរត្រឹមតែ៥ពាន់បាតប៉ុណ្ណោះក្នុង១ខែ ហើយពួកគេត្រូវធ្វើការរហូតដល់១០ម៉ោងក្នុង១ថ្ងៃ ដោយឃើញដូច្នោះទើបកើតទុក្ខមិនសុខចិត្ត ក៏លើកគ្នាតវ៉ាតែម្តង។ ប្រភពព័ត៌មានបានឲ្យដឹងទៀតថា ក្នុងហេតុការណ៍បុគ្គលិកផ្ទុះការតវ៉ានេះ មានភ្នាក់ងារយកព័ត៌មានឲ្យកាសែត និងទូរទស្សន៍ ជាច្រើននាក់ ចុះទៅយកព័ត៌មាន ស្រាប់តែមានថៅកែស្រីម្នាក់ ដែលគេស្គាល់ថា ជាប្រពន្ធថៅកែកាស៊ីណូម្គុដពេជ្រ បានបញ្ជាឲ្យសន្តិសុខកាស៊ីណូ ដែលស្ថិតក្នុងស្ថានភាពស្រវឹងផង ចេញមករករឿងចាប់ក្របួចកអាវបញ្ជាឲ្យអ្នកយកព័ត៌មានលុបរូបភាពចេញ ដើម្បីបំបិទភស្តុតាង ព្រមទាំងគំរាមពួកអ្នកយកព័ត៌មានទាំងនោះផងដែរ។
តាមប្រភពព័ត៌មានពីភ្នាក់ងារយកព័ត៌មានខាងលើបានឲ្យដឹងថា នៅពេលពួកគេឃើញក្រុមបុគ្គលិកកាស៊ីណូនាំគ្នាតវ៉ានៅមុខកាស៊ីណូបែបនេះ ទើបទៅឈរថតនៅក្បែរចិញ្ចើមផ្លូវសាធារណៈ ដោយមិនបានចូលទៅថតនៅក្នុងកាស៊ីណូទ្បើយ។ ស្របពេលកើតហេតុនោះ ក្រុមអ្នកយកព័ត៌មានបានទាក់ទងទៅលោកស្នងការនគរបាលខេត្តប៉ៃលិន ជាច្រើនលើកច្រើនសា ដើម្បីឲ្យជួយអន្តរាគមន៍ តែអត់មានអ្នកលើកទូរស័ព្ទ ហើយគ្មានសមត្ថកិច្ចណាម្នាក់ហ៊ានចេញមុខឡើយ។ ក្រោយមកទើបពួកគេទាក់ទងទៅលោកអភិបាលខេត្ត ដើម្បីឲ្យជួយអន្តរាគមន៍។ ក្រោយពីកើតហេតុទើបគេឃើញសមត្ថកិច្ចចេញទៅអើតមើលបន្តិច ក៏នាំគ្នាត្រឡប់ទៅផ្ទះវិញយ៉ាងស្ងៀមស្ងាត់។
ទាក់ទងនឹងបញ្ហាខាងលើ អ្នកព័ត៌មានកម្ពុជាថ្មី មិនអាចទំនាក់ទំនងតាមទូរស័ព្ទទៅ លោក ឈិន សុភ័ណ នាយករដ្ឋបាលកាស៊ីណូហ្កាឡាក់ស៊ីហ្កោហូថែល បានទេនៅព្រឹកថ្ងៃទី៤ ខែមករា ឆ្នាំ២០១៦ ដោយទូរស័ព្ទមិនចូល៕
មិនចង់លេចឮព័ត៌មាន បញ្ជាសន្តិសុខឲ្យចាប់អ្នកកាសែត ដើម្បីយកភស្តុតាងបំផ្លាញចោល
0 Comments