ភ្នំពេញ ៖ នេះបើយោងតាមលិខិតរបស់លោក អេង ឆៃអ៊ាង ដែលបានផ្ញើជូន លោក សឺន ស៊ូបែរ្តិ៍ ប្រធានគណៈកម្មាធិការអចិន្ត្រៃយ៍ មូលនិធិសម្ដេចបវរសេដ្ឋាធិបតីសឺន សាន កាលពីថ្ងៃទី០៣ ខែមករា ឆ្នាំ២០១៦។
លិខិតរបស់លោក អេង ឆៃអ៊ាង បានបញ្ជាក់ថា លោកបានអានយ៉ាងយកចិត្តទុកដាក់នូវសេចក្តី ថ្លែងការណ៍របស់លោក សឺន ស៊ូបែរ្តិ៍ ចុះថ្ងៃទី៣០ ខែធ្នូ ឆ្នាំ ២០១៥ ពាក់ព័ន្ធនឹងការថ្លែងរបស់លោក កាលពីពេលថ្មីៗនេះ ទាក់ទងនឹងលោកឧកញ៉ាចៅហ្វាយសឺនគុយ។ លោកបញ្ជាក់ថា “ការថ្លែងរបស់ខ្ញុំដែលមានទាក់ទងជាមួយលោកឧកញ៉ាចៅហ្វាយសឺន គុយនៅទីក្រុង MONTREAL ប្រទេសកាណាដា និងនៅកន្លែងផ្សេងៗទៀត ក្នុងពេលថ្មីៗនេះ គឺជាទស្សនៈយល់ឃើញរបស់ខ្ញុំ ហើយខ្ញុំពុំមានចេតនាបន្តុះបង្អាប់ ឬប្រមាថមើលងាយចំពោះគំរូវីរភាពដ៏អង់អាចក្លាហានរបស់លោកឧកញ៉ាចៅហ្វាយសឺន គុយឡើយ។ ប៉ុន្តែប្រសិនបើឯកឧត្តម ឬបងប្អូនខ្មែរកម្ពុជាក្រោមរូបណាយល់ឃើញថា ការថ្លែង របស់ខ្ញុំមិនសមរម្យ ឬមិនត្រឹមត្រូវ ខ្ញុំសូមអធ្យាស្រ័យ និងអភ័យទោសចំពោះឯកឧត្តម និងបងប្អូនខ្មែរកម្ពុជា ក្រោមរូបនោះ។
ជាមួយគ្នានោះលោក អេង ឆៃអ៊ាង បានបញ្ជាក់ថា “រូបខ្ញុំក៏ដូចជាប្រជាពលរដ្ឋខ្មែរគ្រប់រូប មិនដែលបំភ្លេចនូវគុណបំណាច់ដ៏ធំធេងនិងវីរភាពដ៏អង់អាចក្លាហានរបស់លោកឧកញ៉ាចៅហ្វាយ សឺន គុយដែលបានដឹកនាំកម្លាំងអ្នកស្នេហាជាតិតស៊ូប្រឆាំងនឹងការឈ្លានពាន និងការគ្រប់គ្រងរបស់យួន ដើម្បីការពារវប្បធម៌និងអរិយធម៌ខ្មែរនៅកម្ពុជាក្រោម។
សូមបញ្ជាក់ថា បន្ទាប់សេចក្តីថ្លែងរបស់លោក អេង ឆៃអ៊ាង នៅបរទេសនោះ អង្គការ សមាគមខ្មែរកម្ពុជាក្រោមបានធ្វើសេចក្តីថ្លែងជាបន្តបន្ទាប់ និងបានឲ្យលោក អេង ឆៃអ៊ាង សុំទោសពលរដ្ឋខ្មែរកម្ពុជាក្រោមទាំងអស់ ហើយថែមទាំងព្រមានធ្វើបាតុកម្មផងដែរ។
លោកគឹម វណ្ណឆេង ប្រធានគណៈកម្មាធិការសម្របសម្រួលខ្មែរកម្ពុជាក្រោម បានថ្លែងប្រាប់អ្នកសារព័ត៌មានកាលពីថ្ងៃទី៤ ខែមករា ថា អង្គការ សមាគមខ្មែរកម្ពុជាក្រោម គ្រោងធ្វើបាតុកម្មដង្ហែក្បួនទៅទីស្នាក់ការកណ្តាលគណបក្សសង្គ្រោះ ជាតិ នៅសប្តាហ៍ទី២ នៃខែមករា ឆ្នាំ២០១៦ នេះ ដើម្បីទាមទារឲ្យលោក អេង ឆៃអ៊ាង ប្រធានគណៈកម្មការសិទ្ធិមនុស្សទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា និងជាតំណាងរាស្ត្រមណ្ឌលខេត្តកណ្តាលរបស់គណបក្សសង្គ្រោះជាតិ សុំទោសប្រជាពលរដ្ឋខ្មែរកម្ពុជាក្រោម ចំពោះពាក្យសំដីខុសឆ្គង និងធ្វើឲ្យប៉ះពាល់ដល់វិរៈបុរសខ្មែរក្រោម លោកឧកញ៉ា សឺន គុយ។
លោកគឹម វណ្ណឆេង បញ្ជាក់ថា ការថ្លែងបែបនេះ របស់លោកអេង ឆៃអ៊ាង គឺជាសកម្មភាពអមិត្ត និងជាសត្រូវប្រវត្តិសាស្ត្រ បង្កឲ្យមានអរិភាពរវាងជាតិសាសន៍ឯង និងជាចេតនាបំភ្លៃការពិត ដែលបង្វែភាពទាល់ច្រករបស់បក្សខ្លួនជាយុទ្ធសាស្ត្រប្រសើរទៅវិញ។ ដូច្នេះលោកអេង ឆៃអ៊ាង ត្រូវសុំទោសចំពោះជនរួមឈាមខ្មែរកម្ពុជាជាសាធារណៈ ពុំនោះទេ យើងនឹងប្រើសិទ្ធិក្នុងនាមប្រជាជាតិមួយប្រឆាំងគ្រប់រូបភាពនឹង ទង្វើអសីលធម៌នេះ រហូតដល់មានដំណោះស្រាយសមរម្យ។ លោកបន្តថា “ការបែបងងឹតងងងល់មិនយល់អំពីកាលៈទេសៈ និងបរិបទនយោ បាយ ហើយបញ្ចេញទស្សនផ្ទាល់ខ្លួនរិះគន់បែបមើលងាយនូវសកម្មភាព ដែលមហាវីរបុរសខ្មែរកម្ពុជាក្រោមមួយរូបបានធ្វើពលីកម្មហ៊ានបូជាសាច់ស្រស់ ឈាមស្រស់ ដើម្បីបុព្វហេតុ ជាតិ និងសាសនានៅកម្ពុជាក្រោម គឺជាទង្វើអគតិ ហើយមិនស័ក្តិសមជាអ្នកនយោបាយឡើយ។
ជាមួយគ្នានោះ បានអំពាវនាវដល់ប្រជាពលរដ្ឋខ្មែរកម្ពុជាក្រោមទាំងអស់ ដែលធ្លាប់គាំទ្រនយោបាយមិនទទួលខុសត្រូវរបស់គណបក្សសង្គ្រោះជាតិ នាពេកកន្លងមក ឲ្យពិចារណាឡើងវិញនូវការប្រៀបធៀបនេះ មុននឹងសម្រេចចិត្តផ្ញើជោគវាសនារបស់ខ្លួនឲ្យទៅក្រុមអ្នកនយោបាយ ដែលមានចរិតអំនួតតែបក្ខពួក ដោយមិនខ្វល់ពីការខាតបង់ប្រយោជន៍រួម៕
លោក អេង ឆៃអ៊ាង សុំទោសប្រជាពលរដ្ឋខ្មែរក្រោមចំពោះកំហុស ដែលបានថ្លែងទាក់ទងលោកឧកញ៉ា សឺន គុយ
0 Comments