ក្រុមហ៊ុន Microsoft នឹងចាប់ផ្តើមការព្រមានអ្នកប្រើប្រាស់ ប្រសិនបើខ្លួនសង្ស័យថា រដ្ឋាភិបាលកំពុងព្យាយាម hack ចូលទៅក្នុងគណនីអុីមែល និងបណ្ដាញផ្សេងទៀតរបស់ពួកគេ។
អ្នកប្រើប្រាស់នឹងទទួលបានការជូនដំណឹង ប្រសិនបើកម្មវិធី Outlook ឬ OneDrive ហើយនិងសេវាកម្មផ្សេងទៀតរបស់ពួកគេ ត្រូវបានគេកំណត់គោលដៅ។
សម្រាប់នរណាម្នាក់ ដែលបានទទួលការព្រមាន គួរតែចាត់វិធានការបន្ថែមទៀត ដើម្បីរក្សាទិន្នន័យរបស់ពួកគេឱ្យមានសុវត្ថិភាព។
ការផ្លាស់ប្តូរនេះអាចបង្កឱ្យមានជម្លោះជាមួយសំណើរបស់រដ្ឋាភិបាលអង់គ្លេស ក្នុងការកំណត់នូវអ្វីៗ ដែលក្រុមហ៊ុនបច្ចេកវិទ្យាអាចបញ្ជាក់ថា ជាការឃ្លាំមើលបាន។
ក្រុមហ៊ុនជាច្រើនផ្សេងទៀតរួមទាំង Twitter, Facebook, Google និង Yahoo បានសន្យាកាលពីមុនរួចមកហើយ ក្នុងការជូនដំណឹងដល់ប្រជាជនអំពីសំណើរបស់រដ្ឋាភិបាលសម្រាប់បញ្ហាទិន្នន័យ។
ទិន្នន័យ ដែលត្រូវបានមើល
ក្រុមហ៊ុន Microsoft បានឱ្យដឹងនៅក្នុង blogpost មួយថា ទោះបីជាខ្លួនអនុញ្ញាតឱ្យមនុស្សដឹងថា គណនីពួកគេអាចជាគោលដៅ ឬមានការសម្របសម្រួលដោយចោរកម្មអីុនធើណេត វាក៏ត្រូវការជាចាំបាច់ដើម្បីធ្វើការចូលទៅបន្ថែមទៀត ប្រសិនបើរដ្ឋប្រទេសជាតិជាអ្នកទទួលខុសត្រូវ។
លោក Scott Charney របស់ក្រុមហ៊ុន Microsoft បានសរសេរថា ខ្លួនត្រូវការធ្វើឱ្យមានភាពខុសគ្នាមួយ ព្រោះវា “ទំនងជាបញ្ជាក់ថា ការវាយប្រហារនេះអាចមានភាពស្មុគស្មាញច្រើន ឬប្រកបដោយនិរន្តរភាព ច្រើនជាងការវាយប្រហារពីចោរកម្មអីុន ធើណេត ឬក៏មកពីអ្នកដទៃទៀត”។
លោក Charney បានបន្ថែមទៀតថា ការជូនដំណឹងនឹងមិនមានន័យថា ពួកអ្នកវាយប្រហារបានលួចចូលទៅក្នុងគណនីមួយនោះឡើយ។ ផ្ទុយទៅវិញ វាគ្រាន់តែអាចបញ្ជាក់ថា គណនីមួយៗនេះអាចត្រូវបានគេកំណត់គោលដៅ។
ក្រុមហ៊ុន Microsoft បាននិយាយថា ខ្លួននឹងមិនចែករំលែកសេចក្ដីលម្អិតចំពោះអ្វី ដែលអាចនាំឱ្យមានការសន្និដ្ឋានថា ជារដ្ឋប្រទេសឡើយ ប៉ុន្តែនៅពីក្រោយការវាយប្រហារបាននិយាយថា ខ្លួននឹងផ្ញើលិខិតជូនដំណឹងប្រសិនបើ “ភស្តុតាងសមហេតុផល” បានបង្ហាញថា អង្គភាពនេះអាចនឹងពាក់ព័ន្ធ។
ក្រុមហ៊ុន Microsoft បានបន្ថែមទៀតថា អ្នកប្រើប្រាស់គួរតែធ្វើឱ្យប្រាកដថា កម្មវិធីនៅលើឧបករណ៍ទាំងអស់របស់ពួកគេបានដំឡើងកំណែប្រែថ្មី ដោយប្រើកម្មវិធីកម្ចាត់មេរោគ និងធ្វើការវិភាគរកមេរោគ នៅលើកុំព្យូទ័រ ហើយនិងឧបករណ៍ទាំងអស់ ដែលពួកគេបានប្រើឱ្យបានទៀងទាត់ក្នុងចំណោមវិធីសាស្ត្រដទៃទៀត។
សេចក្តីព្រាងច្បាប់ Investigatory Powers Bill មានគោលបំណងធ្វើឱ្យមានភាពទាន់សម័យសម្រាប់ជាផ្លូវដល់ប៉ូលិសរដ្ឋ និងអ្នកស៊ើបការណ៍ ក្នុងការប្រមូលទិន្នន័យដើម្បីប្រយុទ្ធប្រឆាំងនឹងឧក្រិដ្ឋកម្ម អំពើភេរវកម្ម និងការគំរាមកំហែងដទៃទៀត។
បទប្បញ្ញត្តិនៅក្នុងច្បាប់នេះ នឹងធ្វើឱ្យវាក្លាយជាការខុសច្បាប់សម្រាប់ក្រុមហ៊ុន ក្នុងការប្រាប់អតិថិជនពួកគេថា ត្រូវបានកំណត់គោលដៅ ប្រសិនបើក្រុមហ៊ុននេះមិនបានទទួលការអនុញ្ញាតជាផ្លូវការដើម្បីធ្វើដូច្នេះ។
ក្រុមហ៊ុន Microsoft បានបដិសេធមិនធ្វើអត្ថាធិប្បាយថា តើគោលនយោបាយក្នុងការជូនដំណឹងរបស់ខ្លួននឹងធ្វើឱ្យមានការប៉ះទង្គិចជាមួយនឹងច្បាប់ ដែលស្នើឡើងនេះយ៉ាងណាទៀត។
ក្នុងសេចក្តីថ្លែងការណ៍ចេញផ្សាយសម្រាប់រ៉យទ័រ ខ្លួនបាននិយាយថា៖ “វាក៏ជាការគំរាមកំហែង ដែលបានជ្រួតជ្រាបក្នុងវិធីសាស្ត្ររបស់យើងផងដែរ”៕
ក្រុមហ៊ុន Microsoft បានព្រមានអំពីការ Hack ដោយរដ្ឋប្រទេស
0 Comments