ភ្នំពេញ ៖ កម្លាំងគយចល័តសហការជាមួយកម្លាំងអាវុធហត្ថលើផ្ទៃប្រទេស នៅព្រឹកថ្ងៃទី៤ ខែមករា ឆ្នាំ២០១៥នេះ បានចុះមកត្រួតពិនិត្យទីតាំងឃ្លាំងលក់រថយន្តស៊េរីទំនើបៗជាច្រើនទីតាំងនៅក្នុងខណ្ឌ៧មករា។ តែក្នុងប្រតិបត្តិការនោះ សមត្ថកិច្ចរកមិនឃើញមានរថយន្តអត់ពន្ធឡើយ។
សមត្ថកិច្ចបានឲ្យដឹងថា ក្នុងប្រតិបត្តិការនេះ ដឹកនាំ ដោយលោកព្រះរាជអាជ្ញារងអមសាលាដំបូងរាជធានីភ្នំពេញ លោកសៀង សុខ បានចុះត្រួតពិនិត្យ ទីតាំងឃ្លាំងលក់រថយន្តស៊េរីទំនើបៗ ចំនួន៣ ទីតាំង នៅតាមបណ្តោយផ្លូវសហព័ន្ធរុស្សី។ ឃ្លាំងលក់រថយន្តទាំង៣ ទី១យីហោ« ឃ្លាំង២ » ,,ទី២យីហោ « យុង ចំរើន និងទី៣ ហេង ហ៊ុយ។ ក្រោយពីត្រួតពិនិត្យ លើរថយន្តស៊េរីថ្មីជាង១០០គ្រឿង សមត្ថកិច្ច រកមិនឃើញ មានរថយន្តអត់ពន្ធនាំចូលឡើយ សូម្បីតែមួយគ្រឿង។
សូមរំលឹកថា កន្លងមកនេះ កម្លាំងគយចល័តសហការជាមួយកម្លាំងអាវុធហត្ថលើផ្ទៃ បានចុះឃាត់រថយន្ត អត់ពន្ធនៅតាមផ្លូវសាធារណៈ និងផ្ទះប្រជាពលរដ្ឋ បានរថយន្តរាប់សិបគ្រឿង សុទ្ធតែរថយន្តស៊េរីទំនើប ដោយឲ្យម្ចាស់ចូលខ្លួនទៅបង់ពន្ធ។
កាលពីពេលថ្មីៗមកនេះ អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ បានចេញសេចក្ដីជូនដំណឹងមួយ ដោយព្រមានធ្ងន់ៗថា នឹងចាត់វិធានការបង្ក្រាបតាមដងផ្លូវទូទាំងប្រទេស តាមគេហដ្ឋាន និងទីសាធារណៈនានា ប្រសិនបើម្ចាស់យានយន្តណា មិនបានទៅបង់ពន្ធអាករ ទាន់ពេលវេលាទេនោះ៕
កម្លាំងគយចល័តចុះត្រួតពិនិត្យទីតាំងលក់រថយន្តស៊េរីទំនើប៣ទីតាំង សង្ស័យមានរថយន្តគេចពន្ធ (Update)
0 Comments