បាត់ដំបង ៖ រថយន្តទំនើបមួយគ្រឿង ត្រូវបានផ្ទុះឆេះមួយកំណាត់ផ្នែកខាងក្បាល ព្រមទាំងបានបង្កអោយមានការភ្ញាក់ផ្អើលផងដែរ ខណៈដែលម្ចាស់រថយន្តនេះកំពុងធ្វើការបើកបរសុខៗ ក៏ស្រាប់តែមានហេតុការណ៍បែបនេះកើតឡើងនៅលើទ្រូងផ្លូវចំកណ្តាលទៅប្រជុំជនតែម្តង ដែលជាការប្រសើរដោយសារតែមានប្រជាពលរដ្ឋមកជួយអន្តរាគមន៍ក្នុងការជះទឹកពន្លត់។
ហេតុការណ៍ ដែលបានបង្កអោយមានការភ្ញាក់ផ្អើលនេះ និងឆាបឆេះដោយឯកឯងនេះដែរ គឺបានកើតឡើងកាលពីវេលាម៉ោង ៥ល្ងាច ថ្ងៃទី២៥ ខែឧសភា ឆ្នាំ២០១៨ នៅលើកំណាត់ផ្លូវលេខ៥៧ ត្រង់ចំណុចមុខសាលាបឋមសិក្សាភ្នំសំពៅ ស្ថិតក្នុងភូមិភ្នំសំពៅកើត ឃុំភ្នំសំពៅ ស្រុកបាណន់ ខេត្តបាត់ដំបង។
ការឆាបឆេះនេះ បានកើតឡើងទៅលើរថយន្តមួយគ្រឿង ម៉ាកLexls RX300 ពណ៌សពាក់ស្លាកលេខ បប2B 3968ស៊េរី ឆ្នាំ2002 របស់ជនរងគ្រោះ ឈ្មោះ ឌីន សៅ ភេទប្រុស អាយុ៣៥ឆ្នាំ រស់នៅភូមិអូរតាទៀក ឃុំតាតោក ស្រុកសំឡូត ខេត្តបាត់ដំបងមុខរបរធ្វើចំការ ដោយការឆេះនេះនៅមិនទាន់ដឹងអំពីមូលហេតុ នៅឡើយ ខណៈពេលដែលម្ចាស់កំពុងបើកមកពីបាត់ដំបង ឆ្ពោះទៅកាន់លំនៅដ្ឋានក៏ឆេះតែម្ដង ហើយត្រូវបានប្រជាពលរដ្ឋជួយជះទឹក អន្តរាគមន៍ដើម្បីពន្លត់៕
Source: Kampuchea Thmey Daily
0 Comments