កីឡាករ សុក ចាន់​រស្មី ប្រកាស​ព្យួរ​ស្បែកជើង​ទាំង​វ័យក្មេង​ ក្រោយ​របួស​ញាំញី​មិនចេះចប់​

​កីឡាករ សុក ចាន់​រស្មី វ័យ​២៦​ឆ្នាំ​ សមាជិក​ក្នុង​អគ្គីសនី​កម្ពុជា ប្រចាំ​ពានរង្វាន់​លី​គ​កំពូល​កម្ពុជា (Metfone Cambodian League 2018) និង​ធ្លាប់ធ្វើ​ព្យុះ​ធ្វើ​ភ្លៀង​អស់​រយៈពេល​ជាង​ ១០​ ឆ្នាំ​មកនេះ ក្នុងនាម​ជា​ខ្សែប្រយុទ្ធ​ បានប្រកាស​ព្យួរ​ស្បែកជើងនៅ​ថ្ងៃ​សុក្រ សប្ដាហ៍​នេះ ​ក្រោយ​រូបគេ​មាន​របួសគ្រាំគ្រា​ជាច្រើន​ឆ្នាំ​មក​។​​កីឡាករ​កើត​នៅ​រាជធានី​ភ្នំពេញរូបនេះ បាន​បញ្ជាក់​នៅលើ​គណនី​ហ្វេ​ស​ប៊ុ​ក​របស់ខ្លួន​ថា «​ខ្ញុំ​សូមប្រកាស​ជា​ផ្លូវការ​ថា ​ខ្ញុំបាទ​សុំ​លាឈប់​ពី​បាល់ទាត់​អាជីព​ហើយ​។ អរគុណ​បាល់ទាត់​ដែរ​ធ្វើ​ឲ្យ​ខ្ញុំស្គាល់​បងប្អូន​ជាច្រើន​»​។ មូល​ហេតុដែល​កីឡាករ​រូបនេះ​សម្រេចចិត្ត​លាឈប់​ទាំង​វ័យក្មេងបែបនេះ ​ត្រូវបាន​ម្ចាស់ខ្លួន​អះអាងថា ​រូបគេ​មាន​របួស​ជង្គង់​ជាង ​២ ​ឆ្នាំ​មកហើយ ខំ​ព្យាបាលដែរ​តែ​មិនបាន​ដូចដើម​សោះ​។​បើ​និយាយ​ពី​ស្នាដៃ​វិញ ​ក្រៅ​ធ្លាប់​ឈ្នះ​ស្បែកជើង​មាស​ពានរង្វាន់​សម្តេច​តេ​ជោ ហ៊ុន សែន ឆ្នាំ​២០០៨ ជាមួយ​ក្រុម Spark FC សុក ចាន់​រស្មី ធ្លាប់​លើក​ពានរង្វាន់​លី​គ​កំពូល​កម្ពុជា​ឆ្នាំ ​២០១៣ ជាមួយ​ក្រុមព្រះខ័ន​រាជ​ស្វាយរៀង ខណៈ​នៅ​ឆ្នាំ​ ២០១១ និង​ ២០១២ ឈ្នះ​ជើងឯក​ពានរង្វាន់​សម្តេច​តេ​ជោជាមួយ​ក្រុម​នេះ​ដូចគ្នា ហើយ​នៅ​ឆ្នាំ​ ២០១៦ លើក​ពានរង្វាន់​សម្តេច​តេ​ជោ ជាមួយក្រសួងការពារជាតិ​។​

​សូម​រំលឹកថា ​ម្ចាស់​ស្បែកជើង​មាស​ពានរង្វាន់​សម្តេច​តេ​ជោ ហ៊ុន សែន ឆ្នាំ​ ២០០៨ រូបនេះ បានចាប់ផ្ដើម​អាជីព​ដំបូង​ជាមួយ​ក្រុម​ព្រះខ័ន​រាជ​ស្វាយរៀង ខណៈ​កាលពី​រដូវ​កាល ២០១៣ កន្លងទៅ សុក ចាន​រស្មី បាន​ផ្ទេរ​ទៅកាន់​ក្លិប​ត្រាយ​អាស៊ី (​ខេ​ម​បូ​ឌា​ន​ថា​យ​ហ្គឺ​រ​) ដែល​កាលនោះ​ល្បីថា​ក្នុងតម្លៃ​ខ្លួន​ខ្ទង់​ ៣០០០ ដុល្លារ​។ ចូលដល់​ដើមរដូវ​កាល​ ២០១៦ កន្លងទៅនេះ​រូបគេ​បានចេញទៅ​ចូលរួម​ជាមួយ​ក្រុម​ក្រសួង​ការពារជាតិ មុន​ចេញទៅ​ចូលរួម​ក្រុម​អគ្គីសនី​កម្ពុជា នៅ​ឆ្នាំជាមួយគ្នា​នោះដែរ​។ រូបគេ​រក​គ្រាប់​បាល់​ឱ្យ​ក្រុម​ជារឿយៗផងដែរ​។ បើ​និយាយ​ពី​ក្នុង​ជម្រើសជាតិវិញ កាលពី​វគ្គ​ជម្រុះ​ព្រឹត្តិការណ៍​កីឡា AFF Suzuki Cup 2014 រូបគេ​រក​គ្រាប់​បាល់​ឱ្យកម្ពុជា បាន​ ៣​ គ្រាប់​ម្នាក់ឯង​ ក្នុង​ជ័យជម្នះ​លើ​ក្រុម​ប្រទេស​ទី​ម័​រ​ខាងកើត ៣​ទល់​២៕​

Source: Kampuchea Thmey Daily