សិស្សម្នាក់ដែលប្រដាប់ដោយកាំភ្លើងពីរដើម បានបាញ់គ្រូបង្រៀនម្នាក់ និងសិស្សម្នាក់ទៀតនៅសាលារៀនមួយក្នុងរដ្ឋ Indiana កាលពីថ្ងៃសុក្រ ហើយរបាយការណ៍ប្រព័ន្ធផ្សព្វផ្សាយបាននិយាយថា គ្រូបង្រៀនបានឆក់យកកាំភ្លើងរបស់អ្នកបាញ់ប្រហារ ហើយបានចាប់បោកគាត់ទៅនឹងដីដើម្បីការពារអ្នកដទៃនៅក្នុងថ្នាក់រៀន។
ឧបទ្ទវហេតុនៅអនុវិទ្យាល័យ Noblesville West Middle School គឺជាហេតុការណ៍ចុងក្រោយបំផុតនៃការបាញ់ប្រហារនៅតាមសាលារៀននិងមហាវិទ្យាល័យសហរដ្ឋអាមេរិកដែលជាហេតុជំរុញឲ្យមានការជជែកពិភាក្សាអំពីវិធីដើម្បីរក្សាបរិវេណសាលារៀនឲ្យមានសុវត្ថិភាព។
អាជ្ញាធរបាននិយាយថា ជនសង្ស័យបានសុំចេញពីថ្នាក់រៀនហើយវិលត្រឡប់មកវិញជាមួយនឹងកាំភ្លើងរួចបើកការបាញ់ប្រហារក្នុងម៉ោងវិទ្យាសាស្ត្រ។ ប៉ូលិសបានចាប់ខ្លួនគាត់នៅក្នុងថ្នាក់រៀន។
មេប៉ូលិសលោក Kevin Jowitt បានប្រាប់ក្រុមអ្នកយកព័ត៌មាននៅទីក្រុង Noblesville ថា “យើងដឹងថា ស្ថានការណ៍នេះត្រូវបានដោះស្រាយយ៉ាងឆាប់រហ័ស”។
ប៉ូលិសបាននិយាយនៅក្នុងសេចក្តីថ្លែងការណ៍មួយថា ឆ្មាំប៉ូលិសម្នាក់នៅសាលារៀនបានឆ្លើយតបចំពោះការបាញ់ប្រហារនេះហើយមន្ត្រីអនុវត្តច្បាប់ដទៃទៀតបានទៅដល់នៅក្នុងរយៈពេលត្រឹមតែប៉ុន្មាននាទីប៉ុណ្ណោះ។
គ្រូបង្រៀនដែលរងរបួសត្រូវបានគេស្គាល់ថាមានឈ្មោះ Jason Seaman អាយុ២៩ឆ្នាំហើយសេចក្តីថ្លែងការណ៍បាននិយាយថា គាត់ស្ថិតនៅក្នុងស្ថានភាពល្អប្រសើ។ ក្មេងស្រីម្នាក់មិនត្រូវបានគេប្រាប់ឈ្មោះទេហើយប៉ូលិសបាននិយាយថា នាងកំពុងស្ថិតនៅក្នុងស្ថានភាពធ្ងន់ធ្ងរនៅមន្ទីរពេទ្យ Indianapolis ។
គួរបញ្ជាក់ថា ការបាញ់ប្រហារនេះបានកើតឡើងមួយសប្តាហ៍បន្ទាប់ពីសិស្សវិទ្យាល័យម្នាក់នៅទីក្រុង Santa Fe នៃរដ្ឋ Texas បានបាញ់សម្លាប់មិត្តរួមថ្នាក់ចំនួនប្រាំបីនាក់និងគ្រូបង្រៀនពីរនាក់៕ REUTERS
[caption id="attachment_916141" align="aligncenter" width="696"]
[/caption]Source: Kampuchea Thmey Daily
0 Comments