សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត អញ្ជើញជាអធិបតីក្នុងពិធីបើកការប្រកួតកីឡាជាតិលើកទី២

ភ្នំពេញ៖ នៅល្ងាចថ្ងៃទី២៥ ខែឧសភានេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញជាអធិបតីដ៏ខ្ពង់ខ្ពស់ ក្នុងពិធីបើកការប្រកួតកីឡាជាតិលើកទី២ នៅពហុកីឡដ្ឋានជាតិអូរឡាំពិក។ នេះគឺជាលើកទីពីរហើយដែលសម្ដេចតេជោនាយករដ្ឋមន្ដ្រី និងសម្តេចកិត្តិព្រឹទ្ធបណ្ឌិត បានផ្ដល់កិត្តិយសអញ្ជើញជាអធិបតីក្នុងពិធីបើកព្រឹត្តិការណ៍កីឡាជាតិ ខណៈកាលពីព្រឹត្តិការណ៍កីឡាជាតិលើកទី១ ឆ្នាំ២០១៦ សម្ដេចទាំងពីរក៏ធ្លាប់បានអញ្ជើញជាអធិបតីផងដែរ។

ថ្នាក់ដឹកនាំគណៈកម្មាធិការជាតិអូឡាំពិកកម្ពុជា បានចាត់ទុកការផ្ដល់កិត្តិយសអញ្ជើញចូលរួមរបស់សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត គឺជាការផ្តល់កម្លាំងចិត្តដ៏សំខាន់សម្រាប់ក្រុមគណៈកម្មការរៀបចំព្រឹត្តិការណ៍ជាតិ និងគ្រប់ភាគីពាក់ព័ន្ធ ពិសេសកីឡាករ-កីឡាការិនី ដែលត្រូវទទួលបានការយកចិត្តទុកដាក់ និងភាពកក់ក្ដៅពីប្រមុខដឹកនាំរាជរដ្ឋាភិបាលកម្ពុជា ដើម្បីជំរុញវិស័យកីឡាជាតិឲ្យកាន់តែរីកចម្រើនឆ្ពោះទៅស៊ីហ្គេមលើកទី៣២ នាឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។

ព្រឹត្តិការណ៍កីឡាជាតិលើកទី២នេះ ក៏មានកម្មវិធីកាន់តែអស្ចារ្យជាងលើកទី១ ផងដែរ ដោយព្រះមហាក្សត្រនៃព្រះរាជាណាចក្រកម្ពុជា ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះបរមរាជានុញ្ញាតដ៏ខ្ពង់ខ្ពស់បំផុត សព្វព្រះរាជហឫទ័យប្រោសព្រះរាជទានភ្លើងគប់ដល់តំណាងកីឡាករជាតិ នាំយកភ្លើងគប់ពីព្រះបរមរាជវាំង មកប្រគល់ជូនសម្ដេចតេជោនាយករដ្ឋមន្ដ្រី ដើម្បីដុតបំភ្លឺគប់ប្រារព្ធពិធីបើកការប្រកួតផ្លូវការនៅពហុកីឡដ្ឋានជាតិ។

សូមបញ្ជាក់ថា ការប្រកួតកីឡាជាតិលើកទី២ ក្រោមប្រធានបទ «កីឡានាំមកនូវសន្តិភាព និងការអភិវឌ្ឍ» ដែលមានរយៈពេលមួយសប្តាហ៍នៅពហុកីឡដ្ឋានជាតិអូឡាំពិក នឹងប្រព្រឹត្តទៅចាប់ពីថ្ងៃទី២៥ ខែឧសភា ដល់ថ្ងៃទី០៤ ខែមិថុនា ឆ្នាំ ២០១៨ ដែលមាន កីឡាករ កីឡាការិនី ចូលរួមប្រកួតបានកើនដល់ជាង ៤ ពាន់នាក់ ខណៈប្រភេទកីឡាបានកើនឡើងចំនួន ២៧ និងវិញ្ញាសាប្រកួតមានរហូតដល់ ២៧៤ ត្រូវបានកំណត់ដាក់ឲ្យប្រកួតក្នុងគោលបំណងវាស់ស្ទង់គុណភាពកីឡាតាមប្រភេទកីឡានីមួយៗ ក៏ដូចជាការហ្វឹកហ្វឺនរបស់មន្ដ្រីរៀបចំការប្រកួត មន្ដ្រីអាជ្ញាកណ្ដាល និងចៅក្រម ក្នុងការត្រៀមលក្ខណៈសម្បត្តិឆ្ពោះទៅធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ នាឆ្នាំ ២០២៣។ ចំពោះទីកន្លែងប្រកួត សម្រាប់រាជធានីភ្នំពេញ គឺផ្ដោតលើការប្រើប្រាស់ទីលានក្នុងពហុកីឡដ្ឋានជាតិ និងពហុកីឡដ្ឋានជាតិមរតកតេជោ។ រីឯការប្រកួតតាមខេត្ត រួមមានខេត្តកែប, ខេត្តកំពត និងខេត្តកំពង់ធំជាដើម។

គណៈកម្មការរៀបចំព្រឹត្តិការណ៍កីឡាជាតិ ក៏បានត្រៀមរៀបចំនូវកម្មវិធីប្លែកៗ និង អស្ចារ្យជាច្រើនទៀត ដើម្បីអបអរពិធីបើក-បិទកីឡាជាតិ រួមមាន៖ ការសម្ដែងចលនកាយសមស្របរបស់ក្រុមយុវជន និង ក្រុមអ្នកជំនាញកីឡា ការសម្ដែងសិល្បៈ បាញ់កាំជ្រួចដ៏កម្រ រួមទាំងវត្តមានរបស់កំពូលតារាងចម្រៀងល្បីៗប្រចាំកម្ពុជា៣រូប ដូចជា លោក ព្រាប សុវត្ថិ, កញ្ញា មាស សុខសោភា និងកញ្ញា ឱក សុគន្ធកញ្ញា ដែលលើកយកបទចម្រៀងពាក់ព័ន្ធកីឡាជាតិ ដើម្បីច្រៀងអបអរសាទរនាឱកាសដ៏អធិកអធមនេះផងដែរ៕