ភ្នំពេញ ៖ ជារៀងរាល់យប់ គេសង្កេតឃើញកម្លាំងរបស់ គណៈបញ្ជាការឯកភាពខណ្ឌច្បារអំពៅបានចុះត្រួតពិនិត្យអាវុធជាតិផ្ទុះក្នុងមូលដ្ឋានដើម្បីរក្សាសន្តិសុខសណ្តាប់ធ្នាប់ជូនដល់ប្រជាពលរដ្ឋនិងថ្នាក់ដឹកនាំដែលមានលំនៅឋានក្នុងទឹកដីខណ្ឌច្បារអំពៅរាជធានីភ្នំពេញ។
យោងតាមប្រសាសន៍លោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅនិងជាប្រធានគណៈបញ្ជាការឯកភាពខណ្ឌបានមានប្រសាសន៍ថា ចំពោះការងារសន្តិសុខនេះគឺចាំបាច់បំផុតដែលអាជ្ញាធរត្រូវមានភារកិច្ចចំពោះមុខក្នុងបំណងតែមួយដើម្បីរក្សាបាននូវសុខសន្តិភាពជូនប្រជាពលរដ្ឋកុំឲ្យពួកគាត់ភ័យខ្លាចនូវបទល្មើសផ្សេងៗដែលកើតឡើងក្នុងមូលដ្ឋាន។
លោកប្រធានគណៈបញ្ជាការឯកភាពបានបន្តថា កាលដែលកម្លាំងគណៈបញ្ជាការឯកភាពរបស់យើងដាក់ការត្រួតពិនិត្យអាវុធជាតិផ្ទុះក្នុងមូលដ្ឋានជារៀងរាល់យប់ គឺឃើញថា បានទប់ស្កាត់រាល់បទល្មើសបានច្រើនដូចជាអ្នកប្រើប្រាស់អាវុធជាតិផ្ទុះគ្មានលិខិតស្នាម ជនចែកចាយថ្នាំញៀន មុខសញ្ញាចោរកម្មនិងសំខាន់អ្នកបើកបរមានជាតិស្រវឹងដែលអាចបង្កគ្រោះថ្នាក់ដល់អ្នកដំណើរដែលគ្នាមិនដឹងអីសោះ។
ក្រៅពីដាក់កម្លាំងត្រួតពិនិត្យអាវុធជាតិផ្ទុះគឺនៅមានកម្លាំងផ្សេងៗទៀតចុះល្បាតការពារតាមច្រកតូចៗតាមបណ្តាសង្កាត់ទាំង៨ក្នុងខណ្ឌច្បារអំពៅទើបអាចទប់ស្កាត់បទល្មើសបានមុនពេលដែលមុខសញ្ញាចេញធ្វើសកម្មភាពគឺវាខកខានព្រោះឃើញសមត្ថកិច្ចចម្រុះនៅគ្រប់ច្រកល្ហក។
លោកចេង មុនីរ៉ា បានធ្វើការណែនាំដល់លោក លោកស្រីចៅសង្កាត់និងនាយនគរបាលប៉ុស្តិ៍ទាំងអស់ត្រូវដាក់កម្លាំងប្រចាំការនៅទីស្នាក់ការគ្រប់ពេលមិនថាយប់ ឬ ថ្ងៃ ដើម្បីរង់ចាំទទួលពាក្យបណ្តឹងពីប្រជាពលរដ្ឋដើម្បីចុះទៅអន្តរាគមន៍ជួយគាត់ភ្លាមៗឲ្យគាត់មានទំនុកចិត្តមកលើអាជ្ញាធរនិងសមត្ថកិច្ចយើង៕
Source: Kampuchea Thmey Daily
0 Comments