ភ្នំពេញ ៖ បុរស២នាក់ ត្រូវបានគេចោទប្រកាន់ប្តឹងសមត្ថកិច្ចអោយចាប់ខ្លួនក្រោយពីបានធ្វើសកម្មភាពចូលក្នុងផ្ទះគេលួចយកម៉ាស៊ីនកុំព្យូទ័រ១គ្រឿង កាលពីម៉ោង៣រសៀល នាថ្ងៃអាទិត្យទី១៧ ខែមិថុនា ឆ្នាំ២០១៨ នៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។
ក្រុមជនសង្ស័យ ១ឈ្មោះ ម៉ន មិត្ត អាយុ១៩ឆ្នាំគ្មានមុខរបរពិតប្រាកដស្នាក់ នៅផ្ទះជួលភូមិបាយ៉ាប សង្កាត់ភ្នំពេញថ្មី។ ២ ឈ្មោះ សន ពិសី អាយុ៣២ឆ្នាំ មុខរបរ មិនច្បាស់លាស់ មានទីលំនៅផ្ទះសង់ថ្មី ភូមិបាយ៉ាប សង្កាត់ភ្នំពេញថ្មី។
លោកគង់ សុភ័ក្ត្រ អាយុ២៥ឆ្នាំ ជាជនរងគ្រោះនិងជាដើមបណ្តឹង បាននិយាយថា ៖ នៅមុនពេលកើតហេតុ គាត់បានឃើញជនសង្ស័យទាំង២នាក់ជិះម៉ូតូមកឈប់នៅមុខផ្ទះរបស់គាត់ តែពេលនោះគាត់ក៏បានចូលទៅក្នុងបន្ទប់ទឹកមួយភ្លែត ចេញមកវិញស្រាប់តែបាត់កុំព្យូទ័រ ប្រភេទលែបថប ១គ្រឿងម៉ាក Accer ហើយក៏បាត់ពួកគេពីមុខផ្ទះរបស់គាត់ដែរ។
សាក្សីនៅក្បែរខាងក៏បានប្រាប់ថា ជនសង្ស័យទាំង២នាក់ខាងលើជាអ្នកចូលទៅលួចយកម៉ាស៊ីនកុំព្យូទ័រ នោះ ដោយឈ្មោះ សន ពិសី ជាអ្នកបើកបរម៉ូតូនិងឈ្មោះម៉ន មិត្ត ជាអ្នកចូលទៅលួចយកដល់ក្នុងផ្ទះ។
ក្រោយប៉ូលិសសាកសួរ ពួកគេបានសារភាពប្រាប់ថា ម៉ាស៊ីនកុំព្យូទ័រខ្លួនបានលួចយកមែនពេលលួចបានយកទៅលក់អោយគេតាមរូបភាពដាក់បញ្ចាំនៅម្តុំក្តាន់២ សង្កាត់ស្រះចក ខណ្ឌដូនពេញ លុះពេលត្រឡប់មកផ្ទះវិញក៏ត្រូវជនរងគ្រោះប្តឹងប៉ូលិស អោយមកឃាត់ខ្លួនតែម្តង៕
Source: Kampuchea Thmey Daily
0 Comments