ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈកាលពីព្រឹកថ្ងៃទី១៥ ខែមិថុនា ឆ្នាំ២០១៨ បានប្រារព្ធទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈជាលើកដំបូងនៅមជ្ឈមណ្ឌលកោះពេជ្រក្រោមអធិបតីភាពលោកបណ្ឌិត ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ។
លោកបណ្ឌិត ពេជ សោភ័ន បានមានប្រសាសន៍ថា ការរៀបចំទិវាជាតិនេះ គឺស្របតាមអនុក្រឹត្យលេខ១៥០ អនក្រ.បក ចុះថ្ងៃទី០៦ ខែកញ្ញា ឆ្នាំ២០១៧ របស់រាជរដ្ឋាភិបាលកម្ពុជា ដែលបានកំណត់យកថ្ងៃទី១៥ ខែមិថុនា រៀងរាល់ឆ្នាំ ជា“ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ” ដើម្បីលើកកម្ពស់ការអប់រំបណ្ដុះបណ្ដាលបច្ចេកទេស និងវិជ្ជាជីវៈ និងធ្វើការផ្សព្វផ្សាយទៅដល់សិស្សានុសិស្ស យុវជនយុវនារី មាតាបិតា អាណាព្យាបាល និងវិស័យឯកជន ឱ្យបានយល់ដឹងអំពីសារៈសំខាន់នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងការអភិវឌ្ឍជំនាញប្រកបដោយគុណភាព និងប្រសិទ្ធភាពដល់កម្លាំងពលកម្មដែលឆ្លើយតបទៅនឹងតម្រូវការនៃទីផ្សារការងារទាំងក្នុង និងក្រៅស្រុក។
លោកបានបន្តថា ទិវាជាតិរៀបចំឡើងក្នុងគោលបំណងចំនួន៥ គឺ (១)-ផ្សព្វផ្សាយអំពីសារៈសំខាន់នៃវិស័យអប់រំបណ្តុះបណ្តាលបច្ចេកទេស និងវិជ្ជាជីវៈនៅកម្ពុជានាពេលបច្ចុប្បន្ន (២)-ផ្សព្វផ្សាយណែនាំអំពីមុខជំនាញបច្ចេកទេស និងព័ត៌មានអាហារូបករណ៍ដែលមាននៅតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (៣)-តាំងបង្ហាញពីស្នាដៃសិស្ស និស្សិត និងក្រុមហ៊ុនឯកជន (៤)-ជំរុញការផ្លាស់ប្តូរផ្នត់គំនិតមហាជន និងសិស្សានុសិស្សឱ្យងាកមកសិក្សាជំនាញបច្ចេកទេស និងវិជ្ជាជីវៈដែលទីផ្សារការងារកំពុងមានតម្រូវការខ្ពស់ និង (៥)-បង្កើតទំនាក់ទំនងរវាងគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ វិស័យឯកជន និងអង្គការជាតិ និងអន្តរជាតិ។
លោកបណ្ឌិតបណ្ឌិតពេជសោភ័នបានចាត់ទុកទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈនេះ គឺជាសកម្មភាពមួយ ក្នុងចំណោមសកម្មភាពសំខាន់ផ្សេងៗ ទៀតដែលក្រសួងការងារ និងបណ្តុះបណ្តាលវិជ្ជាជីវៈបាននិងកំពុងខិតខំផ្តួចផ្តើមសម្របសម្រួល និងរៀបចំឡើងជាមួយ ភាគីពាក់ព័ន្ធដើម្បីផ្សព្វផ្សាយអំពីភាពចាំបាច់នៃការអប់រំបណ្តុះបណ្តាលបច្ចេកទេស និងវិជ្ជាជីវៈជូនដល់មហាជន ជាពិសេស ក្មួយៗសិស្សនិស្សិត និងយុវជនយុវនារី ដែលតែងតែមានការបារម្ភអំពីការជ្រើសរើសជំនាញនិងគ្រឹះស្ថានសម្រាប់សិក្សាបន្តក្នុងការអភិវឌ្ឍជំនាញដែលប្រកបដោយគុណភាព ប្រសិទ្ធភាព ឥរិយាបថការងារ និងសីលធម៌វិជ្ជាជីវៈ ដើម្បីអាចឈានចូលទៅក្នុងទីផ្សារការងារដោយជោគជ័យ និងទទួលបានប្រាក់ចំណូលកាន់តែប្រសើរ។
ជាមួយគ្នានេះដែរ ទិវាជាតិនេះ ក៏ជាការប្រមូលផ្តុំនូវភាគីពាក់ព័ន្ធសំខាន់ៗដែលរួមមាន គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ក្រុមហ៊ុនឯកជន អង្គការ សមាគម និយោជក និងវាគ្មិនជំនាញ ដែលនឹងផ្តល់ឱកាសដល់ក្មួយៗសិស្សនិស្សិត និងយុវជនយុវនារីបានជួបផ្ទាល់ដើម្បីទទួលបាននូវព័ត៌មាន បទពិសោធន៍ និងមគ្គទេសក៍អំពីការអប់រំបណ្តុះបណ្តាលជំនាញ ការបង្កើត អាជីព និងជម្រើសការងារសម្រាប់អនាគតរបស់ខ្លួន។
លោក ឡៅ ហ៊ីម ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈនៃក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ថាទិវាជាតិនេះ នឹងមានការធ្វើបទបង្ហាញអំពីវិស័យអប់រំបណ្ដុះបណ្ដាលបច្ចេកទេស និងវិជ្ជាជីវៈ និងតម្រូវការទីផ្សារការងារនៅកម្ពុជា ព្រមទាំងមានការចូលរួមតាំងពិព័រណ៍ និងផ្សព្វផ្សាយរបស់អង្គភាពពាក់ព័ន្ធសរុបចំនួន ៧៣ រួមមានអង្គភាព និងគ្រឹះស្ថានបណ្តុះបណ្តាលក្រោមឱវាទក្រសួងចំនួន ២៦ ក្រសួងស្ថាប័ន និងគ្រឹះស្ថានបណ្តុះបណ្តាលនានាចំនួន ១៥អង្គការ និងដៃគូអភិវឌ្ឍចំនួន១១ និងក្រុមហ៊ុនឯកជនចំនួន ២១ ស្ថាប័ន ដែលបានដាក់តាំងបង្ហាញពីស្នាដៃសិស្ស និស្សិតគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ លើជំនាញមួយចំនួនដូចជា អគ្គិសនី អេឡិចត្រូនិច មេកានិកសំណង់ស៊ីវិល ស្ថាបត្យកម្ម ទេសចរណ៍ សុខាភិបាល និងបដិសណ្ឋារកិច្ច ប្រព័ន្ធព័ត៌មានវិទ្យា និងសេវាកម្ម ជាដើម ជាពិសេសការដាក់តាំងបង្ហាញនូវខ្សែសង្វាក់ផលិតកម្មរបស់ផ្នែកឯកជនដែលបាននិងកំពុងប្រើប្រាស់អ្នកជំនាញបច្ចេកទេសលើទីផ្សារការងារ ក៏ដូចជាការប្រឹក្សាយោបល់អំពីជំនាញ និងការងារ និងព័ត៌មានអំពីអាហារូបករណ៍ផងដែរ។
តាមរយៈវេទិកាជាតិនេះដែរលោកសង្ឃឹមថា សាធារណជន ប្អូនៗសិស្សានុសិស្ស នឹងទទួលអត្ថប្រយោជន៍ដ៏មានសារៈសំខាន់អំពីព័ត៌មាន ចំណេះដឹង និងបទពិសោធន៍ថ្មីៗបន្ថែមពីវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ តាមរយៈបទបង្ហាញរបស់វាគ្មិន ក៏ដូចជាការទស្សនាការដាក់តាំងបង្ហាញ និងពន្យល់បន្ថែមណោតាមបញ្ជរនីមួយៗនាឱកាសនេះ ជាពិសេសជំនាញដែលកំពុងមានតម្រូវក្នុងទីផ្សារការងារក្នុងពេលបច្ចុប្បន្ន និងទៅអនាគត ដើម្បីជាមូលដ្ឋានគ្រឹះមួយក្នុងការសម្រេចចិត្តជ្រើសរើសជំនាញមកសិក្សាឲ្យស្របតាមទីផ្សារការងារ។
លោកបានលើកយករបាយការណ៍មកបញ្ជាក់ថា លទ្ធផលនៃការផ្សព្វផ្សាយការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧ កន្លងទៅនេះ គឺយើងបានផ្តល់ព័ត៌មានដល់សិស្សានុសិស្ស យុវជន និងសាធារណជនទាំងថ្នាក់ជាតិ និងក្រោមជាតិបានចំនួនសរុប ៤៨.៦៩៣នាក់ ស្រី ១៩.៩១៨នាក់ តាមរយៈវេទិកាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ និងការចុះផ្សព្វផ្សាយតម្រង់ទិសវិជ្ជាជីវៈទៅដល់សិស្សានុសិស្សសាលាចំណេះទូទៅគ្រប់រាជធានី ខេត្ត ដោយផ្សព្វផ្សាយតាមខិតប័ណ្ណបានចំនួនសរុប ៨១.៤៩៧សន្លឹក បោះពុម្ពសៀវភៅព័ត៌មានទូទៅរបស់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ បានចំនួនសរុប ៣.៣០០ក្បាល។ បន្ថែមពីនេះទៅទៀត ក៏បានធ្វើការផ្សព្វផ្សាយតាមរយៈ វិទ្យុ ទូរទស្សន៍ សារព័ត៌មាន បណ្តាញសង្គម ការផលិតជាវីដេអូ និងមធ្យោបាយផ្សេងៗទៀត។
សម្រាប់ឆ្នាំ២០១៨ គិតត្រឹមឆមាសទី១ នេះ ការផ្សព្វផ្សាយការអប់រំបណ្តុះបណ្តាលបច្ចេកទេស និងវិជ្ជាជីវៈ គឺបានធ្វើការចុះផ្សព្វផ្សាយការអប់រំបណ្តុះបណ្តាលបច្ចេកទេស និងវិជ្ជាជីវៈផ្ទាល់ ជូនដល់សិស្សានុសិស្សសាលាចំណេះទូទៅ និងតាមភូមិភាគ និងការចុះតម្រង់ទិសវិជ្ជាជីវៈដល់សាលាចំណេះទូទៅដោយផ្ទាល់សរុប ៩.៧៤៣នាក់ ស្រី ៤.៦៥១នាក់ មានសាលាចំណេះទូទៅ (អនុវិទ្យាល័យ និងវិទ្យាល័យ ចំនួន ៥៥) និងបាន ផ្សព្វផ្សាយតាមរយៈការចែកខិត្តប័ណ្ណបានចំនួន ១២.៤៦៩ សន្លឹក និងការផ្សព្វផ្សាយតាមមធ្យោបាយផ្សេងៗទៀតជាដើម៕
Source: Kampuchea Thmey Daily
0 Comments