ព្រះសីហនុ ៖ កម្មករសំណង់ម្នាក់ បានស្លាប់ភ្លាមៗយ៉ាងអាណោចអាធ័មនៅកន្លែងកើតហេតុ ក្នុងហេតុការណ៍ដាច់ខ្សែគ្រែនដែកយោងសម្ភារៈសំណង់កម្ពស់១០ជាន់ ធ្លាក់សង្កត់ចំពីលើ។
ហេតុការណ៍បង្កការភ្ញាក់ផ្អើលនេះ បានកើតមានឡើងនៅវេលាម៉ោងប្រមាណជិត១០ព្រឹកថ្ងៃទី១៨ខែមិថុនា ឆ្នាំ២០១៨ នៅចំណុចការដ្ឋានសំណង់ តុង ហុកសេង ដែលមានទីតាំង អូរត្រេះ២ ស្ថិតក្រុម២ ភូមិ៦ សង្កាត់៤ ក្រុង-ខេត្តសីហនុ។ សមត្ថកិច្ចមូលដ្ឋាន ដែលចុះទៅពិនិត្យកន្លែងកើតហេតុ បានឲ្យដឹងថា ករណីនេះ បណ្តាលមកពីដាច់គ្រែនយោងសម្ភារៈពីក្រោមទៅលើ ហើយដាច់ធ្លាក់ចុះក្រោមសង្កត់លើ បណ្តាលឲ្យស្លាប់ភ្លាមៗ។
សមត្ថកិច្ចបានឲ្យដឹងទៀតថា ជនរងគ្រោះ ឈ្មោះ រឿន វាន្នី ភេទប្រុស អាយុ ៤១ឆ្នាំ ជនជាតិខ្មែរ មុខរបរ ជាងម៉ាស៊ីនផ្សារដែក នៅក្នុងការដ្ឋាន មានស្រុកកំណើត ភូមិទួលជ្រៃ ឃុំសំពៅលូន ស្រុកសំពៅលូន ខេត្តបាត់ដំបង បច្ចុប្បន្ន ស្នាក់នៅ ការដ្ឋានខាងលើ។ សពជនរងគ្រោះ ក្រោយពីកម្លាំងជំនាញពិនិត្យ និងធ្វើកោសល្យវិច័យរួច សមត្ថកិច្ចបានប្រគល់ជូនប្រពន្ធ ឈ្មោះ ផែ អៀង យកទៅធ្វើបុណ្យតាមប្រពៃណី នៅស្រុកកំណើត។ ចំណែកការទាមទារប្រាស់សំណងណាមួយនោះ ពេលនេះគេមិនទាន់ដឹងនៅឡើយទេ៕
Source: Kampuchea Thmey Daily
0 Comments