ភ្នំពេញ ៖ លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថានៅក្នុងប្រព័ន្ធសេដ្ឋកិច្ចកម្ពុជាបច្ចុប្បន្ន មានវិស័យសំខាន់ៗចំនួន១០ប្រភេទ ដែលនិយោជកពិបាកក្នុងការជ្រើសរើសកម្លាំងពលកម្ម។
ថ្លែងក្នុងពិធីបិទទិវាជាតិការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET Day) លើកទី១កាលពីរសៀលថ្ងៃទី១៦ ខែមិថុនា ឆ្នាំ២០១៨ នៅអគារពិព័រណ៍ពាណិជ្ជកម្មកោះពេជ្រ លោករដ្ឋមន្ត្រីបានបន្តថា វិស័យសំខាន់ៗទាំង១០រួមមាន៖ ១.វិស័យសណ្ឋាគារ និងការស្នាក់នៅ, ២.ឡូជីស្ទីក និងការដឹកជញ្ជូន, ៣.សុខាភិបាល, ៤.អប់រំ និងបណ្តុះបណ្តាល, ៥.កែច្នៃម្ហូបអាហារ និងភេសជ្ជៈ, ៦.ហិរញ្ញវត្ថុ និងធានារ៉ាប់រង, ៧.ព័ត៌មានវិទ្យា, ៨.សំណង់, ៩.វាយនភណ្ឌ កាត់ដេរសម្លៀកបំពាក់ និងផលិតស្បែកជើង និង១០.ផលិតកម្មកៅស៊ូ និងប្លាស្ទិក។
តាមលទ្ធផលអង្កេតមួយដែលធ្វើឡើងកាលពីឆ្នាំ២០១៧កន្លងទៅដែលបានផ្សាយកាលពីថ្មីៗនេះបានបង្ហាញថា កត្តាចម្បងដែលនាំឱ្យនិយោជកជួបប្រទះការលំបាកក្នុងការជ្រើសរើសកម្លាំងពលកម្ម គឺបណ្តាលមកពីបេក្ខជនគ្មានជំនាញបច្ចេកទេសតាមតម្រូវការ, មានការប្រកួតប្រជែងខ្លាំងក្នុងចំណោមនិយោជកក្នុងការជ្រើសរើស, កង្វះបទពិសោធន៍ការងារ, និងបេក្ខជនដាក់ពាក្យស្វែងរកការងារមានចំនួនតិច។ ជំនាញសំខាន់ៗដែលអ្នកស្វែងរកការងារមានការខ្វះខាត រួមមាន៖ ជំនាញភាសាបរទេស, ជំនាញបច្ចេកទេស, ការបម្រើសេវាអតិថិជន, ការនិយាយស្តី, ការបំពេញការងារជាក្រុម, ការដោះស្រាយបញ្ហា និងការប្រើប្រាស់បច្ចេកវិទ្យាព័ត៌មាន។
លទ្ធផលនេះ បានបង្ហាញឱ្យឃើញថា ភាពមិនស៊ីគ្នានៃជំនាញនៅក្នុងទីផ្សារការងារកម្ពុជាបច្ចុប្បន្ន បណ្តាលមកពីកង្វះជំនាញរបស់អ្នកស្វែងរកការងារ និងទីផ្សារការងារពុំទាន់ដំណើរការប្រកបដោយប្រសិទ្ធភាព។
លើសពីនេះ លទ្ធផលអង្កេតក៏បានបង្ហាញឱ្យឃើញថា កម្មករនិយោជិតដែលកំពុងបំពេញការងារបច្ចុប្បន្នក៏ជួបប្រទះនូវគម្លាតជំនាញដែរ ពោលគឺមិនមានជំនាញគ្រប់គ្រាន់ សម្រាប់បំពេញតាមតម្រូវការការងារ នៃមុខតំណែងការងារដែលខ្លួនកំពុងធ្វើ។ ក្នុងចំណោមបញ្ហាដែលនាំឱ្យកើតមានឡើងនូវគម្លាតជំនាញនេះ គឺដោយសារកម្មករនិយោជិត ទើបតែចូលកាន់មុខតំណែងការងារ និងការបណ្តុះបណ្តាលមិនត្រូវបានបញ្ចប់ពេញលេញ។
លោករដ្ឋមន្ត្រីបានឱ្យដឹងថា ក្នុងមួយឆ្នាំៗកម្ពុជាមានកំណើនប្រជាពលរដ្ឋគ្រប់អាយុចូលធ្វើការប្រមាណ ៣សែននាក់ ប៉ុន្តែអ្នកស្វែងរកការងារធ្វើមួយចំនួនជួបការលំបាក ឬមិនអាចរកការងារធ្វើបាន ឬធ្វើការងារដែលមិនត្រូវនឹងជំនាញ ឬមិនពេញចិត្ត។ រីឯនិយោជកវិញ ក៏ជួបប្រទះការរាំងស្ទះមិនអាចអនុវត្តតាមផែនការផលិតកម្ម ការពង្រីកអាជីវកម្ម ការប្រើប្រាស់នូវបច្ចេកវិទ្យាថ្មី ឬផលិតភាពទាបជាដើម។
បើតាមទស្សនវិស័យការងារកម្ពុជាឆ្នាំ២០១៨ បានបង្ហាញអំពីការវិវត្តរបស់ទីផ្សារការងារនៅកម្ពុជា ដោយផ្តោតសំខាន់ទៅលើឱកាសការងារតាមប្រភេទនៃមុខរបរ រួមមាន៖ វិស្វករឧស្សាហកម្មនិងផលិតកម្ម, វិស្វករទូរគមនាគមន៍, អ្នកឯកទេសផ្នែកវិទ្យុសាស្ត្រ និងថតកាំរស្មីអ៊ិច, អ្នកបកប្រែអត្ថបទនិងអ្នកបកប្រែផ្ទាល់មាត់, អ្នកបច្ចេកទេសផ្នែកសេវាគាំទ្រព័ត៌មានវិទ្យា, វិស្វករគីមី, អ្នកបញ្ជាម៉ាស៊ីនចំហ៊ុយទឹក, ជាងធ្វើកញ្ចក់, ជាងដំឡើងបំពង់ទុយោ និងបំពង់បង្ហូរ និងអ្នកដំឡើងម៉ាស៊ីនយានយន្ត។ ជារួម ឱកាសការងារល្អភាគច្រើនទាមទារឱ្យមានជំនាញមធ្យម និងខ្ពស់ ពិសេសអ្នកទទួលបានការបណ្តុះបណ្តាលបច្ចេកទេស និងវិជ្ជាជីវៈកម្រិតសញ្ញាបត្របច្ចេកទេស និងវិស្វករ។
លោកបណ្ឌិតអ៊ិត សំហេង បានបញ្ជាក់ថា កម្ពុជា គឺជាប្រទេសដែលមានប្រជាជនវ័យក្មេង ហើយឈានដល់អាយុចូលធ្វើការក្នុងចំនួនយ៉ាងច្រើនប្រមាណ ៣ សែននាក់ក្នុងមួយឆ្នាំៗ។ និន្នាការបែបនេះនឹងបន្តក្នុងរយៈពេលវែងទៅមុខទៀតយ៉ាងហោចក៏ក្នុងរង្វង់៣ទសវត្សរ៍ទៀត។
ទោះបីជាកត្តាប្រជាសាស្ត្របែបនេះ បានផ្តល់នូវផលលាភដល់កម្ពុជា ប៉ុន្តែក្នុងពេលទន្ទឹមគ្នា វាក៏ជាសម្ពាធដ៏ធ្ងន់ធ្ងរមួយក្នុងការបង្កើតការងារថ្មីបានច្រើនគ្រប់គ្រាន់សម្រាប់ ប្រជាពលរដ្ឋទាំងអស់នេះ។ ដូចយើងទាំងអស់គ្នា បានដឹងស្រាប់ហើយថាសម្រាប់ប្រជាពលរដ្ឋភាគច្រើន កម្លាំងពលកម្មគឺជាទ្រព្យដែលបង្កើតចំណូល ដ៏ចម្បងបំផុតរបស់ខ្លួន។
ចំពោះសេដ្ឋកិច្ចជាតិវិញ កម្លាំងពលកម្ម គឺជាកត្តាផលិតកម្មដ៏សំខាន់នៅក្នុងគ្រប់វិស័យ។ ដូច្នេះប្រសិនបើកម្លាំងពលកម្មគ្មានការងារធ្វើ គឺជាការខាតបង់ដ៏ធ្ងន់ធ្ងរសម្រាប់ប្រជាពលរដ្ឋម្នាក់ៗ និងសង្គមជាតិទាំងមូល ដោយសារប្រជាពលរដ្ឋយើងមិនអាចទាញយកផលពីប្រភពទ្រទ្រង់ជីវភាពដ៏សំខាន់នេះ ដែលបណ្តាលឱ្យប្រជាពលរដ្ឋមួយចំនួននិងគ្រួសាររបស់ខ្លួន មិនអាចងើបផុតពីភាពក្រីក្រឬអាចធ្លាក់ទៅក្នុងភាពក្រីក្រវិញ ហើយរីឯសេដ្ឋកិច្ចជាតិវិញមិនបានប្រើប្រាស់ធនធានកម្លាំងពលកម្មទាំងនេះ ដើម្បីរួមចំណែកក្នុងផលិតកម្មទំនិញ និងសេវាឡើយ។
លោកបានបន្ថែមថា ក្នុងរយៈពេលល១អាណាតិ្តចុងក្រោយនេះ ក្រសួងការងារបានខិតខំធ្វើការកែទម្រង់ស៊ីជម្រៅ លើផ្នែកអប់រំបណ្តុះបណ្តាលបច្ចេកទេស និងវិជ្ជាជីវៈ ពង្រឹងភាពជាដៃគូរវាងរដ្ឋ និងឯកជន ដើម្បីចូលរួមការគាំទ្រក្នុងការអភិវឌ្ឍជំនាញនៅកម្ពុជា ឲ្យឆ្លើយតបទៅនឹងតម្រូវការទីផ្សារការងារទាំងក្នុងស្រុក និងតំបន់។
ថ្មីៗនេះ រាជរដ្ឋាភិបាលបាននដាក់ឲ្យអនុវត្តនូវនយោបាយជាតិ ស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០២៥ ដែលផ្តោតអាទិភាពលើការពង្រឹងគុណភាព ការបង្កើនលទ្ធភាពទទួលបានការបណ្តុះបណ្តាល ប្រកបដោយសមធម៌ ការលើកទឹកចិត្តភាពជាដៃគូរវាងរដ្ឋ និងឯកជន និងការលើកកម្ពស់អភិបាលកិច្ច ក្នុងប្រព័ន្ធអប់រំបណ្តុះបណ្តាលបច្ចេកទេស និងវិជ្ជាជីវៈ ដែលគោនយោបាយជាតិនេះ មានចក្ខុវិស័យលើកកម្ពស់ជីវភាពរស់នៅ សេចក្តីថ្លៃថ្នូររបស់ប្រជាពលរដ្ឋ បង្កើនបាននូវកម្លាំងពលកម្ម ឬធនធានមនុស្សកម្ពុជា ប្រកបដោយចំណេះដឹង សមត្ថភាព ជំនាញ ឥរិយាបថការងារ សីលធម៌វិជ្ជាជីវៈ ផលិតភាពខ្ពស់ និងមានលក្ខណៈប្រកួតប្រជែងសម្រាប់ការងារពេញមួយជីវិត៕
Source: Kampuchea Thmey Daily
0 Comments