អធិការនគរបាលស្រុកក្រឡាញ់ បញ្ជាក់ពីករណីគ្រោះថ្នាក់ចរាចរណ៍ ដែលធ្វើឲ្យខូចខាតរថយន្ត៤គ្រឿង ស្លាប់ម្នាក់ របួស៧នាក់

សៀមរាប ៖ លោកវរសេនីយ៍ឯក ជី បេងជន អធិការនគរបាលស្រុកក្រឡាញ់ បានមានប្រសាសន៍ថា នៅរសៀលថ្ងៃទី១៧ ខែមិថុនា ឆ្នាំ២០១៨ បន្ទាប់ពីទទួលបានព័ត៌មាន អំពីករណីគ្រោះថ្នាក់ចរាចរណ៍កើតឡើងនៅចំណុចគល់ស្ពានក្នុងឃុំក្រឡាញ់រួចមក លោកក៏បាននាំកម្លាំងជំនាញចុះទៅដល់កន្លែងហេតុ ឃើញរថយន្តចំនួន៤គ្រឿង បានរងការខូចខាត គឺទី១ម៉ាកកាមរីឆ្លាម , ទី២ម៉ាកលុចស៊ីស RX330 ទី៣ ម៉ាកហាយឡែនឌ័រ ទី៤រថយន្តកូរ៉េដឹកជ្រូក និងមានមនុស្សប្រុសស្រីបានទទួលរងរបួសធ្ងន់ស្រាល ហើយក៏បានចាត់ចែងឲ្យជួយដឹកជញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យបង្អែកស្រុកក្រឡាញ់ ខណៈពេលនោះបានទទួលព័ត៌មានពីសាក្សីនៅកន្លែងហេតុ ដែលពួកគាត់អះអាងថា រថយន្តដែលបង្កនោះ គឺរថយន្តកូរ៉េដឹកជ្រូក។

លោកបានមានប្រសាសន៍ទៀតថា បន្ទាប់ពីបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យរួចហើយ លោកបានចាត់ចែងឲ្យមន្ត្រីជំនាញសាកសួរព័ត៌មានលម្អិតពីជនរងគ្រោះ ហើយជនរងគ្រោះបានបញ្ជាក់ថា ករណីគ្រោះថ្នាក់ចរាចរណ៍ដែលកើតឡើងនៅទីកន្លែងតែមួយនេះ គឺកើតឡើងចំនួន២លើក ដោយខុសពេលវេលាគ្នាប្រមាណ១០នាទី។

លោកអធិការនគរបាលស្រុកក្រឡាញ់ មានប្រសាសន៍ទៀតថា តាមការបញ្ជាក់របស់ឈ្មោះ កែវ សារ៉ាវី ភេទប្រុស ឆ្នាំកំណើត១៩៩៨ មានទីលំនៅភូមិត្រពាំងរូង ឃុំត្រពាំងរូង ស្រុកកោះកុង ខេត្តកោះកុង ដែលជាអ្នកបើកបររថយន្តម៉ាក Rayno ពណ៌ស ពាក់ស្លាកលេខ ភ្នំពេញ 3C-5299 ប្រភេទភ្លៅ២ បានឆ្លើយបំភ្លឺថា ខ្លួនជាអ្នកបើកឡានឯកជនដឹកជ្រូកចំនួន៥៣ក្បាល របស់ក្រុមហ៊ុន CP ដឹកចេញពីជើងភ្នំគូលែន ដោយបើកបរតាមផ្លូវជាតិលេខ៦ ពីទិសខាងកើត ទៅទិសខាងលិច ពេលដល់កន្លែងកើតហេតុ វេលាម៉ោងប្រមាណ ១និង៥០ នាទីរសៀល រថយន្តរបស់ខ្លួនបានដាច់រ៉ូទីល ក៏រេ ចង្កូចទៅខាងស្តាំដៃ ហើយបុកប៉ះដៃស្ពានកក់ឆ្មាខាងស្តាំតែម្តង រួចរថយន្តបានត្រឡប់ទៅខាងឆ្វេងដៃនៅខាងត្បូងផ្លូវជាតិ៦ ខាងលិចស្ពានកក់ឆ្មា ស្ថិតក្នុងភូមិត្រពាំងច្រាំង ឃុំក្រឡាញ់ ក្នុងនោះជ្រូកបានងាប់ចំនួន ០៤ក្បាល។

លោកវរសេនីយ៍ឯកជី បេងជន មានប្រសាសន៍បញ្ជាក់ទៀតថា បន្ទាប់មក នៅវេលាម៉ោងប្រមាណ២រសៀល មានករណីគ្រោះថ្នាក់ចរាចរណ៍នៅខាងកើតស្ពានកក់ឆ្មានេះម្ដងទៀត ប្រហែល១០០ម៉ែត្រ ស្ថិតក្នុងភូមិតាច្រែង ឃុំក្រឡាញ់ ដែលរថយន្តបុកគ្នាចំនួន៣គ្រឿង។ បន្ទាប់ពីធ្វើការវាស់វែងបានឲ្យដឹងថា ពីដំបូងមានរថយន្តម៉ាក HIGHT LANDER ពាក់ស្លាកលេខ ភ្នំពេញ 2AG-6692 ពណ៌ទឹកប្រាក់ ( ខូចខាតធ្ងន់) បើកបរដោយជនមិនស្គាល់អត្តសញ្ញាណ ព្រោះក្រោយពីគ្រោះថ្នាក់គេចខ្លួនបាត់ បើកបរក្នុងទិសដៅពីលិចទៅកើត បានរេចង្កូចទៅខាងឆ្វេងដៃ បុកជាមួយរថយន្តម៉ាក TOYOTA CAMERY (ឆ្លាម) ពាក់ស្លាកលេខ ភ្នំពេញ2G-4484 ពណ៌ទឹកមាស ( ខូចខាតធ្ងន់) បើកបរដោយជនមិនស្គាល់អត្តសញ្ញាណ ព្រោះបានរងរបួសធ្ងន់មិនអាចសួរនាំបាន បើកបរក្នុងទិសដៅពីកើតទៅលិច ហើយរថយន្តHIGHTLANDER បានវិលទៅបុកជាមួយរថយន្តម៉ាក LEXUS RX330 ពាក់ស្លាកលេខ ភ្នំពេញ 2AQ-0202 ពណ៌ទឹកមាស (ខូចខាតស្រាល ) បើកបរដោយឈ្មោះ គី ចំរើន អាយុ៣២ឆ្នាំ មានទីលំនៅភូមិតាវៀន សង្កាត់សាលាកំរើក ក្រុងសៀមរាប កំពុងបើកបរពីក្រោយរថយន្តម៉ាក TOYOTACAMERY ក្នុងទិសដៅស្របគ្នា។

លោកបានបញ្ជាក់ទៀតថា ក្នុងហេតុការណ៍នេះ បណ្តាលឲ្យមនុស្សរងរបួសស្រាលចំនួន ០៣នាក់ , របួសធ្ងន់ចំនួន ៤នាក់ និងស្លាប់ ០១នាក់ ក្នុងនោះមាន៖ ១. ឈ្មោះ ស្រី មុំ ភេទ ស្រី មានទីលំនៅភូមិ ថ្នល់កែង ឃុំស្ពានត្នោត ស្រុកជីក្រែង ខេត្តសៀមរាប បានរងរបួសស្រាល , ២.ឈ្មោះ សូ ណាង ភេទ ប្រុស អាយុ២៧ឆ្នាំ មានទីលំនៅភូមិថ្នល់ ឃុំគោកធ្លកលើ ស្រុកជីក្រែង បានរងរបួសស្រាល , ៣. ឈ្មោះ លុយ សេវ ភេទប្រុស អាយុ២៩ឆ្នាំ មានទីលំនៅភូមិស្វាយពក ឃុំគោកធ្លកលើ ស្រុកជីក្រែង បានរងរបួសស្រាល , ៤.ឈ្មោះ គាំ ហា ភេទស្រី អាយុ៤៨ឆ្នាំ មានទីលំនៅភូមិធ្លក ឃុំត្រាំសសរ ស្រុក ស្រីស្នំ ខេត្តសៀមរាប បានរងរបួសធ្ងន់ , ៥.ឈ្មោះ គាំ ស៊ីឡាង ភេទស្រី អាយុ៣៥ឆ្នាំ មានទីលំនៅភូមិធ្លក ឃុំត្រាំសសរ បានរងរបួសធ្ងន់ , ៦.ឈ្មោះ សិម តឿន ភេទប្រុស អាយុ៤៣ឆ្នាំ មានទីលំនៅភូមិស្វាយពក ឃុំគោកធ្លកលើ ស្រុកជីក្រែង បានរងរបួសធ្ងន់ , ៧. ឈ្មោះ ជិន សៅ ភេទប្រុស អាយុ ២១ឆ្នាំ មានទីលំនៅភូមិគោកក្រោល ឃុំស្រះជីក ស្រុកភ្នំស្រុក ខេត្តបន្ទាយមានជ័យ បានរងរបួសធ្ងន់ និង ៨.ឈ្មោះ សៀវ ភេទប្រុស មានទីលំនៅភូមិតាភ្ងា ឃុំគោកធ្លកលើ ស្រុកជីក្រែង បានរងគ្រោះរហូតដល់ស្លាប់នៅមន្ទីរពេទ្យ។

ចំពោះរថយន្ត ខាងជំនាញបានយកមករក្សាទុកនៅអធិការដ្ឋាននគរបាលស្រុកក្រឡាញ់ ដើម្បីចាត់ការតាមនីតិវិធី៕