បង្ខំរំលោភប្អូនថ្លៃស្រី សម្រេច២លើក ទើបផ្ទុះរឿងត្រូវម្តាយក្មេកប្តឹង
បាត់ដំបង ៖ បុរសម្នាក់ដែលមានភរិយាទៅហើយនោះ ត្រូវបានសមត្ថកិច្ចធ្វើការឃាត់ខ្លួន បន្ទាប់ពីមានការផ្ទុះនូវរឿងអាស្រូវមួយ គឺដោយសារតែបុរសរូបនេះអត់ទ្រាំនឹងសម្រស់របស់ប្អូនថ្លៃមិនបាន ក៏បានបង្ខំចិត្តចាប់រំលោភរហូតបានសម្រេចជាបន្តបន្ទាប់ចំនួន ២ លើកទាំងនាងកំពុងស្ថិតក្នុងវ័យជាអនីតិជននៅឡើយ។
យោងតាមពាក្យបណ្តឹងរបស់ស្ត្រីជាម្តាយ ដែលបានប្តឹងទៅសមត្ថកិច្ច កាលពីរសៀលថ្ងៃទី៧ ខែមិថុនា ឆ្នាំ២០១៨ ដោយបានរៀបរាប់ និងធ្វើការចោទប្រកាន់ទៅលើកូនប្រសារបស់ខ្លួន ឈ្មោះ ឌី សាវឿត ហៅទយ ភេទប្រុស អាយុ៣៣ឆ្នាំ រស់នៅភូមិអូរស្រឡៅ ឃុំភ្នំព្រឹក ស្រុកភ្នំព្រឹក ខេត្តបាត់ដំបង មានមុខរបរជាជាងជួសជុលម៉ូតូថា បានចាប់បង្ខំរំលោភទៅលើកូនស្រីរបស់ខ្លួន ឈ្មោះស៊ីន សម្ផស្ស ហៅលីន អាយុ១៣ឆ្នាំ រហូតបានសម្រេចចំនួន២លើក នាពេលកន្លងមក។
ក្រោយពីមានការឯកភាពពីលោកស្នងការ អ៊ុច សុខុន និងមានការសម្របសម្រួលពីលោកព្រះរាជអាជ្ញា នួន សាន រួចមក នៅថ្ងៃទី៨ ខែមិថុនា ឆ្នាំ២០១៨ វេលាម៉ោង៣និង៣០នាទី កម្លាំងអធិការដ្ឋាន នគរបាលស្រុកភ្នំព្រឹក បានចុះសហការជាមួយកម្លាំងប៉ុស្តិ៍នគរបាលរដ្ឋបាលភ្នំព្រឹក ធ្វើការឃាត់ខ្លួន ជនសង្ស័យខាងលើ ដើម្បីនាំយកមកសាកសួរនៅអធិការដ្ឋាន។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានចាប់រំលោភប្អូនថ្លៃបាន២ដងមែន ដោយលើកទី១ នៅថ្ងៃទី២១ ខែមេសា ឆ្នាំ២០១៨ និងលើកទី២ នៅថ្ងៃទី១៩ ខែមីនា ឆ្នាំ២០១៨ ដោយសារតែអត់ទ្រាំនឹងសម្រស់របស់នាងមិនបាន និងស្របពេលដែលស្ងាត់កំបាំងផង។
បច្ចុប្បន្នករណីនេះសមត្ថកិច្ចបាន និងកំពុងកសាងសំណុំរឿង ក្នុងការបញ្ជូនខ្លួនជនសង្ស័យទៅសាលាដំបូងខេត្តបាត់ដំបង ដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments