សៀមរាប ៖ នារសៀលថ្ងៃទី១៤ ខែមិថុនា ឆ្នាំ២០១៨ លោកឧត្តមសេនីយ៍ឯក ឆាយ គឹមខឿន ប្រធានសេនាធិការនៃអគ្គស្នងការដ្ឋាននគរបាលជាតិ អមដំណើរដោយលោកឧត្តមសេនីយ៍ត្រីទិត្យណារ៉ុង ស្នងការនគរបាលខេត្ត និងបណ្តាអស់លោកស្នងការរង បានអញ្ជើញចុះត្រួតពិនិត្យកងកម្លាំងនគរបាលអន្តរាគមន៍ពិសេសចំនួន២០០នាក់របស់ស្នងការដ្ឋាននគរបាលខេត្តសៀមរាប។
នៅក្នុងពិធីត្រួតពិនិត្យនោះ លោកឆាយ គឹមខឿន ប្រធានសេនាធិការ បានពាំនាំនូវប្រសាសន៍ផ្ដាំផ្ញើសាកសួរសុខទុក្ខពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិផ្តាំសួរសុខទុក្ខដល់កងកម្លាំង។
លោកក៏បានមានមតិណែនាំផងដែរ ដល់កងកម្លាំងនគរបាលអន្តរាគមន៍ទាំងអស់ ត្រូវបង្កើនការយកចិត្តទុកដាក់គោរពវិន័យរបស់កងកម្លាំងនគរបាលជាតិកម្ពុជា កម្លាំងទាំងអស់ ត្រូវបន្តខិតខំប្រឹងប្រែងហាត់ពត់លត់ដំសិក្សារៀនសូត្រនូវវិជ្ជាជីវៈជំនាញ និងគោរពនូវវិន័យការចាត់តាំងក្រមសីលធម៌វិជ្ជាជីវៈជានគរបាលជាតិឲ្យបានខ្ជាប់ខ្ជួន និងត្រៀមប្រចាំការ២៤ម៉ោងលើ២៤ម៉ោងក្នុងករណីចាំបាច់ដើម្បីចេញជួយអន្តរាគមន៍រាល់សភាពការណ៍ ដែលកើតមានឡើងជាយថាហេតុ ក៏ដូចជាការបង្ការទប់ស្កាត់ និងបង្ក្រាបនូវបទល្មើសគ្រប់ប្រភេទរក្សាបាននូវសន្តិសុខសុវត្ថិភាពជូនប្រជាពលរដ្ឋ និងជូនជាតិមាតុភូមិយើងផងដែរ។
នៅក្នុងពិធីនោះ លោកបានមានប្រសាសន៍សង្កត់ធ្ងន់ចំពោះកិច្ច ការពារថែរក្សា សន្តិសុខ សុវត្ថិភាព សណ្ដាប់ធ្នាប់សាធារណៈសម្រាប់កិច្ចដំណើរការបោះឆ្នោតជ្រើសរើសតំណាងរាស្ត្រ នីតិកាលទី ៦ នៅថ្ងៃទី២៩ ខែកក្កដា ឆ្នាំ២០១៨នាពេលខាងមុខនេះ។
ទន្ទឹមនឹងនេះ លោកក៏បានសំដែងការកោតសរសើរផងដែរចំពោះកងកម្លាំងនគរបាលយើងទាំងអស់ក្នុងខេត្តដែលរយៈកាលកន្លងមកបានខិតខំប្រឹងប្រែងក្នុងការអនុវត្តនូវតួនាទីភារកិច្ចជំនាញរបស់ខ្លួនក្នុងការរក្សាសន្តិសុខសុវត្ថិភាពនិងសណ្ដាប់ធ្នាប់បានយ៉ាងល្អប្រសើរជូនដល់ប្រជាពលរដ្ឋ ក៏ដូចជាគណៈប្រតិភូជាន់ខ្ពស់ជាតិអន្តជាតិ និងភ្ញៀវទេសចរជាតិ និងអន្តរជាតិនៅក្នុងខេត្តកន្លងមកនេះ។
លោកក៏បានផ្ដាំផ្ញើសូមឲ្យកម្លាំងទាំងអស់ត្រូវបង្កើនសាមគ្គីភាពឯកភាពផ្ទៃក្នុងល្អទើបឈានទៅសម្រេចជោគជ័យលើការងារបានល្អប្រសើរ និងមានតម្លាភាព។
ក្នុងពិធីត្រួតពិនិត្យនេះផងដែរ លោកឆាយ គឹមខឿនក៏បានអញ្ជើញទៅត្រួតពិនិត្យមើលអគារស្នាក់នៅរបស់កងកម្លាំងនគរបាលអន្តរាគមន៍ដែលស្ថិតនៅក្នុងបរិវេណស្នងការដ្ឋាននគរបាលខេត្តផងដែរ៕
Source: Kampuchea Thmey Daily
0 Comments