សៀមរាប ៖ កាលពីរសៀលថ្ងៃទី១៤ ខែមិថុនា ឆ្នាំ២០១៨ នៅទីស្នាក់ការគណបក្សប្រជាជនកម្ពុជាខេត្ត បានធ្វើកិច្ចប្រជុំ បូកសរុបលទ្ធផលការងារ ចុះជួយមូលដ្ឋានក្រុង ស្រុក ក្នុងខេត្តសៀមរាប ក្រោមអធិបតីភាពសម្តេចពិជ័យសេនា ទៀ បាញ់ សមាជិកគណៈអចិន្ត្រៃយ៍ គណៈកម្មាធិការកណ្តាល នៃគណបក្សប្រជាជនកម្ពុជា និងជាប្រធានក្រុមការងារថ្នាក់ជាតិ ចុះជួយខេត្តសៀមរាប ដែលធ្វើឡើងនៅទីស្នាក់ការគណបក្សប្រជាជនខេត្ត។
មានប្រសាសន៍ក្នុងកិច្ចប្រជុំនោះ សម្តេចពិជ័យសេនា ទៀ បាញ់ ក៏បានលើកឡើងផងដែរ នូវគោលការណ៍របស់គណបក្សប្រជាជនកម្ពុជា ដើម្បីទុកជាត្រីវិស័យ ចង្អុលបង្ហាញដល់ក្រុមការងារគ្រប់ថ្នាក់យកទៅអនុវត្ត ទាំងថ្នាក់ជាតិ ថ្នាក់ខេត្ត នៅតាមបណ្តាក្រុង ស្រុក ឃុំ សង្កាត់ និង បានក្រើនរំលឹកដល់ក្រុមការងារគ្រប់លំដាប់ថ្នាក់ បន្តការយកចិត្តទុកដាក់គ្រប់គ្រង-កសាងបន្ថែមកម្លាំងសកម្មជនប្រកបដោយសមត្ថភាព ពង្រឹង និងពង្រីកសមាជិកភាពរបស់ខ្លួននៅតាមមូលដ្ឋាន និង ក្តាប់ឲ្យបាននូវរាល់សតិអារម្មណ៍របស់សមាជិក និង ប្រជាពលរដ្ឋក្នុងដែនសមត្ថកិច្ចរបស់ខ្លួន ដើម្បីឆ្ពោះទៅរកភាពជោគជ័យ នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែ កក្កដា ឆ្នាំ២០១៨ ខាងមុខ។ សម្តេចពិជ័យសេនា ក៏បានបញ្ជាក់ថា ការអនុវត្តភារកិច្ច តួនាទីរបស់ខ្លួន មន្ត្រីគណបក្សប្រជាជនកម្ពុជា ត្រូវធានាឲ្យខាងតែបាននូវប្រសិទ្ធភាព និរន្តរភាព ក្នុងការគ្រប់គ្រងរដ្ឋបាលឃុំ សង្កាត់ និង ការអភិវឌ្ឍមូលដ្ឋាន ការផ្តល់សេវា និង ការដោះស្រាយរាល់បញ្ហាផ្សេងៗជូនប្រជាពលរដ្ឋ ហើយបញ្ហាប្រឈមនានាដែលនៅសេសសល់ពីមុនមក ត្រូវបន្តដោះស្រាយជូនប្រជាពលរដ្ឋ ស្របតាមលិខិតបទដ្ឋានគតិយុត្តិនៃច្បាប់ ឲ្យបានទាន់ពេលវេលា។ ជាមួយគ្នានេះ សម្តេចពិជ័យសេនា ទៀ បាញ់ ក៏បានជំរុញផងដែរ ដល់ក្រុមការងារចុះមូលដ្ឋាន ត្រូវបន្តនូវប្រពៃណីរបស់គណបក្សប្រជាជនកម្ពុជា រួមគ្នាជួយដោះស្រាយរាល់ទុក្ខលំបាក និង សំណូមពររបស់ប្រជាពលរដ្ឋ។ ក្នុងនោះសម្តេចពិជ័យសេនា ក៏បានលើកឡើងអំពីស្ថានការណ៍នយោបាយក្នុង និង ក្រៅប្រទេស សំខាន់ ចំពោះរាល់ល្បិចកលរបស់ក្រុមជនអគតិមួយចំនួន ដែលបានធ្វើការបំភិតបំភ័យ និង ឃោសនាអកុសលមិនឲ្យ ប្រជាជន ទៅចូលរួមការបោះឆ្នោតនៅថ្ងៃខាងមុខនេះ។ ក្នុងនោះសម្តេចក៏បានធ្វើការជំរុញដល់អាជ្ញាធរ សមត្ថកិច្ចគ្រប់ ក្រុង ស្រុក បង្កើនការយកចិត្តទុកដាក់លើការងារសន្តិសុខ សណ្តាប់ធ្នាប់សាធារណៈ សំខាន់ក្នុងឱកាសដែលគ្រប់ គណបក្សនយោបាយ ធ្វើការឃោសនារកសំឡេងគាំទ្រគណបក្សខ្លួន និង នៅថ្ងៃបោះឆ្នោត នាថ្ងៃទី២៩ ខែកក្កដា ឆ្នាំ២០១៨ ដើម្បីកុំឲ្យមានកើតនូវអំពើហិង្សា សំខាន់លើសុវត្ថិភាពចរាចរណ៍ក្នុងពេលដែលពួកគាត់អញ្ជើញទៅកាន់ ការិយាល័យបោះឆ្នោត ក្នុងការធានាសុវត្ថិភាពដល់ពួកគាត់ផងដែរ។ ក្នុងនោះសម្តេចពិជ័យសេនា ទៀ បាញ់ ក៏ ធ្វើការថ្លែងអំណរគុណ ដល់ឯកឧត្តម លោកឧកញ៉ា លោកជំទាវ និង អស់លោក លោកស្រី ដែលបានបរិច្ចាគទ្រព្យផ្ទាល់ ខ្លួន ក្នុងការគាំទ្ររាល់សកម្មភាព នៃការអភិវឌ្ឍលើគ្រប់ហេដ្ឋារចនាសម្ព័ន្ធ នៅតាមមូលដ្ឋានភូមិ ឃុំសង្កាត់ របស់ គណបក្សប្រជាជនកម្ពុជា។ ព្រមទាំងបានធ្វើការក្រើនរំលឹកដល់គ្រប់ក្រុង ស្រុក ត្រូវធ្វើការ ណែនាំដល់គ្រប់គណបក្សឃុំ សង្កាត់ ធ្វើការគ្រប់គ្រង និង ពង្រឹងពង្រីកសមាជិកភាពរបស់ខ្លួននៅតាមមូលដ្ឋាន ដើម្បីឆ្ពោះទៅរកភាពជោគជ័យ នៃការបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ខាងមុខ និងត្រូវបន្តការអនុវត្តនូវតួនាទី ភារកិច្ច ដើម្បីធានាឲ្យខាងតែបាននូវប្រសិទ្ធភាព និរន្តរភាព។
ក្នុងឱកាសនោះដែរ ក៏មានការប្រគល់លិខិតថ្លែងអំណរគុណ ដល់ឯកឧត្តម លោកឧកញ៉ា លោកជំទាវ និង អស់ លោក លោកស្រី ដែលបានបរិច្ចាគទ្រព្យផ្ទាល់ខ្លួន ក្នុងការគាំទ្ររាល់សកម្មភាពនៃការអភិវឌ្ឍ៕
Source: Kampuchea Thmey Daily
0 Comments