កណ្តាល ៖ មុខសញ្ញាចេញពីពន្ធនាគារម្នាក់ ត្រូវនគរបាលស្រុកស្អាងចាប់ខ្លួន ខណៈធ្វើសកម្មភាពជួញដូរគ្រឿងញៀន នៅថ្ងៃ ព្រហស្បតិ៍ ០៩រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០៧ ខែ មិថុនា ឆ្នាំ២០១៨ វេលាម៉ោង ១១និង០០នាទី នៅចំណុច ភូមិ ត្រពាំងឈូក ឃុំព្រែកគយ ស្រុកស្អាង ខេត្តកណ្តាល។
លោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា ជនសង្ស័យ ឃាត់ខ្លួនឈ្មោះ លី យ៉ាក់កូប ភេទប្រុស អាយុ២៩ឆ្នាំ ជនជាតិ ខ្មែរឥស្លាម មុខរបរស៊ីឈ្នួលកាប់គោ ទីលំនៅបច្ចុប្បន្នភូមិ បារ៉ែនក្រោម ឃុំស្វាយប្រទាល ស្រុកស្អាង ខេត្តកណ្តាល ធ្លាប់ជាប់ពន្ធនាគារខេត្តកណ្តាល រយៈពេល០១ឆ្នាំ ពីបទរក្សាទុកគ្រឿងញៀនខុសច្បាប់ នៅឆ្នាំ២០១៦។ វត្ថុតាងចាប់យករួមមាន ១/ ម្សៅក្រាម ពណ៌សថ្លា សង្ស័យថា ជាសារធាតុញៀន(ម៉ាទឹកកក) ចំនួន០៤កញ្ចប់តូច។ ២ / ឧបករណ៍សម្រាប់វេចខ្ចប់ និង ប្រើប្រាស់គ្រឿងញៀនមួយចំនួន។
លោកអធិការបញ្ជាក់ថា នៅថ្ងៃទីខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋថា មានករណីជួញដូរគ្រឿងញៀន នៅចំណុចកើតហេតុខាងលើ។ ភ្លាមនោះកម្លាំងផ្នែកប្រឆាំងបទល្មើសគ្រឿងញៀន បានចុះដល់ចំណុចកើតហេតុ ធ្វើការត្រួតពិនិត្យ ជនសង្ស័យឈ្មោះ លី យ៉ាក់កូប បានរកឃើញម្សៅក្រាមពណ៌សថ្លាសង្ស័យជា សារធាតុញៀន(ម៉ាទឹកកក) ចំនួន ០៣កញ្ចប់តូច នៅនឹងខ្លួន រួចឃាត់ខ្លួនជនសង្ស័យ រួមនឹងវត្ថុតាង ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ លី យ៉ាក់កូប បានសារភាពថា ខ្លួនបានទិញគ្រឿងញៀន(ម៉ាទឹកកក)ចំនួន ០១កញ្ចប់ តម្លៃ ៤០,០០០៛ (បួនម៉ឺនរៀល) ពីបុរសម្នាក់មិនស្គាល់ឈ្មោះ នៅចំណុចភូមិ ទួលក្រសាំង ឃុំរកាខ្ពស់ ស្រុកស្អាង ខេត្តកណ្តាល ដើម្បីយកទៅរំលែកលក់បន្តក្នុង០១កញ្ចប់តូច តម្លៃ២០,០០០៛។
ដោយទទួលបានការឯកភាពពីលោក លាវ ស្រេង ព្រះរាជអាជ្ញាសាលាដំបូងខេត្តកណ្តាល អនុញ្ញាតឲ្យធ្វើការត្រួតពិនិត្យ ឆែកឆេរ លំនៅឋានរបស់ឈ្មោះ លី យ៉ាក់កូប នៅភូមិបារ៉ែនក្រោម ឃុំស្វាយប្រទាល ស្រុកស្អាង ខេត្តកណ្តាល និងមានការចូលរួមពីលោក មេភូមិ , លោកនាយប៉ុស្តិ៍ កម្លាំងផ្នែកប្រឆាំងបទល្មើសគ្រឿងញៀន បានត្រួតពិនិត្យ ឆែកឆេរ រកឃើញ ម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ០១កញ្ចប់តូច និងឧបករណ៍សំរាប់វេចខ្ចប់ , ប្រើប្រាស់គ្រឿងញៀនមួយចំនួន។
បច្ចុប្បន្នជនសង្ស័យបានឃាត់ខ្លួននៅអធិការដ្ឋាននគរបាលស្រុកស្អាង ដើម្បីបន្ដអនុវត្ដតាមនីតិវីធី៕
Source: Kampuchea Thmey Daily
0 Comments