យោងតាមលិខិតលេខ១៧២/១៨ គ.ប្រ.ប.ជ.ក ចេញដោយគណៈកម្មការប្រកួតបាល់ទាត់ជាតិកម្ពុជា (CNCC) កាលពីថ្ងៃទី ២៨ មីនា ឆ្នាំ២០១៨ កន្លងទៅ បានសម្រេចធ្វើការផ្លាស់ប្តូរទីលានប្រកួតលេខ៦១ សប្តាហ៍ទី១១ នៃលីគកំពូលកម្ពុជារដូវកាល២០១៨ ត្រូវនឹងថ្ងៃទី ៩ ខែមិថុនា ឆ្នាំ២០១៨ រវាងក្លិបអង្គរថាយហ្គឺរ ជាមួយ សូលទីឡូអង្គរ ប្តូរពីពហុកីឡដ្ឋានជាតិ ទៅប្រកូតនៅកីឡដ្ឋានខេត្តសៀមរាប វិញ។
តាមពិតក្រុមទាំង២សុទ្ធតែមានសិទ្ធិប្រើប្រាស់កីឡដ្ឋានខេត្តសៀមរាប ដូចគ្នាប៉ុន្តែដោយសារកីឡដ្ឋានខេត្តមួយនេះត្រៀមជួសជុលដាក់ស្មៅសប្បនិមិត្ត ទើប CNCC សម្រេចឲ្យក្រុមទាំង២ប្រើប្រាស់ពហុកីឡដ្ឋានជាតិក្នុងរាជធានីភ្នំពេញ ប្រើប្រាស់បណ្តោះអាសន្នសិន។ ដូច្នេះការប្តូរទីលានប្រកួតទៅកាន់ខេត្តសៀមរាប នេះគឺអាចប្រមូលអ្នកគាំទ្រចូលទស្សនាបានច្រើនផងដែរ។
ក្រុមអង្គរថាយហ្គឺរ ដែលជាមានតួនាទីជាម្ចាស់ផ្ទះក្នុងប្រកួតនេះ បានប្រកាសដាក់លក់សំបុត្រមុនការប្រកួតមកដល់ជាងកន្លះខែមុនម្ល៉េះ។ ការប្រកួតនឹងធ្វើឡើងនៅវេលាម៉ោង៣រសៀល ថ្ងៃសៅរ៍ ទី០៩ ខែមិថុនា ឆ្នាំ២០១៨ នៅកីឡដ្ឋានខេត្តសៀមរាប មានសំបុត្រចូលរួមទស្សនាតម្លៃសំបុត្រ ៤០០០រៀល។ ទំនាក់ទំនងទិញសំបុត្រ តាមរយៈលេខទូរស័ទ្ទ ០៨៦ ៦៩១ ៩៤៧ /០៨៩ ៧៦៧/ ០៩៧ ០៨៦ ៥៥៦ ៦១១/០៧៨ ៤៤២ ៤២២។
យោងតាមសេចក្តីជូនដំណឹងរបស់ក្លិបអង្គរថាយហ្គឺរ បានបញ្ជាក់ថា នឹងរៀបចំកម្មវិធីច្រើននៅថ្ងៃប្រកួតនោះ ដោយទី១ នឹងចែកភេសជ្ជៈឥតគិតថ្លៃ ដល់អ្នកពាក់អាវថាយហ្គឺរ ឬអាវពណ៌ទឹកក្រូច។ ទី២ ពេលអ្នកគាំទ្រដើរចូលកន្លែងទស្សនា ក្លិបមានឆ្នោតឲ្យចាប់ ដែលមានរង្វាន់ជា អាវ ក្រមា និង វត្ថុអនុស្សាវរីយផ្សេងៗ ហើយទី៣ ក្លិបបានធ្វើលើផេកក្លឹប គឺអ្នកឆ្លើយសំនួរបានត្រឹមត្រូវ នឹងឈ្នះសំបុត្រយន្តហោះ (One way) ពីក្រុមហ៊ុនអាកាសចរណ៍។ សម្រាប់កីឡាករក្រុមទាំង២វិញ ក្រោយចប់ការប្រកួតនឹងមានការជ្រើសរើសកីឡាករឆ្នើមក្នុងការប្រកួត (Man of the Match) ដោយទទួលបានប្រាក់រង្វាន់១០០ដុល្លារ»។
អ្វីដែលគួរឲ្យចាប់អារម្មណ៍នោះគឺក្រុមទាំង២មានក្បាលម៉ាស៊ីន ជាជនជាតិជប៉ុនដូចគ្នាគឺក្រុមអង្គរថាយហ្គឺរ មានលោក Akihiro Kato ជាប្រធានក្លិប ខណៈក្រុមសូលទីឡូអង្គរ វិញមានភាគហ៊ុនរបស់កីឡាករKeisuke Honda សមាជិកក្រុមជម្រើសជាតិជប៉ុន កំពុងប្រកបអាជីពនៅក្លិប Pachuca លីគកំពូលប្រទេសម៉ិចស៊ីកូ៕
Source: Kampuchea Thmey Daily
0 Comments