ក្រុមអ្នកចរចាកូរ៉េខាងជើង និងអាមេរិក បានជួបគ្នានៅប្រទេសសិង្ហបុរីកាលពីថ្ងៃចន្ទ សម្រាប់ការរៀបចំចុងក្រោយ មុនកិច្ចប្រជុំកំពូលមួយរវាងលោក គីមជុង អ៊ុន និងលោក ដូណាល់ ត្រាំ។
កិច្ចប្រជុំថ្ងៃអង្គារនឹងក្លាយជាលើកទីមួយរវាងប្រធានាធិបតីសហរដ្ឋអាមេរិកកំពុងកាន់តំណែងជាមួយមេដឹកនាំកូរ៉េខាងជើងដែលមហិច្ឆតាមីស៊ីលនិងនុយក្លេអ៊ែររបស់គាត់បានបង្កឲ្យមានក្តីព្រួយបារម្ភជាសកលហើយធ្វើឲ្យភាពតានតឹងកើនឡើង។
កិច្ចប្រជុំកំពូលនេះបានលើកឡើងនូវក្តីសង្ឃឹមឆ្ពោះទៅរកសន្ធិសញ្ញាសន្តិភាពមួយដើម្បីបញ្ចប់ជាស្ថាពរនូវសង្គ្រាមកូរ៉េក្រោយពីភាពប្រទូសរ៉ាយត្រូវបានបញ្ឈប់ដោយបទឈប់បាញ់មួយ។
ប៉ុន្តែទីក្រុងព្យុងយ៉ាងកំពុងទាមទារនូវការធានាសន្តិសុខនិងការបញ្ចប់នូវអ្វីដែលខ្លួនហៅថាជា “គោលនយោបាយសត្រូវ” ចំពោះខ្លួនហើយមិនបានបញ្ជាក់ឲ្យច្បាស់ថាតើអ្វីជាសម្បទានដែលខ្លួននឹងទទួលបានមកវិញសម្រាប់ឃ្លាំងអាវុធនុយក្លេអ៊ែររបស់ខ្លួននោះទេ។
រដ្ឋមន្ត្រីក្រសួងការបរទេសលោក Mike Pompeo បានសរសេរ Twitter ថា “យើងនៅតែប្តេជ្ញាចិត្តចំពោះការលុបបំបាត់ទាំងស្រុងនូវអាវុធនុយក្លេអ៊ែរលើឧបទ្វីបកូរ៉េ”។
កូរ៉េខាងជើងបានស្វែងរកកិច្ចប្រជុំបែបនេះអស់រយៈពេលជាច្រើនទសវត្សរ៍មកហើយដែលមេដឹកនាំរបស់ខ្លួននឹងជួបជាមួយប្រធានាធិបតីអាមេរិកដោយស្មើភាពជាជាងជាមួយតំណាង។
ប៉ុន្តែក្រុមអ្នកវិភាគបានព្រមានថា វានឹងមានហានិភ័យក្លាយជាព្រឹត្តិការណ៍ប្រព័ន្ធផ្សព្វផ្សាយហើយគណៈប្រតិភូមកពីភាគីទាំងពីរកំពុងចរចានៅសណ្ឋាគារមួយក្នុងប្រទេសសិង្ហបុរីដើម្បីព្យាយាមដោះស្រាយភាពខុសគ្នារបស់ពួកគេ។
សន្តិសុខយ៉ាងច្រើននិងប៉ូលិសប្រដាប់អាវុធត្រូវបានដាក់ពង្រាយនៅកន្លែងដែលទាក់ទងទៅនឹងជំនួបកំពូលនៅទូទាំងប្រទេសសិង្ហបុរី។
ទីភ្នាក់ងារព័ត៌មាន KCNA ផ្លូវការរបស់កូរ៉េខាងជើងបានហៅកិច្ចប្រជុំកំពូលនេះថាជា “ប្រវត្តិសាស្ត្រ” ដោយនិយាយថា វានឹងប្រព្រឹត្តទៅនៅក្នុង “សម័យផ្លាស់ប្តូរ” មួយហើយស្ថិត “ក្រោមការយកចិត្តទុកដាក់និងការរំពឹងទុករបស់ពិភពលោកទាំងមូល”៕ AFP
Source: Kampuchea Thmey Daily
0 Comments