ភ្នំពេញ ៖ អ្នកនាំពាក្យបេឡាជាតិរបបសន្ដិសុខសង្គមនៃក្រសួងការងារ និងបណ្ដុះបណ្ដាលវិជ្ជាជីវៈ បានអះ អាងថា កម្មករ កម្មការិនី ដែលបានប្រើប្រាស់ប័ណ្ណបេឡាជាតិរបបសន្ដិសុខសង្គម(ប.ស.ស) នឹងទទួលបាននូវការព្យាបាលដោយមិន គិតថ្លៃ មានគុណភាព និងមិនមានការរើសអើងឡើយនៅតាមមន្ទីរពេទ្យជាដៃគូ។
លោក ជាវ ប៊ុនរិទ្ធ អ្នកនាំពាក្យបេឡាជាតិរបបសន្ដិសុខសង្គម បានឲ្យដឹងថា កម្មករ កម្មការិនី ដែលប្រើប្រាស់ប័ណ្ណបេឡាជាតិរបបសន្ដិសុខសង្គម ទៅទទួលសេវាដោយមិនបង់លុយឡើយ គឺទទួលបានគុណភាព នៃការព្យាបាល និងទទួលបានឱសថ ឬថ្នាំ ដូចអតិថិជនដែលបង់លុយ គ្រប់មន្ទីរពេទ្យដៃគូ បេឡាជាតិ ដោយមិនមានការរើសអើងនោះទេ ហើយ ប្រើប្រាស់បានរហូតដល់ដោយមិនមានការកំណត់សុពលភាពប្រើប្រាស់ទេ។
ការអះអាងនេះ បានធ្វើឡើងបន្ទាប់ពីមានបុគ្គល និងក្រុមមួយចំនួន បានឃោសនាបំភ្លៃថា កម្មករដែល ប្រើប្រាស់ប័ណ្ណបេឡាជាតិរបបសន្ដិសុខសង្គម សម្រាប់ការព្យាបាលជំងឺដោយឥតគិតថ្លៃនោះ គឺត្រូវពេទ្យ ឲ្យថ្នាំមិនល្អដូចអ្នកបង់លុយនោះទេ ហើយប័ណ្ណបេឡាជាតិនេះ គឺប្រើបានតែឆ្នាំ២០១៨ ក្នុងរយៈពេល បោះឆ្នោត ដល់ឆ្នាំ២០១៩ គេឈប់ទទួលស្គាល់ផងដែរ។
លោក ជាវ ប៊ុនរិទ្ធ បានពន្យល់ថា បញ្ហានេះ មានបុគ្គលមួយចំនួនបានដើរនិយាយព័ត៌មានមិនពិត និង ខុសពីការពិត ដែលប័ណ្ណ ប.ស.ស គឺប្រើសម្រាប់ជីវិតការងាររបស់កម្មករ និយោជិតធ្វើការងារគឺម្ចាស់ រោងចក្រ សហគ្រាសបានចុះឈ្មោះពួកគាត់រួចហើយ និងទទួលបានការធានារ៉ាប់រងលើបញ្ហាគ្រោះថ្នាក់ ការងារ និងការថែទាំសុខភាព។ លោកបានបន្ដថា សម្រាប់បងប្អូនកម្មករ និយោជិត ដែលកំពុងបំពេញ ការងារ ត្រូវបានទទួលការគាំពារផ្នែកសុខភាពពីរាជរដ្ឋាភិបាល និងបេឡាជាតិរបបសន្ដិសុខសង្គម។
លោកបានលើកឡើងថា ការចេញសេចក្ដីបំភ្លឺរបស់បេឡាជាតិរបបសន្ដិសុខសង្គមនេះ គឺដើម្បីឲ្យសាធារណជនបានយល់អំពីការប្រើប្រាស់ប័ណ្ណបេឡាជាតិរបបសន្ដិសុខសង្គម និងអត្ថប្រយោជន៍ក្នុងការទទួល សេវានៅតាមមន្ទីរពេទ្យ ដោយសារតែបងប្អូនកម្មករ កម្មការិនី មិនបង់លុយជូនមន្ទីរពេទ្យក៏ពិតមែន តែ បេឡាជាតិជាអ្នកចេញលុយជំនួសពួកគាត់ទាំងអស់ បើមន្ទីរពេទ្យកំណត់តម្លៃសេវាចំនួនប៉ុន្មានគឺត្រូវចេញ លុយឲ្យគ្រប់ចំនួននោះ។
លោក ជាវ ប៊ុនរិទ្ធ ក៏បានអំពាវនាវដល់បងប្អូនកម្មករ និយោជិត ត្រូវស្វែងយល់អំពីការយកចិត្តទុក ដាក់ និងការផ្ដល់គោលនយោបាយគាំពារសង្គមរបស់រាជរដ្ឋាភិបាល ដែលផ្ដល់ផលប្រយោជន៍ផ្សេងៗ ជាច្រើនដល់បងប្អូនកម្មករ កម្មការិនីទាំងក្នុង និងក្រៅប្រព័ន្ធ ការទទួលបាននូវថវិកាចំនួន៤០ម៉ឺន រៀល សម្រាប់ស្ដ្រីកម្មការិនីឆ្លងទន្លេបានកូន១ កូនពីរចំនួន៨០ម៉ឺនរៀល និងកូនភ្លោះបីចំនួន១លានពីរ សែនរៀល។ រាជរដ្ឋាភិបាលបានផ្ដល់សេវាពិនិត្យសុខភាពដោយឥតគិតថ្លៃនៅតាមមន្ទីរពេទ្យរដ្ឋដល់មេភូ អនុភូមិ និងសមាជិកភូមិ សមាជិកក្រុមប្រឹក្សាឃុំ សង្កាត់ កីឡាករ កីឡាការិនី និងមន្ដ្រីរាជការ។
សូមបញ្ជាក់ថា រហូតមកដល់បច្ចុប្បន្ននេះ បេឡាជាតិរបបសន្ដិសុខសង្គមបានចុះកិច្ចព្រមព្រៀង ជាមួយ ប៉ុស្ដិ៍សុខភាព មណ្ឌលសុខភាព មន្ទីរពេទ្យបង្អែកក្រុង ខណ្ឌ មន្ទីរពេទ្យថ្នាក់ខេត្ដ និងមន្ទីរពេទ្យ ថ្នាក់ជាតិ សរុប១.៣៨៥មន្ទីរពេទ្យ រួមនឹងមន្ទីរពេទ្យឯកជនមានប្រមាណ៥០មន្ទីរពេទ្យផងដែរ។
ចំពោះ កម្មករ និយោជិត ដែលបានចុះបញ្ជីនៅបេឡាជាតិរបបសន្ដិសុខសង្គមផ្នែករបបហានិភ័យការងារ មាន ចំនួនប្រមាណ១លាន៥សែននាក់ និងផ្នែករបបថែទាំសុខភាពមានចំនួនប្រហែល១លាន ៤សែននាក់។ ដោយឡែកសម្រាប់មន្ដ្រីរាជការដែលបានចុះបញ្ជីជាមួយបេឡាជាតិរបបសន្ដិសុខសង្គម គឺមានប្រមាណ ៤៥ម៉ឺននាក់៕
Source: Kampuchea Thmey Daily
0 Comments