សៀមរាប ៖ មន្ដ្រីអាជ្ញាធរជាតិអប្សរា បានថ្លែងថា ក្រុមមន្ដ្រីជំនាញផ្នែកបេតិកភណ្ឌ សម្រេចជ្រើសរើសយកប្រភេទឈើគគីរ ដើម្បីធ្វើចម្លាក់ដំឡើងពិតានរោងទងកូរសមុទ្រទឹកដោះនៃប្រាសាទអង្គរវត្ដ ដោយសារប្រភេទឈើនេះ អ្នកជំនាញសន្និដ្ឋានស្រដៀងថា ជាពិតានឈើដែលបានបាត់បង់អស់ជាច្រើនរយឆ្នាំកន្លងមក។
លោកលី វណ្ណា ប្រធាននាយដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរា បានធ្វើបទបង្ហាញដល់អ្នកជំនាញជាតិនិងអន្ដរជាតិនៅក្នុងកិច្ចប្រជុំអាស៊ីស៊ីអង្គរ កាលពីព្រឹកថ្ងៃទី៥ ខែមិថុនា ឆ្នាំ២០១៨នេះ នៅមជ្ឈមណ្ឌលអាជ្ញាធរជាតិអប្សរា ខេត្ដសៀមរាប។
លោក លី វណ្ណា មានប្រសាសន៍ថា ឆ្លងតាមការពិភាក្សា និងសិក្សាជាមួយគណៈកម្មាធិការអន្តរជាតិ ដើម្បីគាំពារនិងអភិរក្សប្រាសាទអង្គរ ហៅកាត់ថា អាយស៊ីស៊ី និង អង្គការអាដហុក លោកថា មន្ដ្រីជំនាញបានសម្រេចយកប្រភេទឈើគគីរធ្វើពិតាន នៅលើរោងទងប្រាសាទអង្គរវត្ដ។ លោកបានបន្ដថា ប្រភេទឈើគគីរនេះ អាចត្រូវទម្រង់ពិតានចាស់ដែលបានបាត់បង់ជាច្រើនរយឆ្នាំ។
លោកបានបន្ដឲ្យដឹងថា នៅពេលនេះ ជាងចម្លាក់បានចាប់ដើមឆ្លាក់ក្បាច់បណ្ដើរៗហើយ ទៅតាមក្បាច់បុរាណដើមកំណត់ ប៉ុន្ដែលោកមិនដឹងពិតានចាស់របស់រោងទងប្រាសាទអង្គរវត្ដនោះ ជាប្រភេទឈើអ្វី ដោយសារបានបាត់បង់ជាច្រើនរយឆ្នាំកន្លង ដោយសារកត្តាមនុស្សនិងសង្គ្រាម។ ប៉ុន្ដែទម្រង់ឈើពីមុនអាចដូចឈើគគីរ។ លោកបានបន្ដថាទៀតថា បន្ទាប់ពីបានឈើគ្រប់ចំនួន និងឆ្លាក់គ្រប់ចំនួន មន្ដ្រីជំនាញនឹងចាប់ផ្ដើមបំពាក់បំពាក់ជាផ្លូវការនៅពេលឆាប់ៗខាងមុខនេះ។
អ្នកសម្របសម្រួលនិងអនុវត្ដគម្រោងនៃ អង្គការមូលនិធិប្រាសាទបុរាណពិភពលោក លោកស្រី ជាម ផល្លី ធ្លាប់បានឲ្យដឹងថា គម្រោងបំពាក់ពិតានឈើថ្មីលើរោងទងកូរសមុទ្រទឹកដោះនេះ ទទួលបានការគាំទ្រពីគណៈកម្មាធិការអាយស៊ីស៊ីអង្គរ តាំងសម័យកិច្ចប្រជុំបច្ចេកទេសលើកទី២៥ នៅថ្ងៃទី២ ខែធ្នូ ឆ្នាំ២០១៥កន្លងមក។ គម្រោងនេះបានចាប់ផ្ដើមសាកល្បងហើយ ប៉ុន្ដែមិនដឹងបញ្ចប់នៅពេលណាបានទេ ព្រោះពិតានឈើថ្មីទាំងនេះឆ្លាក់តែជាងចម្លាក់ម្នាក់គត់។ តាមការរៀបរាប់របស់លោកស្រី ពិតានឈើទាំងអស់ត្រូវឆ្លាក់តាមទម្រង់ដើម ដែលមានបន្សល់ទុកតាំងបុរាណកាលមក។ ម្យ៉ាងទៀត ទាំងសមត្ថភាពឆ្លាក់និងគុណភាពរូបចម្លាក់ក៏ត្រូវទទួលស្គាល់ដោយគណៈកម្មការអាយស៊ីស៊ី-អង្គរដែរ ហើយឈើដែលត្រូវយកមកឆ្លាក់ធ្វើជាពិតានគឺប្រភេទឈើគគីរ។ ហេតុផលដែលជ្រើសរើសឈើគគីរ ព្រោះថាឈើពិតានដែលបន្សល់ពីបុរាណនិងរក្សាទុកនៅសារមន្ទីរជាតិភ្នំពេញ និងសារមន្ទីរនៅប្រទេសបារាំង ក៏ជាប្រភេទឈើគគីរដែរ៕
Source: Kampuchea Thmey Daily
0 Comments