លោក​ហ៊ុន ម៉ា​ណែ​ត ​ ​ជួប​សម្តែង​ការគួរសម និង​ពិភាក្សា​ការងារ​ជាមួយ​​​រដ្ឋមន្ត្រី​ក្រសួង​ការពារ​ជាតិ​នៃ​សាធារណរដ្ឋ​សិង្ហ​បុរី

សិង្ហ​បុរី ៖ នៅវេលា​ម៉ោង​២និង៣០​នាទី​រសៀល ថ្ងៃទី​០៧ ខែមិថុនា ឆ្នាំ​២០១៨ ដែល​ជា​ថ្ងៃទី​១ នៃ​ដំណើរ​ទស្សនកិច្ច​សិក្សា​ផ្លាស់ប្ដូរ​បទពិសោធន៍ “​លី​ក្វាន់​យូរ​”,​ លោក ហ៊ុន ម៉ា​ណែ​ត បាន​ជួប​សម្តែង​ការគួរសម និង​ពិភាក្សា​ការងារ​ជាមួយនឹង ឯកឧត្តម​បណ្ឌិត អ៊ឹង អេង ហេន ​ (Dr Ng Eng Hen) រដ្ឋមន្ត្រី​ក្រសួងការពារជាតិ​នៃ​សាធារណរដ្ឋ​សិង្ហ​បុរី។

ក្នុងជំនួប​នេះ ឯកឧត្តម​រដ្ឋមន្ត្រី​ការពារ​ជាតិ​នៃ​សាធារណរដ្ឋ​សិង្ហ​បុរី បាន​កោត​សរសើរ​ចំពោះ​ការ​រីកចម្រើន​របស់​ប្រទេស​កម្ពុជា​ ក្រោយ​ពេល​ដែល​ប្រទេស​នេះ​ ទទួល​បាន​សន្តិភាព​ពេញលេញ ហើយ​ឯកឧត្តម​ក៏បាន ថ្លែងអំណរគុណ​ដល់​ប្រទេស​កម្ពុជា​ដែល​តែងតែ​គាំទ្រ និង​ជា​ដៃគូ​ដ៏​ល្អ​ក្នុងការ​ថែរក្សា​សន្តិសុខ​ក្នុង​តំបន់​។​



​លោក ហ៊ុន ម៉ា​ណែ​ត បាន​ថ្លែងអំណរគុណ​ដល់​ប្រទេស​សិង្ហ​បុរី​ដែល​តែងតែ​យកចិត្តទុកដាក់​ក្នុងការ​បណ្តុះបណ្តាល​ធនធាន​មនុស្ស និង​ជា​ដៃគូ​សហប្រតិបត្តិការ​ដ៏​ល្អ ហើយ​សង្ឃឹមថា​ប្រទេស​ទាំងពីរ នឹង​ពង្រឹង​ទំនាក់ទំនង​ក្នុង​វិស័យ​សន្តិសុខ​កាន់តែ​ល្អប្រសើរ​នាពេល​អនាគត​។​

​សូមបញ្ជាក់ថា ឧ​ត្ត​ម​សេនីយ៍​ឯក ហ៊ុន ម៉ា​ណែ​ត នាយរង​សេនាធិការ​ចំរុះ និង​ជា​មេបញ្ជាការរង​កងទ័ព​ជើងគោក​នៃ​កងយោធពល​ខេមរភូមិន្ទ នឹងធ្វើ​ទស្សនកិច្ច​នៅ​ប្រទេស​សិង្ហបូរី ក្នុង​កម្មវិធី​ទស្សនកិច្ច​សិក្សា​ផ្លាស់ប្តូរ​បទ ពិសោធន៍ “​លី​ក្វាន់​យូរ​” លើក​ទី ៦៤ រយៈពេល​៤​ថ្ងៃ​គឺ​ចាប់ពី​ថ្ងៃទី​៧ ដល់​ថ្ងៃទី​១០ ខែមិថុនា ឆ្នាំ​២០១៨​។ នៅក្នុង​កឡុង​ពេល​ទស្សនកិច្ច​នេះ ឧ​ត្ត​ម​សេនីយ៍​ឯក ហ៊ុន ម៉ា​ណែ​ត នឹង​ជួប​ជាមួយ​ថ្នាក់ដឹកនាំ រួមមាន ឯកឧត្តម លី សៀន​ឡុង (Lee Hsien Loong) នាយករដ្ឋមន្ត្រី​នៃ​ប្រទេស​សិង្ហបុរី ឯកឧត្តម ហ្គោ ចុក​តុង (Emeritus Senior Minister Goh Chok Tong) អតីត​នាយករដ្ឋមន្ត្រី​ប្រទេស​សិង្ហបុរី និង​ឯកឧត្តម​បណ្ឌិត អ៊ឹង អេង (Dr Ng Eng Hen) រដ្ឋមន្ត្រី​ការពារ​ជាតិ​សិង្ហបុរី និង​ឥស្សរជន​សំខាន់ៗ​នៃ​សាធារណរដ្ឋ​សិង្ហ​បុរី​ផង​ដែរ៕



Source: Kampuchea Thmey Daily