បន្ទាយមានជ័យ ៖ ព្រឹកថ្ងៃទី២៩ ខែមិថុនា ឆ្នាំ២០១៨នេះ នៅសាលប្រជុំធំសាលាខេត្តបន្ទាយមានជ័យបានបើកកិច្ចប្រជុំស្តីពីទិវាអន្តរជាតិប្រយុទ្ធប្រឆាំងគ្រឿងញៀនក្រោមប្រធានបទ " ចូលរួមទាំងអស់គ្នា ដើម្បីជីវិត និងសហគមន៍យើងគ្មានគ្រឿងញៀន " ដោយមានការចូលរួមលោក អ៊ុំ រាត្រី អភិបាលស្តីទីខេត្តបន្ទាយមានជ័យ លោក នាក់ យុទ្ធា អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន លោក ខេង ស៊ុំ តំណាងក្រុមប្រឹក្សាខេត្ត លោកវរសេនីយ៍ឯកសប៊ុនសឿងមេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារគ្រឿងញៀន និងគណៈកម្មាធិការត្រួតពិនិត្យគ្រឿងញៀនខេត្ត ក្រុង ស្រុក កងកំលាំងបីប្រភេទ យុវជនកាយរិទ្ធ កាកបាទក្រហម លោកគ្រូ អ្នកគ្រូ ប្រជាពលរដ្ឋ សិស្ស និស្សិត និងអ្នកពាក់ព័ន្ធ ចំនួន១៣៧១នាក់។
លោក នាក់ យុទ្ធា បានប្រាប់អ្នកយកព័ត៌មានឲ្យដឹងថា ក្រោមការដឹកនាំរបស់សម្តេចតេជោហ៊ុន សែនជាង៣០ឆ្នាំនេះ សម្តេចបាន ខិតខំប្រយុទ្ធប្រឆាំងគ្រឿងញៀន តាម បទបញ្ជាលេខ ០១ ស្តីពីការពង្រឹងវិធានការប្រយុទ្ធប្រឆាំងគ្រឿងញៀន ផែនការពហុវិស័យរបស់អាជ្ញាធរជាតិប្រយុទ្ធប្រឆាំងគ្រឿងញៀន រាជរដ្ឋាភិបាលបានដាក់ចេញនូវផែនការយុទ្ធនាការប្រឆាំងគ្រឿងញៀនខុសច្បាប់ដំណាក់កាលទី១ ទី២ ហើយក្នុងឆ្នាំ២០១៨នេះ បានបន្តឲ្យអនុវត្តសម្រាប់ដំណាក់កាលទី៣ ជាបន្តទៀត ដោយសម្រេចបាននូវលទ្ធផលគួរឲ្យកត់សម្គាល់ជាច្រើនរួមមានដូចជាបានធ្វើការផ្សព្វផ្សាយ អប់រំឲ្យមានការយល់ដឹងពីផលប៉ះពាល់ និងគ្រោះ ថ្នាក់នៃគ្រឿងញៀន ដល់ប្រជាពលរដ្ឋបានចំនួន ១.៦៣៨.៤៩៤ នាក់ បានផ្តល់ការព្យាបាល និងស្តារនីតិសម្បទាដល់អ្នកញៀនគ្រឿងញៀនបានចំនួន ៧.០៥៦នាក់ បានបង្ក្រាបបទល្មើសបានចំនួន ២.៨៧០ ករណី និងបានឃាត់ខ្លួនជនសង្ស័យបានចំនួន ៥.៧០២ នាក់ តាមរយៈលទ្ធផលការងារនេះបានធ្វើឲ្យមានការថយចុះនូវរាល់បទល្មើសដែលពាក់ព័ន្ធនឹងគ្រឿងញៀននិងបទល្មើសផ្សេងទៀតនៅក្នុងសង្គមរួមចំណែកយ៉ាងសំខាន់ក្នុងការថែរក្សាសន្តិសុខ និងសណ្តាប់ធ្នាប់សាធារណៈ បង្កលក្ខណៈ ងាយស្រួលដល់រាជរដ្ឋាភិបាល ក្នុងការកសាង អភិវឌ្ឍប្រទេសជាតិនិងសុខុមាលភាពប្រជាពលរដ្ឋ។
ក្នុងនោះលោក អ៊ុំ រាត្រី ប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្តបន្ទាយមានជ័យ បានមានប្រសាសន៍ថា លោកបានធ្វើការសរសើរដោយស្មោះចំពោះថ្នាក់ដឹកនាំ អាជ្ញាធរមូលដ្ឋាន និងមន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ នៅគ្រប់ស្ថាប័ន អង្គភាពរបស់ខេត្តទាំងអស់ ក៏ដូចជាបណ្តាអង្គការដៃគូ វិស័យសាសនា វិស័យឯកជន និងសប្បុរសជននានា ដែលបានចូលរួម និងគាំទ្រយ៉ាងសកម្មដល់ ការងារប្រយុទ្ធប្រឆាំងគ្រឿងញៀន តាមតួនាទី និងភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់ ក្នុងការបង្ការ និងទប់ស្កាត់រាល់បញ្ហាដែលមានការពាក់ព័ន្ធនឹងគ្រឿងញៀន ពិសេសក្នុងដំណើរការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ទាំង ៣ ដំណាក់កាលរបស់រាជរដ្ឋាភិបាលនាពេល កន្លងមក និងបានអំពាវនាវឲ្យផ្នែកពាក់ព័ន្ធទាំងអស់សូមបន្តចូលរួមអនុវត្តការងារប្រយុទ្ធប្រឆាំងញៀនឲ្យទទួលបានលទ្ធផលល្អបន្ថែមទៀត៕
Source: Kampuchea Thmey Daily
0 Comments