កណ្តាល ៖ ដើមឈើមួយដើមមានឈ្មោះថា "ដើមគីនីនឬ ដើមគ្រាប់បែក" មានអាយុកាលរាប់សិបឆ្នាំមកហើយនោះ ដែលគេបានដាំលំអនៅឯរមណីយដ្ឋានភ្នំព្រះរាជទ្រព្យ ស្ថិតនៅក្នុងភូមិជ័យឧត្តម ឃុំផ្សារដែក ស្រុកពញាឮ ខេត្តកណ្តាល បានដួលរលំសង្កត់មកលើតូបលក់ដូររបស់ប្រជាពលរដ្ឋ នៅទីនោះអស់ចំនួន៤៤គ្រែ កាលពីយប់ថ្ងៃទី២៩ ខែមិថុនា ឆ្នាំ២០១៨ ខណៈពេលភ្លៀងនិងខ្យល់។
លោក វ៉ាន មន្ត្រីផ្នែកទេសចរណ៍ប្រចាំការនៅទីនោះបាននិយាយថា នៅក្នុងគ្រោះមហន្តរាយនោះបានបណ្តាលឲ្យសង្កត់រោង(តូប)លក់ដូររបស់ប្រជាពលរដ្ឋនៅទីនោះអស់ចំនួន៤៤ខ្នងឬតូប។
មន្ត្រីដដែលរូបនេះបានបញ្ជាក់ថា ចំពោះការខូចខាតនេះត្រូវបានក្រុមប្រឹក្សាការងារបក្សចុះមកត្រួតពិនិត្យនិងសន្យាធ្វើសងជូនប្រជាជនឡើងវិញទាំងស្រុងដោយមិនយកលុយកាក់ឡើយ។
លោក អនុសេនីយ៍ឯក អ៊ុក ថា នាយប៉ុស្តិ៍នគរបាលរដ្ឋបាលឃុំផ្សារដែក បានឲ្យដឹងថា នៅក្នុងហេតុការណ៍នេះ មិនបង្កឲ្យគ្រោះធ្ងន់ធ្ងរដល់ប្រជាពលរដ្ឋទេ ប៉ុន្តែវាសំណាងល្អដែរ ដែលការដួលរលំដើមឈើនោះ បានគេចផុតពីប្រជាជនមួយចំនួនកំពុងធ្វើដំណើរឆ្លងកាត់ទីនោះ។
ដើមឈើដែលរលើងឫស្សីដួលរលំនោះត្រូវបានចាស់ៗនិយាយថា វាត្រូវបានគេដាំតាំងពីសម័យសម្តេចតាមកម្ល៉េះ រហូតមកដល់ពេលនេះអាយុរបស់វាប្រហែលជាង៤០ឆ្នាំហើយ ដែលមានមុខកាត់ត្រងគល់វាប្រហែល៧០សង់ទីម៉ែត្រ៕
Source: Kampuchea Thmey Daily
0 Comments