មេដឹកនាំ​ក្រុម​ឧទ្ទាម​យេ​មែន​នៅតែ​រឹងទទឹង ​ខណៈ​មនុស្ស​រាប់សិប​នាក់​ បាន​ស្លាប់​ក្នុង​សមរភូមិ​សម្រាប់​កំពង់ផែ​ដ៏​សំខាន់

ប្រមុខ​ក្រុម​ឧទ្ទាម​យេ​មែន​ បាន​ជំរុញ​ឲ្យ​កងកម្លាំង​របស់គាត់​ប្រយុទ្ធ​ប្រឆាំងនឹង​កងទ័ព​គាំទ្រ​រដ្ឋាភិបាល​ដែល​កំពុងបើក​វាយលុក​មួយ​ជាមួយ​ការគាំទ្រ​ដោយ​ប្រទេស​អារ៉ាប៊ីសាអ៊ូឌីត​ដើម្បី​ដណ្តើមយក​មជ្ឈមណ្ឌល​ជំនួយ​ដ៏​សំខាន់ Hodeida មកវិញ​ ខណៈពេលដែល​អង្គការសហប្រជាជាតិ​អំពាវនាវ​ឲ្យ​កំពង់ផែ​សមុទ្រ​ក្រហម​មួយ​នេះ​ត្រូវ​បន្ត​បើកចំហ​។​
​
ការប្រយុទ្ធ​គ្នា​ដ៏​ខ្លាំងក្លា​បានសម្លាប់​មនុស្ស​ចំនួន​៣៩​នាក់​កាលពី​ថ្ងៃ​ព្រហស្បតិ៍​, មួយថ្ងៃ​បន្ទាប់ពី​ក្រុមចម្រុះ​ដឹកនាំ​ដោយ​អារ៉ាប៊ីសាអ៊ូឌីត​បាន​បើក​ការវាយប្រហារ​ដើម្បី​ដណ្តើមយក​ទីក្រុង​ដែល​គ្រប់គ្រង​ដោយ​ពួក​ឧទ្ទាម Huthi ដែលជា​សម្ព័ន្ធមិត្ត​អ៊ីរ៉ង់​មកវិញ​។​
​
ប្រភព​យោធា​បាន​និយាយថា ក្រុមចម្រុះ​បាន​វាយប្រហារ​ទីតាំង​ឧទ្ទាម​ខណៈដែល​ការប្រយុទ្ធ​គ្នា​បាន​ឆាបឆេះ​នៅ​ចម្ងាយ​ជាច្រើន​គីឡូម៉ែត្រ​ពី​ព្រលានយន្តហោះ Hodeida នៃ​ភាគខាងត្បូង​ទីក្រុង​។​
​
យោងតាម​ទូរទស្សន៍ Al-Masirah របស់​ក្រុម​ឧទ្ទាម​បាន​ផ្សាយ​ថា មេដឹកនាំ​ក្រុម​ឧទ្ទាម​លោក Abdel Malek Al-Houthi បាន​ជំរុញ​ឲ្យ​កងកម្លាំង​របស់ខ្លួន​ត្រូវ​ប្រឈមមុខ​ជាមួយនឹង​កងកម្លាំង​ផ្តាច់កា​រហើយ​បាន​ព្រមាន​ថា ពួកគេ​នឹង​ចាប់យក​តំបន់​ដែល​ត្រូវបាន​ដណ្តើម​ដោយ​កងកម្លាំង​គាំទ្រ​រដ្ឋាភិបាល​មកវិញ​ហើយ​នាំយក​អ្នក​ប្រយុទ្ធ​ជាច្រើន​ចូលទៅក្នុង​សមរភូមិ​នេះ​។​
​
លោក​បន្ថែមថា “​ឆ្នេរសមុទ្រ​ភាគ​ខាងលិច​នឹង​ក្លាយជា​វាល​ដ៏​ធំ​មួយ​សម្រាប់​ពួក​ឈ្លានពាន​”​។​
​ការប៉ះទង្គិច​គ្នា​នេះ​បាន​កើតឡើង​នៅពេល​ក្រុមប្រឹក្សាសន្តិសុខ​អង្គការសហប្រជាជាតិ​បាន​កោះប្រជុំ​ជាបន្ទាន់​លើ​ប្រតិបត្តិការ​យោធា​និង​បាន​អំពាវនាវ​ឲ្យ​កំពង់ផែ​ដែល​គ្រប់គ្រង​ដោយ​ក្រុម​ឧទ្ទាម​រួមជាមួយ​រដ្ឋធានី Sanaa ចាប់តាំងពី​ឆ្នាំ​២០១៤​មក​នោះ​ត្រូវ​បើកចំហ​។​
​
អង្គការសហប្រជាជាតិ​បាន​ព្រមាន​ប្រឆាំងនឹង​ការវាយលុក​មួយ​នៅ Hodeida ពីព្រោះ​កំពង់ផែ​នេះ​ជា​ច្រកចូល​សម្រាប់​ការនាំ​ចូល​៧០​ភាគរយ​របស់​យេ​មែន​ខណៈដែល​ប្រទេស​នេះ​កំពុង​រងគ្រោះ​ដោយ​គ្រោះ​ទុរ្ភិក្ស​រួម​ទៅហើយ​បន្ទាប់ពី​សង្គ្រាម​អស់​រយៈពេល​៣​ឆ្នាំ​។​
​
កាលពី​ថ្ងៃ​ព្រហស្បតិ៍ អាជ្ញាធរ​បាន​និយាយថា ផ្លូវទឹក​នៃ​សមុទ្រ​ក្រហម​នៅតែ​បើកចំហ​សម្រាប់​ការដឹកជញ្ជូន​៕ AFP
​

​

Source: Kampuchea Thmey Daily