ភ្នំពេញ ៖ បុណ្យផ្កាប្រាក់មហាសាមគ្គី ដែល រៀបចំពិធីឡើង ដោយព្រះទេវត្ថា ពឿយ មេត្តា ចៅអធិការវត្តទាំង៨ ដែនដីពុទ្ធភូមិនេប៉ាល់-ឥណ្ឌា នឹងប្រារព្ធធ្វើឡើងនៅក្នុងបរិវេណវត្ត កោះមេត្តាពោធិវង្ស ដើម្បីប្រមូលបច្ច័យយកទៅកសាងវត្តខ្មែរទាំង៨ នៅទឹកដីពុទ្ធភូមិ ជាភូមិដ៏ប្រសើរដែលមនុស្ស និងទេវតា តែងតែគោរពបូជាទាំងយប់ទាំងថ្ងៃ ជាមួយនឹងការរាប់បាត្រព្រះសង្ឃ ១០៨អង្គ។
ពិធីបុណ្យផ្កាប្រាក់មហាសាមគ្គីនេះនឹងប្រារព្ធធ្វើ នៅថ្ងៃពុធ-ព្រហស្បតិ៍ ៨-៩កើត ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០~២១ ខែមិថុនា ឆ្នាំ២០១៨ នៅវត្តកោះមេត្តាពោធិវង្ស ស្ថិតនៅភូមិកោះអណ្តែត ភូមិកោះអណ្តែត ផ្លូវម៉ុងឫទ្ធី សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
តាមរយៈបុណ្យផ្កាប្រាក់សាមគ្គីនេះ ព្រះទេវត្ថា ពឿយ មេត្តា ចៅអធិការវត្តទាំង៨ ដែនដីពុទ្ធភូមិនេប៉ាល់-ឥណ្ឌា បានមានថេរៈដីកាថា ប្រទេសកម្ពុជាយើងតាំងពីបុរមបុរាណមក ពោលគឺជាង២៥០០ឆ្នាំ កន្លងមកនេះយើងមិនដែលមានវត្តនៅទឹកដីពុទ្ធភូមិ នេប៉ាល់-ឥណ្ឌានោះទេ។ តែពេលនេះយើងពិតជាមានមោទនភាពណាស់ដោយយើងមានវត្តនៅទីនោះរហូតដល់៨វត្ត ដោយយើងបានចំណាយថវិកាអស់ប្រមាណ៩លានដុល្លារសហរដ្ឋអាមេរិក ហើយក្នុងការធ្វើពិធីសាសនាកន្លងមកនេះមានពុទ្ធបរិស័ទនិងព្រះសង្ឃចូលរួមជាង១៥០០អង្គនាក់ ដែលបានធ្វើឲ្យប្រទេសយើងមានឈ្មោះបោះសំឡេងលើឆាកអន្តជាតិ ធ្វើឲ្យគេស្គាល់គ្រប់គ្នា។
ព្រះទេវត្ថា ពឿយមេត្តា មានថេរៈដីកាបន្តថា ការកសាងវត្តនៅទឹកដីពុទ្ធភូមិ នេប៉ាល់-ឥណ្ឌា មិនមែនចេះតែធ្វើបានងាយៗនោះទេ ពោលគឺបើយើងមិនមាននិស្ស័យគឺយើងធ្វើមិនបាននោះទេ តែពេលនេះយើងបានធ្វើកសាងរហូតដល់៨វត្តឯណោះ។ ប៉ុន្តែអ្វីដែលជាការចាប់អារម្មណ៍នោះ គឺយើងត្រូវការបច្ច័យជាច្រើនទៀតដើម្បីយកទៅកសាងវត្តខ្មែរទាំង៨នោះបន្ថែមទៀត។
ព្រះទេវត្ថា ពឿយ មេត្តា សូមជូនមគ្គផលដល់ពុទ្ធបរិស័ទ ដែលបានចូលរួមចាប់មគ្គផល ដើម្បីជាកុសលក្នុង បុណ្យពិធីបុណ្យផ្កាប្រាក់មហាសាមគ្គីលើកទី១២នេះ ។ ដូច្នេះសូមពុទ្ធបរិស័ទចូលរួមឲ្យបានច្រើនកុះករ។
ព្រះអង្គមានសង្ឃដីកាបញ្ជាក់ថា ចំពោះពុទ្ធបរិស័ទ ដែលមានបំណងទៅកាន់វត្តខ្មែរ នៅទឹកដីពុទ្ធភូមិ សូមទាក់ទងនៅកុដិលេខ៣៥ នៅវត្តបុទុមវត្តី ឬទំនាក់ទំនង តាមលេខ ទូរស័ព្ទ ០១៧ ២៩៣០៥៩ និងលេខ ០១៧ ៤៧៤ ៧៤២៕
Source: Kampuchea Thmey Daily
0 Comments