ភ្នំពេញ ៖ ថ្លែងទៅកាន់មន្ត្រីក្រោមឱវាទកាលពីថ្ងៃទី២៩ ខែមិថុនា ឆ្នាំ២០១៨ ក្នុងកិច្ចប្រជុំពង្រឹងសន្តិសុខនៅក្នុងសាលាខណ្ឌឫស្សីកែវ ខណៈពេលការឃោសនាបោះឆ្នោតខាងមុខជិតចូលមកដល់លោក ជា ពិសី ប្រធានគណៈបញ្ជាការឯកភាពខណ្ឌឫស្សីកែវបានមានប្រសាសន៍ថា មន្ត្រីទាំងអស់ដាច់ខាត ត្រូវឈរលើស្មារតីទទួលខុសត្រូវខ្ពស់ ក្នុងការអនុវត្តភារកិច្ចតាមតួនាទីរៀងៗខ្លួន រហូតដល់ថ្ងៃទី២៩ ខែកក្កដា ឆ្នាំ២០១៨ខាងមុខ អំឡុងពេលឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ នៃរដ្ឋសភា របស់គណៈកម្មាធិការជាតិរៀបចំការបោះឆ្នោត។
លោកបន្តថា ការធ្វើបែបនេះ ដើម្បីសហការទប់ស្កាត់ ក្ដាប់ឲ្យបានរាល់បទល្មើសផ្សេងៗ ដែលអាចកើតមានឡើងជាយថាហេតុ ដើម្បីត្រៀមលក្ខណៈការពាររក្សាសន្តិសុខ និងសុវត្ថិភាពសណ្ដាប់ធ្នាប់ ជូនគណបក្សនយោបាយ និងប្រជាពលរដ្ឋឲ្យបានល្អប្រសើរ។
នាឱកាសនោះ លោក ជា ពិសី បានជំរុញដល់កងកម្លាំងទាំងប៉ូលិស អាវុធហត្ថខណ្ឌ និងមន្ត្រីពាក់ព័ន្ធ ធ្វើយ៉ាងណាទប់ស្កាត់ ការពារថែរក្សាសន្តិសុខសណ្តាប់ធ្នាប់ ជូនប្រជាពលរដ្ឋឲ្យបានរឹងមាំ។
លោកអភិបាលខណ្ឌឫស្សីកែវ បានជំរុញបន្ថែមថា ដើម្បីការពារសណ្តាប់ធ្នាប់ឲ្យបានល្អប្រសើរ ចំពោះមន្ត្រីដាច់ខាត ត្រូវខិតខំអនុវត្តការងារដោយឈរលើស្មារតីទទួលខុសត្រូវខ្ពស់ ទៅតាមតួនាទីភារកិច្ច ជុំនាញរៀងៗខ្លួន សំដៅបង្កើននូវប្រសិទ្ធភាពការងារ ដែលជាកម្លាំងស្នូលក្នុងកិច្ចការការពាររក្សាសន្តិសុខសណ្ដាប់ធ្នាប់ សុវត្ថិភាពជូនប្រជាពលរដ្ឋ និងគណៈកម្មាធិការជាតិរៀបចំការបោះឆ្នោត ក្នុងពេលបោះឆ្នោតតំណាងរាស្ត្រនីតិកាលទី៦ នៃរដ្ឋសភា ដែលនិងចាប់ផ្ដើមប្រព្រឹត្តឡើងនាថ្ងៃទី២៩ ខែកក្កដា ឆ្នាំ២០១៨ ខាងមុខនេះឲ្យទទួលបានជោគជ័យ៕
Source: Kampuchea Thmey Daily
0 Comments