MCL 2018 ៖ ភ្នំពេញក្រោន ណាហ្គាវើល និងបឹងកេត រកបាន៣ពិន្ទុដូចគ្នាប្រចាំសប្ដាហ៍ទី១២ នៅល្ងាចថ្ងៃសៅរ៍
ក្រុមបាល់ទាត់ភ្នំពេញក្រោន ណាហ្គាវើល និងបឹងកេត សុទ្ធតែរកបាន៣ពិន្ទុដូចគ្នានៅល្ងាចថ្ងៃសៅរ៍ ទី៣០ ខែមិថុនា ឆ្នាំ២០១៨ លើ៣ទីលានផ្សេងគ្នាប្រចាំសប្ដាហ៍ទី១២ នៃពានរង្វាន់លីគកំពូលកម្ពុជា Mefone Cambodian League 2018 (MCL 2018)។
ចំពោះក្រុមភ្នំពេញក្រោន បានយកឈ្នះក្រុមម្ចាស់ផ្ទះសូលទីឡូអង្គរ ២ទល់១ លើទីលានកីឡដ្ឋានខេត្តសៀមរាប។ នៅតង់ទី១ក្រុមទាំង២មិនអាចរកគ្រាប់បាល់បញ្ចូលទីគ្នាបាននោះទេ រហូតដល់នាទី៦៧ ទើបកីឡាករចំណូលថ្មីជនជាតិប្រេស៊ីល Valci Júnior បានរកគ្រាប់បាល់ឱ្យភ្នំពេញក្រោន នាំមុខ ខណៈកីឡាករនីហ្សេរីយ៉ា Dzarma Bata បានរកគ្រាប់បាល់ឱ្យម្ចាស់ផ្ទះតាមស្មើវិញនៅនាទី៨១ ដោយទាត់បាល់ពិន័យប៉េណាំងទីបានសម្រេច និង១នាទីបន្ទាប់ ភ្នំពេញក្រោន បានរកគ្រាប់បាល់នាំមុខវិញ ក្រោយរកគ្រាប់បាល់បានដោយកីឡាករកីឡាករ យើ ម៉ូស្លីម។
ចំណែកក្រុមកំពូលតារាងបឹងកេត វិញបន្តរកបានជ័យជម្នះក្រោយយកឈ្នះលើក្រុមអាស៊ីអឺរ៉ុប ៤ទល់០ លើទីលានពហុកីឡដ្ឋានជាតិ ក្នុងរាជធានីភ្នំពេញ។ ខ្សែប្រយុទ្ធនីហ្សេរីយ៉ា Julius Oiboh និងខ្សែបម្រើប្រេស៊ីល Maycon Calijuri រកបានគ្រាប់បាល់២គ្រាប់ម្នាក់ឱ្យក្រុមបឹងកេត ទទួលបាន៣ពិន្ទុលើកនេះ។
សម្រាប់ក្រុមណាហ្គាវើល វិញបានយកឈ្នះលើក្រុមម្ចាស់ផ្ទះព្រះខ័នរាជស្វាយរៀង ៤ទល់០ លើទីលានកីឡដ្ឋានខេត្តស្វាយរៀង។ ខ្សែប្រយុទ្ធនីហ្សេរីយ៉ា George Bisan និងខ្សែប្រយុទ្ធចំណូលថ្មីកូរ៉េខាងត្បូង Song Chi-hun រកបានគ្រាប់បាល់ម្នាក់២គ្រាប់ឱ្យណាហ្គាវើល បន្តជ័យជម្នះប្រដេញកំពូលតារាងថែមទៀត។
សម្រាប់៣ប្រកួតផ្សេងទៀតប្រចាំសប្ដាហ៍ទី១២ នេះនឹងធ្វើឡើងនៅថ្ងៃអាទិត្យ ទី១ ខែកក្កដា ឆ្នាំ២០១៨ ជាបន្ត ដោយក្រុមអគ្គីសនីកម្ពុជា ប៉ះក្រុមវិសាខា វេលាម៉ោង៣ល្ងាចលើទីលានកីឡដ្ឋានអគ្គីសនីកម្ពុជា មានផ្សាយផ្ទាល់តាមទំព័រហ្វេសប៊ុករបស់ CNCC ហើយក្រុមវេស្ទើនភ្នំពេញ ទទួលក្រុមអគ្គស្នងការដ្ឋាននគរបាលជាតិ នៅវេលាម៉ោង៣រសៀលដូចគ្នាលើទីលានកីឡដ្ឋានវេស្ទើន មានផ្សាយតាមប៉ុស្តិ៍ BTV News និងក្រុមក្រសួងការពារជាតិ វិញប៉ះក្រុមអង្គរថាយហ្គឺរ នៅវេលាម៉ោង៦ល្ងាចលើទីលានកីឡដ្ឋានស្តាតចាស់ វេលាម៉ោង៦ល្ងាច ព្រមទាំងមានផ្សាយផ្ទាល់តាមប៉ុស្តិ៍ BTV News ដូចគ្នា៕
Source: Kampuchea Thmey Daily
0 Comments