នាយករដ្ឋមន្ត្រី​ថ្មី​របស់​អេស្ប៉ាញ​ បង្ហាញ​រដ្ឋាភិបាល​គាំទ្រ​អឺរ៉ុប ​ដែល​គ្រប​ដណ្តប់​ដោយ​ស្ត្រី

នាយករដ្ឋមន្ត្រី​សង្គមនិយម​អេ​ស្ប៉ា​ញ​លោក Pedro Sanchez កាលពី​ថ្ងៃ​ពុធ​ បានបង្ហាញ​នូវ​រដ្ឋាភិបាល​គាំទ្រ​សហភាព​អឺរ៉ុប​ថ្មី​មួយ ដែល​មាន​ស្ត្រី​ច្រើន​បំផុត​នៅក្នុង​ប្រវត្តិសាស្ត្រ​សម័យ​ទំនើប​ ដោយមាន​រដ្ឋមន្ត្រី​ជា​ស្ត្រី​ចំនួន​១១​រូប​ និង​បុរស​ចំនួន​៦​រូប។

នាយក​ប្រតិបត្តិ​ថ្មី​ដែល​ជ្រើសតាំង​ដោយ​បុរស​វ័យ​៤៦​ឆ្នាំ​រូបនេះ​ដែល​បាន​បណ្តេញ​លោក Mariano Rajoy ចេញពី​តំណែង​ជា​នាយករដ្ឋមន្ត្រី​កាលពី​ថ្ងៃ​សុក្រ​មុន​ក្នុងការ​បោះឆ្នោត​សម្តែង​ការមិនទុកចិត្ត​មួយ​គឺ​រួមមាន​ទាំង​អវកាស​ចរ Pedro Duque ជា​រដ្ឋមន្ត្រី​វិទ្យាសាស្ត្រ​ផងដែរ​។​

លោកស្រី Nadia Calvino ដែលជា​អ្នកគ្រប់គ្រង​ថវិកា​សហភាព​អឺរ៉ុប​គឺ​នឹង​ក្លាយជា​រដ្ឋមន្ត្រីក្រសួង​សេដ្ឋកិច្ច​ហើយ​អតីត​ប្រធានសភា​អឺរ៉ុប​លោក Josep Borrell នឹង​ក្លាយ​រដ្ឋមន្ត្រីការបរទេស​។​

លោក Sanchez បាន​និយាយថា នាយក​ប្រតិបត្តិ​របស់គាត់​គឺជា “​ការឆ្លុះបញ្ចាំង​ពីអ្វី​ដែល​ល្អ​បំផុត​នៅក្នុង​សង្គម​” ដែលជា​សង្គម​មួយ​ត្រូវបាន​លោក​រៀបរាប់ថា មាន​សមាសភាព​ស្ត្រី​និង​បុរស វ័យ​ចំណាស់​និង​វ័យក្មេង​ដែល​បាន​ចាក់​ឫសគល់​នៅក្នុង​សហភាព​អឺរ៉ុប​។​

ប៉ុន្តែ​វា​ក៏​ជា​រដ្ឋាភិបាល​សំឡេង​ភាគតិច​មួយ​ផងដែរ​ព្រោះ​គណបក្ស​សង្គមនិយម​មា​ន​សមាជិកសភា​ត្រឹមតែ​៨៤​រូប​ប៉ុណ្ណោះ​នៅក្នុង​សភា​ដែលមាន​៣៥០​អាសនៈ​។​

ដូច្នេះ រដ្ឋាភិបាល​នឹងត្រូវ​ជួបប្រទះ​ពេលវេលា​ដ៏​លំបាក​មួយ​ក្នុងការ​គ្រប់គ្រង​ប្រទេស​អេ​ស្ប៉ា​ញ​ដោយ​ពឹង​ផ្អែកលើ​សំឡេងឆ្នោត​នៃ​គណបក្ស​ឆ្វេងនិយម Podemos ព្រមទាំង​គណបក្ស Basque និង​តំណាងរាស្ត្រ​ជាតិនិយម​កាតា​ឡាន​ដែល​គាំទ្រ​ញត្តិ​សម្តែង​ការមិនទុកចិត្ត​របស់​គាត់​។​

ក្រុម​ថ្មី​របស់លោក Sanchez នេះ​ត្រូវ​បានបង្ហាញ​ដល់​ស្តេច Felipe ទី​៦​កាលពី​ព្រឹក​ថ្ងៃ​ពុធ។ ខណៈដែល Brexit កំពុង​ប្រមូលផ្ដុំ​ហើយ​នៅពេលនេះ​អ៊ីតាលី​កំពុង​ដឹកនាំ​ដោយ​រដ្ឋាភិបាល​ប្រឆាំង​អឺរ៉ុប​នោះ​, នាយក​ប្រតិបត្តិ​ថ្មី​របស់​អេ​ស្ប៉ា​ញ​គឺ​គាំទ្រ​សហភាព​អឺរ៉ុប​យ៉ាងច្បាស់​លាស់​៕ AFP

​

Source: Kampuchea Thmey Daily