ភ្នំពេញ ៖ កម្មករសំណង់ម្នាក់ បានធ្លាក់ពីលើសំណង់អគារផ្ទះល្វែងមួយកន្លែង បណ្ដាលឲ្យស្លាប់ភ្លាមៗ ហើយត្រូវបានថៅកែសំណង់ប្រញាប់ប្រញាល់ដឹកចេញពីក្នុងការដ្ឋានសំណង់យ៉ាងរួសរាន់សូម្បីសមត្ថកិច្ចអាជ្ញាធរមូលដ្ឋានក៏ទៅមិនទាន់ផង ដែលហេតុការណ៍នេះ បានកើតឡើងនៅល្ងាចថ្ងៃទី០៥ ខែមិថុនា ឆ្នាំ២០១៨ ស្ថិតនៅក្នុងការដ្ឋានសំណង់អគារកម្ពស់៦ជាន់ភូមិដំណាក់ត្រយឹងសង្កាត់ចោមចៅ២ ខណ្ឌពោធិ៍សែនជ័យ។
ប្រភពព័ត៌មានបានឲ្យដឹងថា ជនរងគ្រោះត្រូវបានស្គាល់ឈ្មោះ ចិត្ត អាយុជាង២០ឆ្នាំស្នាក់នៅកន្លែងកើតហេតុ មានស្រុកកំណើតនៅភូមិបាក់ព្រី ឃុំបឹងដោ ស្រុកព្រះស្ដេច ខេត្តព្រៃវែង។
តាមប្រភពព័ត៌មានពីអ្នកជិតខាងបានឲ្យដឹងថា អគារសំណង់ផ្ទះល្វែងកន្លែងកើតហេតុនៅក្បែរនឹងបង្គោលភ្លើងដែលមានតង់ស្យុងខ្ពស់ធ្វើឲ្យអ្នកនៅក្បែរងាយរងគ្រោះថ្នាក់ណាស់ ដូចគ្នានេះដែរជនរងគ្រោះជាជាងផ្សារដែក ហើយបានឡើងទៅផ្សារនៅជាន់ទី៦ដែលនៅកៀកនឹងខ្សែភ្លើងនោះនៅពេលកំពុងធ្វើការស្រាប់តែឆក់ស្រូបធ្វើឲ្យជនរងគ្រោះធ្លាក់ពីសំណង់អគារមកក្រោម ហើយត្រូវជាមួយនឹងវត្ថុរឹងនៅខាងក្រោមបណ្ដាលឲ្យស្លាប់ភ្លាមតែម្ដង។ ពេលដឹងថា ស្លាប់ភ្លាមៗនោះ ម្ចាស់ការដ្ឋានសំណង់បានប្រញាប់ដឹកសពចេញពីក្នុងការដ្ឋានដោយមិនបានរាយការណ៍ប្រាប់សមត្ថកិច្ចឡើយ លុះក្រោយមកជិតយប់ទើបសមត្ថកិច្ចដឹងចុះទៅបានត្រឹមសាកសួរ។
ពេលនោះរថយន្តសង្គ្រោះមកដល់កន្លែងកើតហេតុដែរ តែដោយសារឃើញថា ជនរងគ្រោះបានដាច់ខ្យល់ស្លាប់ទៅហើយនោះ ទើបត្រឡប់ទៅវិញ ហើយម្ចាស់ការដ្ឋាននិងមេការបានដឹកសពជនរងគ្រោះចេញពីការដ្ឋានទៅបាត់តែម្ដង៕
Source: Kampuchea Thmey Daily
0 Comments