ប្រធានាធិបតីអាម៉េរិក លោក ដូណាល់ បាននិយាយកាលពីថ្ងៃសុក្រថា រូបលោក និងមេដឹកនាំកូរ៉េខាងជើងលោក គីម ជុងអ៊ុន មាន "គីមីសាស្ត្រដ៏អស្ចារ្យ" ហើយបានអះអាងថា ភាពទាល់ច្រក ក្នុងកម្មវិធីអាវុធនុយក្លេអ៊ែរនៅទ្វីបអាស៊ី ជាច្រើនបញ្ហា ត្រូវបានដោះស្រាយ។
លោក ត្រាំ បាននិយាយទៅកាន់អ្នកសារព័ត៌មាន នៅខាងក្រៅសេតវិមានថា លោកបានផ្តល់លេខទូរស័ព្ទផ្ទាល់របស់លោក ទៅឱ្យលោកគីម ដោយបន្ថែមថា "ពេលនេះ គាត់អាចទូរស័ព្ទមកខ្ញុំ ប្រសិនបើគាត់មានការលំបាក"។
"នោះគឺជារឿងសំខាន់ណាស់។” លោក Trump បាននិយាយហើយបន្តថា "យើងមានទំនាក់ទំនងជាមួយគ្នា"។
នៅក្នុងសារវីដេអូមួយ ដែលបានចេញផ្សាយដោយសេតវិមាន លោកត្រាំ បាននិយាយថា កិច្ចប្រជុំ
កំពូលកាលពីថ្ងៃអង្គារ ជាមួយមេដឹកនាំកូរ៉េខាងជើងវ័យក្មេង នៅសិង្ហបុរី គឺ «ដោយបើកចំហ ដោយផ្ទាល់ និងទទួលបានផ្លែផ្កាខ្លាំងណាស់»។
លោកបាននិយាយថា "ប្រសិនបើមានឱកាស ទទួលបានសន្តិភាព, ប្រសិនបើមានឱកាសបញ្ចប់ការគំរាមកំហែង នៃជម្លោះដោយអាវុធនុយក្លេអ៊ែរ នោះ យើងត្រូវតែបន្តការខិតខំឲ្យអស់ទោះវាមានតម្លៃប៉ុន្មានក៏ដោយ" ។
លទ្ធផលនៃកិច្ចប្រជុំនៅសឹង្ហបូរី ដែលលោក គីម និងលោក ត្រាំ បានចុះហត្ថលេខា លើការសន្យាមួយ ដើម្បីឆ្ពោះទៅរកការរំសាយអាវុធនុយក្លេអ៊ែរ ដោយពេញលេញនៅឧបទ្វីបកូរ៉េ ត្រូវបានស្វាគមន៍ ជាមួយការសង្ស័យ ដោយអ្នកសង្កេតការណ៍ជាច្រើន។
លោកគីម មិនទាន់បានបោះជំហានជាក់លាក់ណាមួយ ដើម្បីរុះរើកម្មវិធីនុយក្លេអ៊ែររបស់លោកនៅឡើយទេ។
លោក ត្រាំ បាននិយាយថា លោក Mike Pompeo រដ្ឋមន្ត្រីក្រសួងការបរទេសអាមេរិក នឹងធ្វើការដោយផ្ទាល់ ជាមួយកូរ៉េខាងជើងនៅក្នុងប៉ុន្មានសប្តាហ៍ និងប៉ុន្មានខែខាងមុខនេះ ដើម្បី "អនុវត្តកិច្ចព្រមព្រៀងគ្មានអាវុធនុយក្លេអ៊ែរ"។
លោកត្រាំ បានបន្ថែមថា "ទន្ទឹមនឹងនេះដែរ ការដាក់ទណ្ឌកម្ម នឹងនៅតែបន្ត”។
ការសម្រេចជាឯកតោភាគីមួយ របស់លោក ត្រាំ ដើម្បីកាត់បន្ថយភាពតានតឹង ដោយលុបចោលសមយុទ្ធយោធារួមគ្នា រវាងកងកម្លាំងអាមេរិក និងកូរ៉េខាងត្បូង ដែលធ្វើឲ្យមន្ត្រីយោធានៃប្រទេសទាំងសងខាង មានការភ្ញាក់ផ្អើលយ៉ាងខ្លាំង។
ប៉ុន្តែលោក ត្រាំ បានរំលឹកឡើងវិញថា នៅពេលលោកចូលកាន់តំណែងកាលពីឆ្នាំមុន លោកបារ៉ាក់អូបាម៉ា បានព្រមានថា ការគំរាមកំហែងដោយមីស៊ីល និងនុយក្លេអ៊ែររបស់កូរ៉េខាងជើង គឺជាបញ្ហាដ៏គ្រោះថ្នាក់បំផុត របស់សហរដ្ឋអាមេរិក។
"ខ្ញុំបានដោះស្រាយបញ្ហានោះ” លោក ត្រាំ បានប្រាប់អ្នកយកព័ត៌មាន រួចបន្តថា “ឥឡូវនេះយើងកំពុងធ្វើឱ្យវាក្លាយទៅជាការចងចាំ ប៉ុន្តែបញ្ហានោះ ត្រូវបានដោះស្រាយបានយ៉ាងច្រើន”។
លោកបានបន្ថែមថា "យើងបានចុះហត្ថលេខាលើឯកសារដ៏សំខាន់មួយ។ ប៉ុន្តែអ្វីដែលសំខាន់ជាងឯកសារនេះ គឺខ្ញុំមានទំនាក់ទំនងល្អជាមួយលោក គីម ជុងអ៊ុន”។
“អាចជា ផ្លូវថ្មីទៅកាន់សន្តិភាព”
រដ្ឋមន្ត្រីការពារជាតិលោក Jim Mattis កាលពីថ្ងៃសុក្របានសរសើរ "ផ្លូវថ្មីដែលអាចទៅរួចមួយ ដើម្បីសន្តិភាព" ជាមួយកូរ៉េខាងជើង ប៉ុន្តែបានព្រមានថា សហរដ្ឋអាមេរិក ត្រូវតែប្រុងប្រយ័ត្នចំពោះប្រទេស ដែលកំពុងស្វែងរកអាវុធនុយក្លេអ៊ែរ។
ប៉ុន្តែលោក ត្រាំ ហាក់ដូចជាចង់ទទួលបាន ជ័យជំនះការទូតឆាប់រហ័ស ហើយការផ្អាកការធ្វើលំហាត់សមយុទ្ធយោធាអាម៉េរិក នៅនៅលើឧបទ្វីបកូរ៉េ គឺជាសម្បទានដ៏សំខាន់ចំពោះទីក្រុងព្យុងយ៉ាង និងប្រទេសចិន ដែលជាគូប្រជែងរបស់ទីក្រុងវ៉ាស៊ីនតោន។
អ្នករិះគន់លោក ត្រាំ មួយចំនួន បានថ្កោលទោសការសម្រេចចិត្តរបស់គាត់ ក្នុងការបញ្ឈប់អ្វីដែលលោកប្រធានាធិបតីហៅថា "ល្បែងសង្គ្រាម" ជាមួយកូរ៉េខាងត្បូង ពាក្យសាមញ្ញ “សមយុទ្ធយោធា” ដែលមន្ត្រីអាមេរិកបានច្រានចោលកាលពីលើកមុន។
លោក John McCain សមាជិកព្រឹទ្ធសភា គណបក្សសាធារណរដ្ឋបានថ្លែងថា “ការធ្វើសម្បទាន ដែលមិនចាំបាច់ និងមិនមានការខកចិត្ត គឺមិនមែនជាការចង់បាន របស់យើងនោះទេ ហើយវាគឺជាយុទ្ធសាស្ត្រចរចាមិនល្អ”។
“ថាតាមដូចសេក នូវពាក្យឃោសនារបស់ចិន និងកូរ៉េខាងជើង ដោយនិយាយថា ការធ្វើសមយុទ្ធរួមគឺជា "ការបង្កហេតុ" ធ្វើឱ្យអន្តរាយដល់សន្តិសុខ និងសម្ព័ន្ធភាពរបស់យើង”។
កងកម្លាំងអាម៉េរិក និងកូរ៉េខាងត្បូង បានហ្វឹកហ្វឺនរួមគ្នាអស់ជាច្រើនទសវត្សរ៍មកហើយ ហើយជាទៀងទាត់បានហាត់សម នូវអ្វីៗទាំងអស់ចាប់តាំងពីការចុះចត នៅឆ្នេរសមុទ្រនៅភាគខាងជើង ក្នុងការវាយប្រហារ របបកូរ៉េខាងជើង។
ទីក្រុងព្យុងយ៉ាង ជាធម្មតាមានប្រតិកម្មយ៉ាងខ្លាំង ចំពោះសមយុទ្ធរួមនេះ។ បន្ទាប់ពីការធ្វើសមយុទ្ធកាលពីឆ្នាំមុន កូរ៉េខាងជើង បានបាញ់មីស៊ីលផ្លោង ទៅលើប្រទេសជប៉ុន ដែលបង្កឱ្យមានការភ្ញាក់ផ្អើលជាសកល និងបង្កើតឱ្យមានសង្គ្រាមការទូតរវាងលោក ត្រាំ និងលោក គីម។
ភាពឃោរឃៅទាំងនោះ ឥឡូវនេះហាក់ដូចត្រូវបានបញ្ចប់ បន្ទាប់ពីជំនួបកំពូលលោក ត្រាំ បានសរសើរដល់លោក គីម ខណៈដែលពិភពលោក បានចោទប្រកាន់ពីបទធ្វើទារុណកម្ម និងបង្អត់អាហារ ដល់ប្រជាពលរដ្ឋរាប់ពាន់នាក់របស់ខ្លួន៕
Source: Kampuchea Thmey Daily
0 Comments