ភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងថា ទណ្ឌិត សម រង្ស៊ី មានតែម្យ៉ាង គឺទទួលស្គាល់កំហុស ហើយទទួលយកកំហុសនោះទៅតែប៉ុណ្ណោះ បើមិនដូច្នោះទេ ហក់ខ្លាំងត្រូវខ្លាំង ហក់តិចត្រូវតិច។
អ្នកនាំពាក្យគណបក្សប្រជាជនកម្ពុជាលើកឡើងបែបនេះ តាមរយៈសាអេឡិកត្រូនិកតេឡេក្រាមកាលពីព្រឹកថ្ងៃទី១៦ ខែមិថុនា ឆ្នាំ២០១៨ បន្ទាប់ពីមានការលើកឡើងពីការបែររកការចរចារបស់ទណ្ឌិត សម រង្ស៊ី និងខណៈមានសេណារីយោលើកឡើងពីការចង់ឲ្យមានការធ្វើប្រជាមតិ លុបចោលបរិច្ឆេទនៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទ២៩ ខែកក្កដា ឆ្នាំ២០១៨ខាងមុខ។
លោក សុខ ឥសាន លើកឡើងថា នយោបាយឈ្នះឈ្នះ ត្រូវបានសម្តេចតេជោ ហ៊ុ សែន បង្កើតឡើង ដើម្បីធ្វើឲ្យអង្គការចាត់តាំងនយោបាយ និងយោធាខ្មែរក្រហមរលំរលាយ ដើម្បីបញ្ចប់សង្គ្រាមរ៉ាំរ៉ៃនៅក្នុងប្រទេសកម្ពុជា នាំមកនូវសន្តិភាពទាំងស្រុងជូនជាតិមាតុភូមិកម្ពុជា និងប្រជាជនកម្ពុជា ដើម្បីនាំមកនូវសិទ្ធិសេរីភាពគ្រប់បែបយ៉ាងមកវិញ និងជីវភាពរស់នៅប្រកបដោយប្រជាធិបតេយ្យ និងមានការគោរពសិទ្ធិមនុស្ស ដែលបានបាត់បង់ទៅនោះ ដូចដែលប្រជាជនកម្ពុជា បានទទួលគ្រប់គ្នាតាំងពីឆ្នាំ១៩៧៩មក ប៉ុន្តែនយោបាយឈ្នះឈ្នះ មិនត្រូវបានយកមកអនុវត្តនៅក្នុងបរិបទនៃប្រទេសកម្ពុជា ដែលកំពុងមានការគោរពតាមគោលការណ៍លទ្ធិប្រជាធិបតេយ្យ និងនីតិរដ្ឋឡើយ អាចអនុវត្តត្រឹមនយោបាយបង្រួបបង្រួមជាតិ និងវប្បធម៌សន្ទនា ដើម្បីដោះស្រាយបញ្ហាជាប់គាំងនយោបាយ ដើម្បីនាំមកនូវប្រក្រតីភាពសង្គមទ្បើងវិញតែប៉ុណ្ណោះ។
តាមលោក សុខ ឥសាន ជាការគួរឲ្យសោកស្តាយ ដែលនយោបាយទាំងនេះ គណបក្សប្រជាជនកម្ពុជាបានខិតខំបង្កើតឡើង ហើយទទួលបានជោគជ័យជាបន្តបន្ទាប់ បែរជាត្រូវរលាយសាបសូន្យទៅវិញ ដោយសារស្នាដៃរបស់ទណ្ឌិត សម រង្សី និងក្រុមអតីតមេដឹកនាំអតីតបក្សប្រឆាំង ធ្វើឲ្យពួកនេះជាប់ពិរុទ្ធ ដោយសារល្មើសច្បាប់ធ្ងន់ធ្ងរ ហើយនយោបាយបង្រួបបង្រួមជាតិ និងវប្បធម៌សន្ទនា ត្រូវបំផ្លាញចោលទៀត។ លោកបន្តថា “ឥឡូវដល់រើខ្លួនមិនរួច បែរជាងាកមករកចរចា ដើម្បីបានរស់មានដង្ហើមឡើងវិញ ដែលជាករណីមិនអាចជាដាច់ខាត មានតែត្រូវទទួលស្គាល់ការពិត ហើយសុខចិត្តទទួលយកទៅតែប៉ុណ្ណោះ អត់មានអានុភាពណាអាចជួយបានឡើយ។ នៅក្នុងសង្គមនីតិរដ្ឋ ជនណាប្រព្រឹត្តខុសច្បាប់ត្រូវទទួលត្រូវចំពោះមុខច្បាប់ដោយខ្លួនឯងជាចាំបាច់។ ដូច្នេះការលើកយកនយោបាយឈ្នះឈ្នះ មកដាក់ជារបៀបវារៈនាពេលនេះ គឺជាឧបាយកលទុច្ចរិត ចង់បំផ្លាញលទ្ធិប្រជាធិបតេយ្យ និងនីតិរដ្ឋតែប៉ុណ្ណោះ”។
ចំណែកការចង់ឲ្យមានការធ្វើប្រជាមតិ លុបចោលបរិច្ឆេទនៃការបោះឆ្នោតនោះ លោក សុខ ឥសាន បញ្ជាក់ថា វាគ្រាន់តែជាឧបាយកលរំលោភរដ្ឋធម្មនុញ្ញ ដើម្បីជួយយឹតយោងពួកក្បត់ជាតិ ឲ្យរួចខ្លួនប៉ុណ្ណោះ ដូច្នេះរាល់ការលើកឡើង ផ្ទុយពីខ្លឹមសារច្បាប់រដ្ឋធម្មនុញ្ញ និងច្បាប់ស្តីពីការបោះឆ្នោត ដែលចង់បំផ្លាញការបោះឆ្នោត គឺជាបញ្ហាមិនអាចទទួលយកបានជាដាច់ខាត។ លោកបន្តថា សេណារីយោ ដែលលើកឡើង គឺគ្រាន់តែជាការឆ្កួតលីលាតែប៉ុណ្ណោះ។
អ្នកនាំពាក្យរូបនោះបញ្ជាក់ថា “ដល់ដំណាក់កាលចុងក្រោយហើយ ចង់ហក់លោតអីទៀត ហក់លោតទៅ បានមួយសេរី តែមិនអាចបោកបញ្ឆោតគណបក្សប្រជាជនកម្ពុជាបានជាដាច់ខាត ទោះតាមរូបភាព ខ្លឹមសារ និងទម្រង់ណាក៏ដោយ អត់បានផលទេ មានតែម្យ៉ាង គឺទទួលស្គាល់កំហុស ហើយទទួលយកកំហុសនោះទៅតែប៉ុណ្ណោះ។ បើមិនដូច្នោះទេ ហក់ខ្លាំងត្រូវខ្លាំង ហក់តិចត្រូវតិចតាមសំណូមពរ”៕
Source: Kampuchea Thmey Daily
0 Comments