កំពង់ចាម ៖ កម្លាំង សមត្ថកិច្ចនគរបាលស្រុក កំពង់សៀម បានចាប់ខ្លួន ជនសង្ស័យម្នាក់ និងនាំមកអធិការដ្ឋាន ដើម្បីបំពេញសំណុំឯកសារ ពាក់ព័ន្ធនឹងករណីដុតសាលាឆាន់កាលពីថ្ងៃទី១១ ខែមិថុនា ឆ្នាំ២០១៨ វេលាម៉ោង០២និង១៥នាទី ទៀបភ្លឺ វត្តក្រូចសើច ស្ថិតនៅភូមិក្រូចសើច ឃុំហាន់ជ័យ ស្រុកកំពង់សៀម ខេត្តកំពង់ចាម។
ប៉ូលិសមូលដ្ឋាន បានអោយដឹងថា ភ្លាមៗនោះ កម្លាំងនគរបាល បង្ការពន្លត់អគ្គីភ័យស្រុកកំពង់សៀម បានសហការជាមួយកម្លាំងបង្ការពន្លត់អគ្គិភ័យនៃស្នងការដ្ឋាននគរបាលខេត្ត បានចេញរថយន្តចំនួន៣គ្រឿង ទៅជួយ អន្តរាគមន៍ពន្លត់ ដោយប្រើប្រាស់ទឹកអស់ ចំនួន០៧រថយន្ត ទើបរលត់។
ប៉ូលិសបានបន្តថា សាលាឆាន់ដែលត្រូវ អគ្គិភ័យឆាបឆេះមានទំហំ ទទឹង១០ម៉ែត្រ និងបណ្តោយ២១ម៉ែត្រ ធ្វើអំពីឈើប្រក់ក្បឿង។
ប្រភពព័ត៌មាននៅកន្លែងកើតហេតុ បានអោយដឹងថា អគ្គិភ័យនេះ បានធ្វើអោយខូចខាតសម្ភារៈដូចជា :ទូដាក់សម្ភារៈធ្វើអំពីឈើមួយចំនួនធំ ចានឆ្នាំងមួយចំនួនធំ ទូកឈើចំនួន០១ គ្រែដេកចំនួន០៥។
ប៉ូលិសបានអោយដឹងថា អគ្គិភ័យនេះបង្កទ្បើងដោយឈ្មោះ ពៅ សុភាព ភេទប្រុស អាយុ៣២ឆ្នាំ ជាតិខ្មែរ មានទីលំនៅភូមិល្វាទេ ឃុំហាន់ជ័យ ស្រុកកំពង់សៀម ខេត្តកំពង់ចាម ជាអ្នកដុតបំផ្លិចបំផ្លាញ។
ប្រភពដដែលបាន បន្តថា បន្ទាប់មកកម្លាំងសមត្ថកិច្ចជំនាញ នគរបាលស្រុកកំពង់សៀម សហការជាមួយកម្លាំងសមត្ថកិច្ចនគរបាលប៉ុស្តិ៍ហាន់ជ័យ ចុះដល់កន្លែងកើតហេតុធ្វើការស្រាវជ្រាវ និងបង្ក្រាបបានជនសង្ស័យឈ្មោះ ពៅ សុភាព ភេទប្រុស អាយុ៣២ឆ្នាំ មានទីលំនៅភូមិល្វាទេ ឃុំហាន់ជ័យ ស្រុកកំពង់សៀម ខេត្តកំពង់ចាម បាននៅនឹងកន្លែង កើតហេតុ ហើយនាំមកកាន់អធិការដ្ឋាននគរបាល ស្រុកកំពង់សៀម ដើម្បីធ្វើការសួរនាំរៀបចំកសាង ឯកសារសំណុំរឿងតាមនីតិវិធី៕
Source: Kampuchea Thmey Daily
0 Comments