រតនគិរី ៖ កម្លាំងអធិការនគរបាលក្រុងបានលុងសហការជាមួយកម្លាំងប៉ុស្តិ៍សង្កាត់បឹងកន្សែង បានធ្វើការចុះបង្ក្រាបករណី លេងល្បែងស៊ីសងបញ្ជល់មាន់ដោយខុសច្បាប់មួយកន្លែង។
ការចុះបង្ក្រាបបញ្ជល់មាន់នេះ ធ្វើឡើងកាលពីវេលាម៉ោង២និង៣០នាទីនាទីរសៀល ថ្ងៃអាទិត្យ ៥កើត ខែបឋមាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែមិថុនា ឆ្នាំ២០១៨ នៅត្រង់ចំណុចភូមិអូរកន្តិល សង្កាត់បឹងកន្សែង ក្រុងបានលុង ខេត្តរតនគិរី។
នគរបាលក្រុងបានលុងបានឲ្យដឹងថា ក្នុងប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យ៣នាក់ទី១-ឈ្មោះ ព្រំ ញ៉េប ភេទប្រុស អាយុ៤៧ឆ្នាំ ជនជាតិខ្មែរ មានទីលំនៅភូមិ អូរកន្សែង សង្កាត់បឹងកន្សែង ក្រុងបានលុង ខេត្តរតនគិរី មុខរបរ ពលរដ្ឋ។ ទី២-ឈ្មោះ ង្វៀង វាំងប៉ិន ភេទប្រុស អាយុ៣៨ឆ្នាំ ជនជាតិវៀតណាម មុខរបរ កម្មករ។ ទី៣-ឈ្មោះ ង្វៀង យ៉ាងតឹង ភេទប្រុស អាយុ ៥២ឆ្នាំ ជនជាតិវៀតណាម អ្នកទាំងពីរ មានទីលំនៅភូមិ ជ័យជំនះ សង្កាត់ ឡាបានសៀក ក្រុងបានលុង ខេត្តរតនគិរី មុខរបរ កម្មករសំណង់។
ក្រោយការឃាត់ខ្លួនសមត្ថកិច្ចបានដកហូតសម្ភារៈរួមមាន:១-ម៉ូតូចំនួន៤គ្រឿង ២-មាន់ជល់ចំនួន៥ក្បាល។
បច្ចុប្បន្ន ជនសង្ស័យ សមត្ថកិច្ច កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលក្រុងបានលុង ដើម្បីរៀបចំកសាងសំណុំរឿងបញ្ជូនទៅអយ្យការសាលាដំបូងខេត្តចាត់ការតាមនីតិវិធីច្បាប់៕
Source: Kampuchea Thmey Daily
0 Comments