រដ្ឋមន្ត្រីក្រសួងការពារជាតិចិនទស្សនកិច្ចទីបញ្ជាការកងពលតូចលេខ៧០

Cambodia News June 18, 2018

ភ្នំពេញ ៖ នៅវេលាម៉ោង៩និង៣០នាទី ព្រឹកថ្ងៃទី១៨ ខែមិថុនា ឆ្នាំ២០១៨នេះ ឯកឧត្តម នាយឧត្តមសេនីយ៍ វៃ ហ្វេហេ (WEI FENGHE) សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិ នៃសាធារណរដ្ឋប្រជាមានិតចិន បានដឹកនាំគណៈប្រតិភូ អញ្ជើញមកបំពេញទស្សនកិច្ចផ្លូវការ នៅទីបញ្ជាការកងពលតូចលេខ៧០ ហើយទស្សនកិច្ចនេះ មានការទទួលស្វាគមន៍ផ្ទាល់ពីឯកឧត្តម ឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចថ្មើរជើងលេខ៧០ ព្រមទាំងមេបញ្ជាការរងនាយទាហាន ពលទាហានយ៉ាងច្រើន។

សូមបញ្ជាក់ថា ទស្សនកិច្ចរបស់ឯកឧត្តម នាយឧត្តមសេនីយ៍ វៃ ហ្វេហេ (WEI FENGHE) សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិ នៃសាធារណរដ្ឋប្រជាមានិតចិន នៅព្រះរាជាណាចកម្ពុជា រយៈពេល៥ថ្ងៃនេះ (ចាប់ពីថ្ងៃទី១៦ ដល់ថ្ងៃទី២០ ខែមិថុនា ឆ្នាំ២០១៨) ធ្វើឡើងតាមការអញ្ជើញរបស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៃព្រះរាជាណាចក្រកម្ពុជា។

តាមកម្មវិធី ឯកឧត្តម ប្រធានគណៈប្រតិភូ នឹងអញ្ជើញមកដល់ អាកាសយានដ្ឋានអន្តរជាតិភ្នំពេញ នៅយប់ថ្ងៃទី១៦ ខែមិថុនា ឆ្នាំ២០១៨ ហើយនៅថ្ងៃបន្ទាប់ គណៈប្រតិភូ នឹងអញ្ជើញទៅទស្សនានៅទីតាំងមួយចំនួន។ អំឡុងពេលទស្សនកិច្ចនៅកម្ពុជា ឯកឧត្តម ប្រធានគណៈប្រតិភូ នឹងជួបពិភាក្សាការងារជាមួយ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងបន្តជួបសម្តែងការគួរសមជូន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

សម្រាប់កម្មវិធីថ្ងៃទី១៩ ខែមិថុនា ឆ្នាំ២០១៨ សម្តេចពិជ័យសេនា ទៀ បាញ់ និង ឯកឧត្តម នាយឧត្តមសេនីយ៍ វៃ ហ្វេនហេ នឹងអញ្ជើញជាអធិបតីរួមគ្នា ក្នុងពិធីបើកសម្ពោធពិព័រណ៍យោធារួមគ្នាកម្ពុជា-ចិន នៅមជ្ឈមណ្ឌលពិព័រណ៍ និងសន្និបាតកោះពេជ្រ រាជធានីភ្នំពេញ ហើយថ្ងៃបន្ទាប់ ឯកឧត្តម នាយឧត្តមសេនីយ៍ WEI FENGHE និងគណៈប្រតិភូ នឹងអញ្ជើញចាកចេញពីប្រទេសកម្ពុជា នៅទី២០ ខែមិថុនា ឆ្នាំ២០១៨៕