ភ្នំពេញ ៖ កម្លាំងប៉ុស្តិ៍នគរបាលរដ្ឋបាលពន្សាំង បានធ្វើការឃាត់ខ្លួនជនសង្ស័យចំនួន០២នាក់ ស្ដីពីករណីប្រើប្រាស់ដោយខុសច្បាប់ នូវសារធាតុញៀន នៅចំណុចគុម្ពោតព្រៃមួយកន្លែង ផ្លូវលំ ភូមិទួល សង្កាត់ពន្សាំង ខណ្ឌព្រែកព្នៅ រាជធានីភ្នំពេញ កាលពីវេលាម៉ោង១៩និង៣០នាទី ថ្ងៃទី១៤ ខែមិថុនា ឆ្នាំ២០១៨។
សមត្ថកិច្ចបានឲ្យដឹងថា ជនសង្ស័យទី០១ ឈ្មោះ រី រិទ្ធ ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះលេខ៣១ ផ្លូវបេតុង៤២ ភូមិទួល សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។ ជនសង្ស័យទី២ឈ្មោះ រី រិន ភេទប្រុស អាយុ២៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះលេខ៣១ ផ្លូវបេតុង៤២ ភូមិទួល សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។ ក្នុងការបង្ក្រាបនោះ សមត្ថកិច្ចបានចាប់យក ឧបករណ៍សម្រាប់ប្រើប្រាស់គ្រឿងញៀនមួយចំនួន។
សមត្ថកិច្ចបានឲ្យដឹងទៀតថា មុនពេលកើតហេតុ កម្លាំងប៉ុស្តិ៍នគរបាលរដ្ឋបាលពន្សាំង បានធ្វើការល្បាតក្នុងភូមិសាស្ត្រ ក៏មានប្រជាពលរដ្ឋរាយការណ៍ថា មានករណីប្រើប្រាស់ដោយខុសច្បាប់នូវសារធាតុញៀន ភ្លាមនោះកម្លាំងយើងក៏បានចុះដល់ចំណុចកើតហេតុខាងលើ ក៏ប្រទះឃើញជនសង្ស័យចំនួន០២នាក់ខាងលើ កំពុងតែធ្វើសកម្មភាពប្រើប្រាស់គ្រឿងញៀន។ ភ្លាមនោះកម្លាំងយើងក៏ធ្វើការឃាត់ខ្លួនរួមវត្ថុតាង និងធ្វើតេស្តស្វែងរកសារធាតុញៀនក្នុងទឹកនោម ចំពោះមុខជនសង្ស័យខាងលើជាលទ្ធផលវិជ្ជមាន(មានសារធាតុញៀនក្នុងទឹកនោម)។
បច្ចុប្បន្ន ជនសង្ស័យទាំង០២នាក់ខាងលើ ត្រូវបានបញ្ជូនមកអធិការដ្ឋាននគរបាលខណ្ឌព្រែកព្នៅ រួមនឹងវត្ថុតាងយកមកធ្វើការសាកសួរ និងកសាងសំណុំរឿងបញ្ជូនទៅតុលាការទៅតាមផ្លូវច្បាប់៕
Source: Kampuchea Thmey Daily
0 Comments