CNCបើក”កំពូលអ្នកប្រដាល់កណ្តាប់ដៃដែក ISI Palm”រដូវកាលទី២

ក្រុមហ៊ុនISI PALM សហការជាមួយទូរទស្សន៍CNC បានបើកការប្រកួតប្រដាល់ដណ្តើមពានរង្វាន់“កំពូលអ្នកប្រដាល់កណ្តាប់ដៃដែក ISI Palm “ រដូវកាលទី២ ទម្ងន់៦៥គីឡូក្រាម ដែលចាប់ផ្តើមពីថ្ងៃទី១០ ខែមិថុនា ឆ្នាំ២០១៨នេះតទៅ ។

ក្នុងសន្និសីទកាសែតនាព្រឹកថ្ងៃទី១០មិថុនា២០១៨ បានឲ្យដឹងថា នេះគឺជាការចាប់ផ្តើមថ្មីមួយទៀត ដែលស្ថានីយទូរទស្សន៍ CNC និងក្រុមហ៊ុន ISI ក្រោមការជួយជ្រោមជ្រែងដោយសហព័ន្ធកីឡាប្រដាល់គុនខ្មែរ បានបង្កើតកម្មវិធីប្រកួតជ្រើសរើសជើងឯកទំងន់៦៥ គីឡូក្រាម ដោយមានកីឡាករចំនួន៨នាក់ គឺខ្មែរ៤នាក់ និង ថៃ៤នាក់។

កីឡាករខ្មែរ៤នាក់នោះ មានមឿន សុខហ៊ុច ក្លិបពុទ្ធសេរីវង្សកីឡា ,ជឹម ចិត្រា ក្លិបខ្លារខិនមានរិទ្ធ , ឆៃ សារ៉ា សមាគមកីឡាប្រដាល់ក្រសួងការពារជាតិ និង ជា សំនៀង ក្លិបកងពលតូចទ័ពឆ័ត្រយោង៩១១ ។ ចំណែកកីឡាករថៃ៤នាក់វិញ មានPhlay Noy Por.Pao In , Dinnapho Sor.Thayalak , Niv Vangchan Pakornsurin និង Kreang Krai Tor.Seilachai ។

លោក ហួរ រតនៈ ដែលជាប្រធានផ្នែកលក់ក្រុមហ៊ុនCNC បាននិយាយថា ដើម្បីជួយគ្នាក្នុងការអភិវឌ្ឍន៍វិស័យកីឡាប្រដាល់គុនខ្មែរ អោយកាន់តែមានភាពរីកចម្រើន ក៏ដូចជាពង្រីកមុខមាត់ថែមទៀតលើឆាកអន្តរជាតិ ស្របតាមទិសដៅរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខ។ នេះគឺជាកម្មវិធីជ្រើសរើសជើងឯកនិងពង្រឹងសមត្ថភាពអ្នកប្រដាល់គុនខ្មែរក្នុងប្រភេទទម្ងន់៦៥គីឡូក្រាម ដែលយើងបានសម្រិតសម្រាំងយកមកធ្វើការប្រកួត។ លោកបន្តថា CNC នឹងមិនបញ្ឈប់សកម្មភាពត្រឹមនេះទេ គឺ CNCនឹងធ្វើការអភិវឌ្ឍន៍ទៅមុខបន្ថែមទៀត ក្នុងការបង្កើតកម្មវិធីថ្មីៗ ពេញនិយមអោយបានច្រើន ដើម្បីបំរើអារម្មណ៍ទស្សនិកជនអោយកាន់តែសំបូរបែប ។
លោក សុខ វិចិត្រ នាយកទីផ្សារនិងផ្នែកលក់ក្រុមហ៊ុន ISI Palm បានអោយដឹងថា ការដែលក្រុមហ៊ុនលោកមករួមសហការជាមួយCNC បើកកម្មវិធីប្រដាល់ ISI Palm គឺក្នុងគោលបំណងតែមួយគត់ គឺចង់ជួយជ្រោមជ្រែងនិងលើកកម្ពស់វិស័យកីឡាប្រដាល់គុនខ្មែរ ឲ្យមានឈ្មោះបោះសម្លេងបន្ថែមទៀត នៅលើឆាកអន្តរជាតិ ក៏ដូចជួយអោយកីឡាករប្រដាល់គុនខ្មែរ កាន់តែមានការរីកចំរើនផ្នែកស្មារតី និង បង្កើនជីវភាពមួយកម្រិតថែមទៀត តាមរយះការបានឡើងប្រកួត ហើយក៏រួមចំណែកជួយដល់មន្ត្រីបច្ចេកទេសរបស់សហព័ន្ធផងដែរ ។

លោក សុខ វិចិត្រ បញ្ជាក់ទៀតថា អាយ អេស អាយ ផាម រួមសហការ ជាមួយ ស្ថានីយ៍ទូរទស្សន៍ CNC ផលិតនូវកម្មវិធីប្រកួតកីឡាប្រដាល់ "ពានរង្វាន់អន្តរជាតិ កំពូលអ្នកប្រយុទ្ធកណ្តាប់ដៃដែក ISI PALM " រដូវកាលទី២ ដើម្បីបន្តលើកស្ទួយនិង អភិរក្សវិស័យកីឡាប្រដាល់ក្បាច់ខ្មែរបុរាណ ក៏ដូចជាបំរើអារម្មណ៍របស់ទស្សនិកជនដែលស្នេហាវិស័យកីឡាប្រដាល់ផងដែរ។

កម្មវិធីប្រកួតកីឡាប្រដាល់ "ពានរង្វាន់អន្តរជាតិ កំពូលអ្នកប្រយុទ្ធកណ្តាប់ដៃដែក ISI PALM" រដូវកាលទី២ នឹងប្រព្រឹត្តទៅជារៀងរាល់ថ្ងៃអាទិត្យ ចាប់ពីវេលាម៉ោង១១ រហូតដល់ម៉ោង ១ និង ៣០នាទីរសៀលតទៅ ដែលមានផ្សាយផ្ទាល់លើកញ្ចក់ទូរទស្សន៍ CNC និងFacebook ផ្លូវការរបស់ក្រុមហ៊ុន ISI STEEL ផងដែរ។

លោកឧត្តមសេនីយ៍តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានសំណូមពរដល់មន្ត្រីបច្ចេកទេស អាជ្ញាកណ្ដាល-ចៅក្រម ត្រូវតែខិតខំបំពេញការងារឲ្យអស់ពីសមត្ថភាព ត្រូវមានភាពសុចរឹតក្នុងការងារ ព្រោះនេះជាជាការងារមួយដែលទាំងអស់គ្នា សុទ្ធតែបានទទូលផលប្រយោជន៍។ចំពោះកីឡាករវិញ ត្រូវថែរក្សាសុខភាព ហ្វឹកហាត់ អោយបានល្អ ហើយក៏ត្រូវប្រកាន់អត្តចារឹកឲ្យបានល្អផងដែរ ។

កម្មវិធីប្រដាល់ “កំពូលអ្នកប្រដាល់កណ្តាប់ដៃដែក ISI Palm “ដែលចាប់ផ្តើមនៅថ្ងៃទី១០មិថុនានេះ សម្រាប់ការប្រកួតថ្ងៃដំបូងមាន៥គូ ដែលមានគូខ្មែរនិងខ្មែរចំនួន៣គូ និងគូជម្រុះពានរង្វាន់អន្តរជាតិ កំពូលអ្នកប្រយុទ្ធកណ្តាប់ដៃដែក ISI PALM ខ្មែរ-ថៃចំនួន២គូ។

នៅក្នុងការប្រកួតគូជម្រុះពានរង្វាន់ពីរគូនោះ ជឹម ចិត្រា អ្នកប្រដាល់ក្លិបខ្លារខិនមានរិទ្ធ បានវាយចាញ់អ្នកប្រដាល់ថៃឈ្មោះ Dinnapho Sor.Thayalak ក្នុងទឹកទី៣។ ចំពោះមួយគូទៀត មឿន សុខហ៊ុច ក្លិបពុទ្ធសេរីវង្សកីឡា បានផ្តួលអ្នកប្រដាល់ថៃឈ្មោះPhlay Noy Por.Pao In អោយបោះបង់ចោលការប្រកួតក្នុងទឹកទី៣៕