ម៉ន ព្រហ្ម​ម៉ាញ និង លាភ រដ្ឋា ឈ្នះ​ជុំ​ដំបូង​នៃ​ការប្រកួត​ជម្រុះ​ពានរង្វាន់​Knock Out series by K.cement ទម្ងន់​៦០​គីឡូក្រាម​

អ្នក​ប្រដាល់​ម៉ន ព្រហ្ម​ម៉ាញ ក្លិប​ការិយាល័យ​ទី​៥ កងទ័ពជើងគោក បាន​វាយ​ឈ្នះ​អ្នក​ប្រដាល់​លីន វិ​រៈ ក្លិប​បូរី​រាជសីហ៍​មាន​រិ​ទ្ធ​ដោយ​ពិន្ទុ ក្នុងការ​ប្រកួត​ជម្រុះ​ជុំ​ដំបូង​នៃ​ការប្រកួត​ជម្រុះ​ពានរង្វាន់​Knock Out series by K.cement ទម្ងន់​៦០​គីឡូក្រាម កាលពី​យប់​ថ្ងៃ​សោរិ៍​ទី​០៩ ខែ​មិថុនា ​ឆ្នាំ​២០១៨ លើ​សង្វៀន TV5 ព្រែកកំពឹស។

លីន វិ​រៈ គេ​វាយ​ចាញ់​ម៉ន ព្រហ្ម​ម៉ាញ ដាច់​តែម្តង ។ នៅក្នុង​ទឹក​ទី​១ លីន វិ​រៈ ត្រូវ​ម៉ន​ព្រហ្ម​ម៉ាញ វាយ​ត្រូវ​ឡើង​ចង់​វង្វេងទិស តែ​យ៉ាងណា​ដោយសារ វិ​រៈ គេ​មាន​ស្មារតី​រឹងមាំ គឺ​ខំប្រឹង​តស៊ូ​ទប់​ការវាយប្រហារ ព្រមទាំង​វាយ​សង​ទៅលើ​ម៉ន​ព្រហ្ម​ម៉ាញ ខ្លះៗ​វិញ​ដែរ ។​លីន វិ​រៈ គេ​ប្រកួត​រហូតដល់​ចប់​ទឹក​ទី​៣ និង​ចាញ់​ម៉ន ព្រហ្ម​ម៉ាញ ត្រឹម​ពិន្ទុ​ប៉ុណ្ណោះ ។
​
គួរ​បញ្ជាក់ថា ការប្រកួត​ជម្រុះ​ក្នុង​ដំណាក់​ទី​១​នេះ គឺ​ប្រកួត​បី​ទឹក ក្នុង​មួយ​ទឹក​មាន​៣​នាទី សំរាក​២​នាទី អ្នក​ដែល​ចាញ់​គឺ​ត្រូវ​ជ្រុះ​ធ្លាក់​ហាលអាវ​ហើយ ។​
​ដូច្នេះ លីន វិ​រៈ គេ​ត្រូវ​ជ្រុះ​ធ្លាក់​ចេញពី​ការប្រកួត​ជម្រុះ​ពានរង្វាន់​Knock Out series by K.cement ទម្ងន់​៦០​គីឡូក្រាម ត្រឹម​ដំណាក់កាល​ទី​១​នេះ ។ ឯ ម៉ន ព្រហ្ម​ម៉ាញ គេ​នឹងត្រូវ​នៅ​បន្ត​ការប្រកួត​ក្នុងដំណាក់កាល​ទី​២​ទៀត ។​
​
ចំណែក លាភ រដ្ឋា អ្នក​ប្រដាល់​ក្លិប​ដី​ឡូ​តិ៍​មាន​រិ​ទ្ធ​ខេត្តបន្ទាយមានជ័យ គេ​ក៏បាន​វាយ​ឈ្នះ ចាន់ រក្សា អ្នក​ប្រដាល់​ក្លិប​អេ​ភូ​ថង​កីឡា ដោយ​ពិន្ទុ​ដែរ ក្នុងការ​ប្រកួត​ជម្រុះ​ដំណាក់កាល​ទី​១​នេះ ។​ចាន់ រក្សា ត្រូវ​លាភ រដ្ឋា ដាល់​ដួល​ក្នុង​ទឹក​ទី​២ ត្រូវ​អាជ្ញាកណ្តាល​រាប់​៨ ។​តម​កទៀត ក្នុង​ទឹក​ទី​៣ ត្រូវ​រដ្ឋា​ទាត់​អោយ​ខូច​ជើងឆ្វេង ត្រូវ​អាជ្ញាកណ្តាល​រាប់​៨​ម្តងទៀត​។​ប៉ុន្តែ​យ៉ាងណា ចាន់ រក្សា គេ​នៅ​បន្ត​ការប្រកួត​រហូតដល់​ចប់​ទឹក និង​ចាញ់​ត្រឹម​ពិន្ទុ​ប៉ុណ្ណោះ ។​
​
ជាមួយនឹង​ជ័យជម្នះ​នេះ លាភ រដ្ឋា គេ​នៅ​បន្ត​ការប្រកួត​ទៀត​នៅក្នុង​ដំណាក់កាល​ទី​២​បន្តទៀត ឯ ចាន់ រក្សា ត្រូវ​ជ្រុះ​ធ្លាក់​ត្រឹមនេះ ។​
​
ការប្រកួត​ដណ្តើមពាន​រង្វាន់​Knock Out series by K.cement ទម្ងន់​៦០​គីឡូក្រាម​នេះ មាន​អ្នក​ប្រដាល់​ចំនួន​៣២​នាក់ មកពី​តាម​បណ្តា​ក្លិប អង្គភាព​ស្ទើរតែ​ពេញ​ប្រទេស​ចូលរួម​ប្រកួត​ក្នុង​ព្រឹត្តិការណ៍​នេះ ។​ការប្រកួត​ជម្រុះ​ចម្រាញ់​រក​កីឡាករ​ដែល​ខ្លាំង​នោះ នឹង​ធ្វើជា​៣​ដំណាក់កាល ដោយ​ក្នុងចំណោម​៣២​នាក់ ក្នុង​ដំណាក់​ទី​១​ចម្រាញ់​ទុក​១៦​នាក់ ដំណាក់កាល​ទី​២ ទុក​៨​នាក់ ដែលជា​អ្នកឈ្នះ​សម្រាប់​បន្ត​ការប្រកួត​ក្នុងដំណាក់កាល​ទី​៣ ដែលជា​ការប្រកួត​វគ្គ​ពាក់កណ្តាល​ផ្តាច់ព្រ័ត្រ និង ផ្តាច់ព្រ័ត្រ ដើម្បី​ដណ្តើម​ខ្សែក្រវាត់​ជើងឯក ។​
​
ដោយឡែក ការប្រកួត​ជាល​ក្ខ​ណះ​មិត្តភាព​អន្តរជាតិ​វិញ ង៉ែ​ត្រ រដ្ឋា អ្នក​ប្រដាល់​កម្ពុជា ក្លិប​តា​ព្រហ្ម​មានជ័យ បាន​វាយ​ចាញ់​អ្នក​ប្រដាល់​ថៃ​Pic Ka ដោយ​ពិន្ទុ បន្ទាប់ពី​ប្រកួត​គ្នា​ប្រាំ​ទឹក​នោះ ។
​
ង៉ែ​ត្រ រដ្ឋា ចាញ់​Pic Ka ដាច់​តែម្តង​៥​ទល់​០ ដោយ​ចៅក្រម​ទាំង​៥​រូប បានផ្តល់​ពិន្ទុ​ឲ្យ​Pic Ka​ឈ្នះ​ទាំងអស់ ។ រដ្ឋា ត្រូវ​អាជ្ញាកណ្តាល​រាប់​៨​ក្នុង​ទឹក​ទី​៤ ក្រោយពី​Pic Ka ដាល់​ត្រូវ​មុខ​មួយ​ដៃ ដួល​អុកគូទ​នោះ ។
​
ចំណែក មា​ជ សុខ​រ៉ា អ្នក​ប្រដាល់​ក្លិប​តា​ព្រហ្ម​មានជ័យ គេ​បាន​ផ្តួល​ខាំ ផាន់​នី អ្នក​ប្រដាល់​ក្លិប​ដី​ឡូ​តិ៍​មាន​រិ​ទ្ធ​ខេត្តបន្ទាយមានជ័យ​អោយ​សន្លប់​ក្នុង​ទឹក​ទី​៤ ដោយ​ការ​ដាល់​ចំ​មុខ​មួយ​ដៃ​ពេញ​ទំ​ហ៊ឹង ។ ខាំ ផាន់​នី ក្នុង​ទឹក​ទី​៣ ក៏​រាប់​៨​ម្តង​ដែរ ដោយ​ត្រូវ​នឹង​ជង្គង់​រប​ស់មាជ សុខ​រ៉ា៕

​ ​

​ ​
​ ​ ​

​

Source: Kampuchea Thmey Daily