ស្ទឹងត្រែង ៖ កម្លាំងការិយាល័យ(ក៩)នៃមន្ទីរប្រឆាំងគ្រឿងញៀនក្រសួងមហាផ្ទៃបានសហការជាមួយប៉ូលិស(BLO)ច្រកទ្វារអន្តជាតិត្រពាំងក្រៀលចាប់ខ្លួនជនជាតិឡាវម្នាក់ រួមជាមួយគ្រឿងញៀនប្រភេទមេតំហ្វេតាមីន(ICE)ចំនួន៣កញ្ចប់ធំថ្លឹងទាំងសំបកស្មើ៣១៧៣,២ក្រាមនាំចូលពីប្រទេសឡាវមកទឹកដីខេត្តស្ទឹងត្រែងនៃប្រទេសកម្ពុជា។
ករណីបង្ក្រាបគ្រឿងញៀននិងឃាត់ខ្លួនជនជាតិឡាវម្នាក់ខាងលើនេះ បានធ្វើឡើងកាលពីវេលាម៉ោង១៣និង៣០នាទីរសៀល ថ្ងៃទី២៩ ខែមិថុនា ឆ្នាំ២០១៨ នៅចំណុចស្ពានទី២ ភូមិអូរសាយ ឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែង។
សមត្ថកិច្ចបានឲ្យដឹងថា ជនជាតិឡាវដែលត្រូវបានចាប់ខ្លួនមានឈ្មោះថង លូនប៉ាសឺត ភេទប្រុស អាយុ៥០ឆ្នាំ រស់នៅប៉ាសេ ខេត្តចំប៉ាសាក់ ប្រទេសឡាវ។
សមត្ថកិច្ចបន្តទៀតថា ស្ថិតក្រោមការស៊ើបអង្កេតបទល្មើសគ្រឿងញៀនឆ្លងដែននិងទទួលបានព័ត៌មានស្តីពីសកម្មភាពរបស់ជនសង្ស័យជនជាតិឡាវខាងលើ កម្លាំងសមត្ថកិច្ចបានចុះឃាត់ខ្លួនឆែកឆេររកឃើញថ្នាំញៀនចំនួន៣កញ្ចប់ធំ។
សមត្ថកិច្ចបន្តថា ក្រោយឃាត់ខ្លួនបានបញ្ជូនមកកាន់ស្នងការដ្ឋាននគរបាលខេត្តដើម្បីធ្វើការការសាកសួរ។ ជនសង្ស័យបានឆ្លើយសារភាពចំពោះមុខសមត្ថកិច្ចថា គ្រឿងញៀននេះត្រូវបានគេជួលខ្លួនតែប៉ុណ្ណោះ។
គ្រឿងញៀនត្រូវបានធ្វើតេស្តបឋមចំពោះមុខជនសង្ស័យនិងមានការចូលរួមពីលោកចៅក្រមលោកព្រះរាជអាជ្ញារងអមសាលាដំបូងខេត្តផងដែរ។
បច្ចុប្បន្នជនសង្ស័យរួមវត្ថុតាង ត្រូវបានសមត្ថកិច្ចកសាងសំណុំរឿងត្រៀមបញ្ជូនខ្លួនទៅសាលាដំបូងខេត្តដើម្បីចាត់ការទៅតាមនីតិវិធី៕
Source: Kampuchea Thmey Daily
0 Comments