លោកឃួង ស្រេង ស្នើអោយសមាជិក គណបក្សប្រជាជនកម្ពុជាម្នាក់ប្រែក្លាយ ទៅជាសន្លឹកឆ្នោតមួយសន្លឹកនៅពេលបោះឆ្នោត

ភ្នំពេញ ៖ លោកឃួង ស្រេង សមាជិកគណៈកម្មាធិការកណ្តាល និងជាអនុប្រធាន គណៈកម្មាធិការកណ្តាលគណបក្សប្រជាជនកម្ពុជា បានសូមអោយសមាជិក គណបក្សប្រជាជនកម្ពុជាម្នាក់ ប្រែក្លាយ ទៅជាសន្លឹកឆ្នោតមួយសន្លឹកនៅពេលបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ។

ការស្នើសូមរបស់លោកឃួង ស្រេងបែបនេះ បានធ្វើឡើងកាលពីរសៀលថ្ងៃអាទិត្យទី១ ខែកក្កដា ក្នុងពិធីសំណេះសំណាលជាមួយសមាជិក សមាជិកាគណបក្សប្រជាជនកម្ពុជាចូលថ្មីចំនួន២៦១១នាក់នៅភោជនីយដ្ឋាពិភពថ្មី ស្ថិតក្នុងសង្កាត់វត្តភ្នំ ខណ្ឌដូនពេញ។

លោកឃួង ស្រេង បានមានប្រសាសន៍លើកឡើងថា សមាជិកថ្មីមកពីអតីតសមាជិកមកពីគណបក្សសង្គ្រោះជាតិចំនួន៥១នាក់បានចូលមករួមរស់ជាមួយ គណបក្សប្រជាជនកម្ពុជាក្នុងចំណោម សមាជិកថ្មីចំនួន២៦១១នាក់នៅខណ្ឌ ដូនពេញ។

លោកមានប្រសាសន៍បន្តថា គណបក្សប្រជាជនកម្ពុជាគឺជាគណបក្សស្នូលក្នុងការដឹកនាំប្រទេសប្រកបដោយការអភិវឌ្ឍរីកចំរើនគ្រប់វិស័យ។

គណបក្សបានកសាងស្នាដៃធំៗជាច្រើនជូនជាតិមាតុភូមិ ក្រោមការដឹកនាំរបស់រាជរដ្ឋាភិបាល មានការអភិវឌ្ឍរីកចម្រើនគ្រប់វិស័យ។

លោកឃួង ស្រេងបញ្ជាក់ទៀតថា កម្ពុជាទទួលបានសន្តិភាពពេញលេញនៅឆ្នាំ១៩៩៨ ធ្វើអោយប្រទេសជាតិមានការអភិវឌ្ឍរីកចម្រើន មានសន្តិភាព និងបានបង្កើតនូវសមិទ្ធផលជាច្រើនទៀត។ ទាំងនេះសមិទ្ធផលរបស់សម្តេចអគ្គមហាសេនាបតីតេជោ ហ៊ុន សែន ដោយសម្តេចជាស្ថាបនិកសន្តិភាពនិងការអភិវឌ្ឍ ដែលយើងត្រូវការពារវីរជននេះ ដើម្បីបន្តការដឹកនាំប្រទេសអោយមានការរីកចម្រើនបន្តទៀត។

លោកបន្តថា សម្តេចតេជោ បានចុះជួបកម្មករ កម្មការិនី នៅតាមបណ្តារោងចក្រ សហគ្រាស តាមរាជធានីខេត្ត និងបានដោះស្រាយពីកង្វល់របស់កម្មករ កម្មការិនី។ យើងជាសមាជិកគណបក្សប្រជាជនកម្ពុជាត្រូវបន្តបោះឆ្នោតគាំទ្រគណបក្សប្រជាជនកម្ពុជា នៅថ្ងៃទី២៩ ខែកក្កដាឲ្យបានគ្រប់ៗគ្នា។

សមិទ្ធផលកើតចេញពីរាជរដ្ឋាភិបាល និងការចូលរួមពីសមាជិកគណបក្សនិងប្រជាពលរដ្ឋទូទាំងប្រទេស។

ជាមួយគ្នានោះដែរលោក ឃួង ស្រេង សមាជិកគណៈកម្មាធិការកណ្តាល និងជាអនុប្រធាន គណៈកម្មាធិការកណ្តាលគណបក្សរាជធានីភ្នំពេញ បានអំពាវនាវដល់ប្រជាពលរដ្ឋត្រៀមឯកសារដូចជាអត្តសញ្ញាណប័ណ្ណព័ត៌មាន ការិយាល័យបោះឆ្នោត ទៅបោះឆ្នោតគាំទ្រគណបក្សប្រជាជនកម្ពុជាបន្តគាំទ្រសម្តេចអគ្គមហាសេនាបតីតេជោ ហ៊ុន សែន ធ្វើជានាយករដ្ឋមន្ត្រី ដឹកនាំប្រទេសមានការអភិវឌ្ឍកាន់ទេរីកចម្រើន និងប្រែក្លាយសមាជិកគណបក្សប្រជាជនកម្ពុជាម្នាក់សន្លឹកឆ្នោត១សន្លឹក។

លោកហែម អាន ប្រធានគណៈកម្មការគណបក្សប្រជាជនកម្ពុជា ខណ្ឌដូនពេញ មានប្រសាសន៍ឲ្យដឹងថា ខណ្ឌដូនពេញមាន១១សង្កាត់ និងមានសាខាបក្ស១៥ សមាជិកបក្សថ្មីមានចំនួន២៦១១នាក់ យុវជន៩២៧នាក់ បានធ្វើសៀវភៅគ្រួសារបក្សជាង៧០០០គ្រួសារ ស្មើ ៦៩,៣៥%។

សកម្មជនសង្កេត៣០០០នាក់ស្មើ១៨មណ្ឌលស្មើ១៥០ការិយាល័យ ផ្តល់ប័ណ្ណព័ត៌មានបោះឆ្នោតដល់ប្រជាជន ដែលនឹងបញ្ចប់ការចែកប័ណ្ណព័ត៌មានបោះឆ្នោតនៅថ្ងៃទី៥ខែកក្កដា និងបានត្រៀម ហែគណបក្សពេលយុទ្ធនាការឃោសនាចំនួន៤លើក ២១ថ្ងៃ ពីថ្ងៃទី៧-២៧ខែកក្កដាឆ្នាំ២០១៨៕