កូនត្រី និងត្រីមេពូជចម្រុះ ប្រមាណជាង ១លានក្បាល ត្រូវបានលែងចូលក្នុងកសិណអង្គរ

សៀមរាប ៖ លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងក្នុងពិធីប្រារព្ធទិវាមច្ឆជាតិ កាលពីព្រឹកថ្ងៃទី០១ ខែកក្កដា ឆ្នាំ២០១៨ នៅកសិណអង្គរវត្ត រមណីយដ្ឋានទេសចរណ៍វប្បធម៌-ប្រវត្តិសាស្ត្រនៃកម្ពុជានាខេត្តសៀមរាប ថា ឆ្នាំនេះ គឺជាឆ្នាំទី១៦ នៃការប្រារព្ធទិវាមច្ឆជាតិ កូនត្រី និង ត្រីមេពូជចម្រុះក្នុងស្រុកប្រមាណជាង១លានក្បាល ត្រូវបានលែងចូលក្នុងកសិណ ឬ គូទឹកអង្គរវត្ត។ កូនត្រីនិង ត្រីមេពូជក្នុងស្រុកទាំងនោះ រួមមានប្រភេទត្រីឆ្ពិន ត្រីព្រលូង ត្រីក្រហែ ត្រីប្រា និង ត្រីកន្ធរ។ល។ ជាមួយនោះរួមមានប្រភេទវារីសត្វ ដែលកំពុងរងគ្រោះផុតពូជ ដូចជាត្រីគល់រាំង អណ្តើក កន្ធាយ និងកង្កែប ក៏ត្រូវបានលែងចូលក្នុងកសិណអង្គរ ផងដែរ។

ការលែងត្រី និង វារីសត្វទាំងនេះចូលក្នុងកសិណ ឬ គូទឹកអង្គរវត្ត ដោយស្ថិតក្នុងការប្រមើល មើលឃើញថា ទៅថ្ងៃអនាគត ក្នុងតំបន់អង្គរ នឹងសម្បូរទៅដោយពូជមច្ឆជាតិចម្រុះ ព្រមជាមួយនឹងការរីកសាយទៅកាន់តំបន់ផ្សេងៗទៀតតាមប្រព័ន្ធបារាយណ៍ក្នុងតំបន់អង្គរ និង អាចចរាចរណ៍ចូលទៅដល់ដែននេសាទដទៃទៀតដែរ ដែលអាចបំពេញត្រូវការរបស់ប្រជាពលរដ្ឋ ក្នុងទឹកដីអង្គរនេះ។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី តំណាងដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា ៖ ទិវាមច្ឆជាតិ ( ០១កក្កដា ) មានអត្ថន័យដល់ការបំផុសចលនាបងប្អូនប្រជាពលរដ្ឋគ្រប់ៗរូប ឲ្យបានជ្រាប អំពីសារៈសំខាន់នៃធនធានជលផល ដើម្បីចូលរួមថែរក្សា និងអភិរក្សពូជត្រីក្នុងស្រុក ជាពិសេសប្រភេទត្រីកំពុងរងគ្រោះ។ ជាមួយនេះ វាក៏មានន័យសំខាន់ទៀតដែរ នោះគឺបំផុសឲ្យមានការចូលរួមទាំងអស់គ្នា លើការងារអភិរក្សជីវៈចម្រុះផ្សេងៗទៀតឲ្យបានគង់វង្ស ដើម្បីធានានិរន្តរភាពធនធានជលផល សម្រាប់ការផ្តត់ផ្គង់ជីវភាព ធានាសន្តិសុខស្បៀង និងកាត់បន្ថយភាពក្រីក្រ របស់ប្រជាជន។

សម្តេចពិជ័យសេនា ទៀ បាញ់ បញ្ជាក់ថា ៖ ក្នុងស្ថានភាពនៃកំណើនតម្រូវការស្បៀងអាហារ ដោយរត់តាមកំណើនសេដ្ឋកិច្ច៧% ក្នុង១ឆ្នាំ និង កំណើនប្រជាជននាពេលបច្ចុប្បន្ន រាជរដ្ឋាភិបាលបានចាត់ទុកវិស័យកសិកម្មជាវិស័យអាទិភាពមួយ ក្នុងនោះអនុវិស័យជលផល នៅតែដើរតួនាទីយ៉ាងសំខាន់ផងដែរ ក្នុងការចូលរួមចំណែក រក្សានិរន្តរភាពនៃកំណើនសេដ្ឋកិច្ច ធានាសមធម៌ ធានាសុវត្ថិភាព សន្តិសុខស្បៀង និង ជំរុញការអភិវឌ្ឍសេដ្ឋកិច្ចជនបទ ហើយក៏ជាបណ្តាញមួយនៃសុវត្ថិភាពសង្គម ដែលមានប្រជាជនជាច្រើន មានមុខរបរពាក់ព័ន្ធទៅនឹងអនុវិស័យនេះ។

ដោយពិតណាស់ថា នៅក្នុងដំណាក់កាល ដែលសេដ្ឋកិច្ចកម្ពុជាកំពុងអភិវឌ្ឍឈានឡើង តែត្រី និង វារីជាតិផ្សេងៗទៀត ស្ថិតតែនៅជាអាហារយ៉ាងសំខាន់មិនអាចខ្វះបានរបស់ប្រជាជនខ្មែរយើង បន្ទាប់ពីស្រូវ-អង្ករ៕