ភ្នំពេញ ៖ ប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល និងជាប្រធានគណៈកម្មការសម្របសម្រួលការងារអ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ លោក កឹមរ័ត្ន វិសិដ្ឋ បានលើកឡើងថា នៅក្នុងការបោះឆ្នោតអាណត្តិនេះ មានអ្នកសង្កេតការណ៍ជាតិ អន្តរជាតិ ជាច្រើនមកពីជុំវិញពិភពលោក ហើយពួកគាត់ នឹងនិយាយពីអ្វីដែលជាការពិតនៅកម្ពុជា។
លោក កឹមរ័ត្ន វិសិដ្ឋ លើកឡើងបែបនេះ នៅក្នុងសន្និសីទសារព័ត៌មានមួយកាលពីល្ងាចថ្ងៃទី២៤ ខែកក្កដា ឆ្នាំ២០១៨។ លោកថ្លែងថា សម្រាប់ការបោះឆ្នោតជាតិជ្រើសតាំងតំណាងរាស្ត្រ នីតិកាលទី៦នេះ មានអ្នកសង្កេតការណ៍ជាតិចំនួន១០៣៦នាក់បានចួលរួម ហើយចំនួននេះ ពួកគាត់ជាសមាជិករបស់អង្គការ សមាគម ដែលជាអង្គការ សមាគមជាតិនៅកម្ពុជា ដែលបានបង្ហាញនូវការស្ម័គ្រចូលរួមចំណែកនៅក្នុងការសង្កេតការណ៍។ ដោយឡែកតួរលេខរបស់ គ.ជ.ប គឺជាតួលេខមួយ រួមទាំងអ្នកសង្កេតការណ៍ជាតិផ្សេងទៀត ក្រៅពីក្របខណ្ឌរបស់វេទិកាសម្ព័ន្ធសង្គមស៊ីវិល ដែលជាអ្នកធ្វើការសម្របសម្រួល ហើយចំនួន១០៣៦នាក់នេះ បានចុះបញ្ជីរួចហើយនៅ គ.ជ.ប ។ ចំណែកអ្នកសង្កេតការណ៍អន្តរជាតិមានចំនួន២២០នាក់ មកពី៥២ប្រទេស ដែលជាចំនួនមួយច្រើនជាងកន្លងមក ហើយអ្នកសង្កេតការណ៍អន្តរជាតិទាំងនេះ សុទ្ធតែជាអ្នកមានបទពិសោធន៍នៅក្នុងការសង្កេតការណ៍បោះឆ្នោតនៅតាមបណ្តាប្រទេសផ្សេងៗ ពីព្រោះពួកគាត់ជាតំណាងឲ្យស្ថាប័នធំៗដូចជា អង្គការអ្នកប្រជាធិបតេយ្យនិយមកណ្តាលអន្តរជាតិ (CDI), សន្និសីទអន្តរជាតិនៃបណ្តាគណបក្សនយោបាយនៅអាស៊ី (ICAPP) និងអង្គការអ្នកប្រជាធិបតេយ្យនិយមកណ្តាលអាស៊ី-ប៉ាស៊ីហ្វិក (CAPDI) ជាដើម។
តាមលោក កឹមរ័ត្ន វិសិដ្ឋ បណ្តាអ្នកសង្កេតការណ៍អន្តរជាតិទាំងនោះ គឺមកធ្វើការសង្កេតការណ៍ដោយស្ម័គ្រចិត្ត យើងមិនមានសិទ្ធិអ្វីក្នុងការណែនាំឲ្យពួកគាត់ចេញសេចក្តីថ្លែងការណ៍នោះទេ តែយើងជឿថា ពួកគាត់មកសង្កេតការណ៍ចង់ការពិតពីកម្ពុជា ដូច្នេះពួកគាត់នឹងនិយាយអ្វីដែលពិតពីកម្ពុជា។ ចំពោះការចំណាយផ្សេងៗ ស្ថិតនៅលើពួកគាត់ផ្ទាល់ ខាងវេទិកាសម្ព័ន្ធសង្គមស៊ីវិលគ្រាន់តែជាអ្នកសម្របសម្រួលក្នុងការស្នាក់នៅតែប៉ុណ្ណោះ ហើយពួកគាត់នឹងមកដល់កម្ពុជា នាថ្ងៃទី២៧ ខែកក្កដា មុនការបោះឆ្នោត ដើម្បីធ្វើជំនួបផ្សេងៗតាមគំរោងរបស់ពួកគាត់ ហើយនៅពេលចប់ការងារពួកគាត់ មួយចំនួនអាចត្រឡប់ទៅវិញ ហើយមួយចំនួនទៀត អាចស្នាក់នៅកម្ពុជាបន្តទៀត ដើម្បីធ្វើទេសចរណ៍តាមតំបន់នានា ជាពិសេសប្រាសាទអង្គរវត្ត។
តាមលោក កឹមរ័ត្ន វិសិដ្ឋ បញ្ជាក់ដែរថា ក្រៅពីអង្គការ ស្ថាប័នធំៗខាងលើ ក៏នៅមានអង្គការ សមាគមធំៗមកពីទ្វីបអឺរ៉ុប អាស៊ី មួយចំនួនទៀត ដែលនឹងមានវត្តមានធ្វើជាអ្នកសង្កេតការណ៍បោះឆ្នោតនៅកម្ពុជា ដែលដូចជា អន្តរសភាអាស៊ាន ដែលហៅគាត់ថា AIPA សភាតំបន់អាស៊ី ដែលហៅកាត់ថា APA និងក្រុមសភានិយាយភាសាបារាំង ដែលហៅកាត់ថា APF ដែលនឹងចូលរួមសង្កេតការណ៍ បោះឆ្នោតនាថ្ងៃទី២៩ ខែកក្កដាខាងមុខនេះ តាមរយៈគណៈកម្មការសម្របសម្រួលការងារអ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ នៃវេទិកាសម្ព័ន្ធសង្គមស៊ីវិល។
បន្ទាប់ពីបញ្ចប់ការងារសង្កេតការណ៍បោះឆ្នោត ក្រុមអ្នកសង្កេតការអន្តរជាតិ នឹងធ្វើសន្និសីទសារព័ត៌មាននៅល្ងាចថ្ងៃទី២៩ ខែកក្កដា ឆ្នាំ២០១៨។ ចំណែកក្រុមអ្នកសង្កេតការណ៍ជាតិ គ្រោងនឹងធ្វើសន្និសីទនៅរសៀលថ្ងៃទី៣០ ខែកក្កដា ឆ្នាំ២០១៨ ដើម្បីបង្ហាញពីការពិតនូវដំណើរការបោះឆ្នោត ក្នុងនាមជាសាក្សី ដែលបានចុះទៅសង្កេតការណ៍ដោយផ្ទាល់ នៅតាមការិយាល័យបោះឆ្នោតនានា។
សូមជម្រាបថា វេទិកាសម្ព័ន្ធសង្គមស៊ីវិល (ហៅកាត់ថា វ.ស.ស.) ដែលសម្របសម្រួលការងារគណៈកម្មការសម្របសម្រួលការងារអ្នកសង្កេតការណ៍ជាតិ និងអន្តរជាតិ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ជាស្ថាប័នមួយបានបង្កើតឡើងនៅឆ្នាំ២០១៦ ក្នុងគោលបំណងសម្របសម្រួល និងពង្រឹងកិច្ចសហប្រតិបត្តិការរវាងរាជរដ្ឋាភិបាល ជាមួយបណ្តាអង្គការសង្គមស៊ីវិលជាតិនិងអន្តរជាតិ ឱ្យកាន់តែជិតស្និទ្ធនិងបង្កើតនូវបរិយាកាសសហការដោយស្មោះត្រង់ សំដៅចូលរួមចំណែកលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើងថែមទៀត៕
Source: Kampuchea Thmey Daily
0 Comments