កំពង់ឆ្នាំង ៖ ស្ត្រីម្នាក់ បានស្លាប់ ដោយសារឆត្រធំ១ ប៉ើងមកបុកចំក្បាល និងកុមារីម្នាក់ បានរបួសបាក់ដៃ ក្នុងឧប្បត្តិហេតុគ្រោះធម្មជាតិ ខ្យល់កន្ត្រាក់បោកបក់ចំកន្លែងអ្នកស្រុកធ្វើបុណ្យឡើងអ្នកតាម្ចាស់ស្រុក។
ហេតុការណ៍គ្រោះថ្នាក់ខាងលើនេះ បានកើតឡើងម៉ោង៣និង១៥នាទីល្ងាច ថ្ងៃទី០១ ខែកក្កដា ឆ្នាំ២០១៨ នៅចំណុចឈើត្រាវ ក្នុងភូមិស្វាយចេក ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋានបានអោយដឹងថា ៖ មុនពេលកើតហេតុនៅចំណុចនោះ អ្នកស្រុកក្នុងភូមិឃុំ បាននាំគ្នាធ្វើបុណ្យឡើងអ្នកតាម្ចាស់ស្រុកដូចរៀងរាល់ឆ្នាំ ដោយនៅក្នុងកម្មវិធីនោះមានគេដាក់ប្រដាប់ប្រដាសម្រាប់ក្មេងលេង មានកន្ត្រកវិល សេះវិល ពោងសម្រាប់ក្មេងលោតលេងជាដើម និងក៏មានការលក់ដូរនំចំណីផងដែរ។ ស្រាប់តែនៅពេលវេលាខាងលើ មានខ្យល់កន្ត្រាក់បោកបក់មកយ៉ាងខ្លាំង បណ្តាលអោយឆត្រមួយផ្ទាំង បានប៉ើងហោះមកបុកចំក្បាលជនរងគ្រោះ ឈ្មោះស្រី ណែត អាយុ៣៣ឆ្នាំ បណ្តាលអោយស្លាប់ភ្លាមៗនៅកន្លែងកើតហេតុតែម្តង ដែលគាត់មានទីលំនៅក្នុងភូមិឧទ្ទម្ពរ ឃុំស្វាយជ្រុំ ស្រុករលាប្អៀរ ចំណែកកូនស្រីរបស់គាត់ ឈ្មោះ ណា ធារី អាយុ៩ឆ្នាំ កំពុងជិះសេះវិលលេង បានប៉ើងធ្លាក់រងរបួសបាក់ដៃ និង ត្រូវក្រុមគ្រួសារដឹកយកមកសង្គ្រោះនៅមន្ទីរពេទ្យខេត្តកំពង់ឆ្នាំង។
សមត្ថកិច្ចបានបញ្ជាក់អោយដឹងថា ៖ ក្រៅពីជនរងគ្រោះទាំង២នាក់គ្រោះខាងលើ នៅកន្លែងកើតហេតុក៏មានរងការខូចខាតសម្ភារៈរបស់របរអ្នកលក់ដូរមួយចំនួនផងដែរ។ ចំណែកគ្រោះថ្នាក់ខាងលើនេះ គឺជាឧប្បត្តិហេតុនៃគ្រោះធម្មជាតិ ដែលគ្មានអ្នកណាអាចដឹងមុនបាននោះឡើយ៕
Source: Kampuchea Thmey Daily
0 Comments