ភ្នំពេញ ៖ បន្ទាប់បើករថយន្តស៊េរីទំនើបបុកខឿនរបាំងពុះចែកទ្រូងផ្លូវខូចរថយន្ត មិនអាចបើកទៅមុខទៀតបាននោះ អ្នកសារព័ត៌មាន ក៏ទៅថតពីទិដ្ឋភាពនៃគ្រោះថ្នាក់នោះ តែត្រូវអ្នកបើកបរគំរាម និងព្យាយាមមិនឲ្យថតថា(ប្រយ័ត្នបាត់ជីវិតវើយ)។
អ្នកបើកបរ ដែលគំរាមអ្នកសារព័ត៌មាននោះ ត្រូវបានគេស្គាល់ថាឈ្មោះរ៉ា មានមុខរបរជាអគ្គនាយកក្រុមហ៊ុនដឹកជញ្ជូន បើករថយន្តស៊េរីទំនើប Mercedes មួយគ្រឿង ទៅបុកសួនចែកទ្រូងផ្លូវកាលពីវេលាម៉ោង២និង៣០នាទីទៀបភ្លឺ ឈានចូលថ្ងៃទី១ ខែកក្កដា ឆ្នាំ២០១៨ ស្ថិតនៅតាមបណ្តោយផ្លូវR៥ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសម្នាក់ ទំនងជាស្រវឹងស្រា បើករថយន្តម៉ាក Mercedes ស៊េរីទំនើបមួយគ្រឿង ពណ៌ស ពាក់ស្លាកលេខ ភ្នំពេញ 2AL-9188 ធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុខាងលើ ក៏បានរេចង្កូតទៅបុកឡើងសួនចែកទ្រូងផ្លូវ បណ្តាលឲ្យការខូចខាតអស់ជាច្រើនផ្ទាំង។ ខណៈរថយន្តខូចខាតផ្នែកខាងមុខទៅលេងរួចហើយនោះ ក្រុមអ្នកសារព័ត៌មានបានចុះដល់កន្លែងកើតហេតុ ដើម្បីផ្តិតយករូបភាពពីទិដ្ឋភាពនៃគ្រោះថ្នាក់នោះ តែត្រូវម្ចាស់រថយន្តដែលមាន អាការៈ ដូចជាស្រវឹងស្រាទៀតផងនោះ បានមកហាមមិនឲ្យថត ហើយថែមទាំងរករឿងក្រុមអ្នកសារព័ត៌មានយ៉ាងចាស់ដៃ និងបានប្រមាថជីវិតក្រុមអ្នកសារព័ត៌មានថា "បើនៅតែថត ប្រាប់ហើយមិនស្តាប់ទេ ប្រយ័ត្នបាត់ជីវិតវើយ"។
ប្រភពព័ត៌មានបានបន្តថា ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ បានឲ្យភាគីខាងរថយន្ត សម្របសម្រួលជាមួយខាងម្ចាស់ផ្លូវ ព្រោះផ្លូវនេះ ជាផ្លូវរបស់ឯកជន ដើម្បីបញ្ចប់រឿងនៅនឹងកន្លែងកើតហេតុ។ បន្ទាប់មក ម្ចាស់រថយន្តបានហៅរថយន្តមកអូសយកទៅជួសជុលដោយខ្លួនឯងផងដែរ៕
Source: Kampuchea Thmey Daily
0 Comments