ទោះបីជានៅសល់២សប្ដាហ៍ទៀតទើបបញ្ចប់វគ្គសន្សំពិន្ទុប្រចាំពានរង្វាន់បាល់ទាត់លីគហ្វូតសាលក៏ដោយ ប៉ុន្តែក្រោយចប់ការប្រកួតសប្ដាហ៍ទី១៦ គណៈកម្មការរៀបចំការប្រកួតបានរកឃើញក្រុមដែលមានកៅអីឡើងទៅកាន់វគ្គ៤ក្រុមចុងក្រោយ ដោយក្នុងនោះមានក្រុម Down Town Sport,កំចាយមារ, Home Sport និងឪម៉ាល់។
សរុបលទ្ធផលប្រចាំសប្ដាហ៍ទី១៦ ឃើញថានៅថ្ងៃសៅរ៍ ទី៣០ ខែមិថុនា ឆ្នាំ២០១៨ ក្រុមយុវជន៧មករា ឈ្នះក្រុម B.A United ១១ទល់៥ ខណៈក្រុមអាណាចក្របៃតង ចាញ់ក្រុម Down Town Sport ១១ទល់៥ និងក្រុមស.ស.យ.ក កំចាយមារ ឈ្នះក្រុមឆន្ទៈកីឡា៦ទល់៤។ នៅថ្ងៃអាទិត្យ ទី១ ខែកក្កដា ឆ្នាំ២០១៨ ក្រុម Panda FC ចាញ់ក្រុមឱម៉ាល់ ៤ទល់២ និងក្រុម Home Sport FC ស្មើគ្នាជាមួយក្រុម Fan Sport FT ៦ទល់៦។
ងាកមកមើលចំណាត់ថ្នាក់បណ្ដោះអាសន្នក្រោយប្រកួតបាន១៦លើកម្នាក់មកឃើញថាក្រុម Down Town Sport FCឈរលេខ១ មាន៣៩ពិន្ទុ តាមពីក្រោយដោយក្រុម Home Sport FCឈរលេខ២ មាន៣៤ពិន្ទុ ក្រុម ស.ស.យ.ក កំចាយមារ ឈរលេខ៣ មាន៣៣ពិន្ទុ ស្មើគ្នានឹងក្រុមលេខ៤ ឱម៉ាល់ តែខុសគ្រាប់បាល់ចំណេញ។ ក្រុមលេខ៥ Fan Sport FC មាន២២ពិន្ទុ ហើយក្រុមលេខ៦ អាណាចក្របៃតង មាន២១ពិន្ទុ។ លេខ៧ ក្រុម Panda FC មាន១៤ពិន្ទុ ហើយក្រុមឆន្ទៈកីឡាករ ឈរលេខ៨ មាន១៤ពិន្ទុដូចគ្នា ហើយក្រុមយុវជន៧មករា ឈរលេខ៩ មាន១១ពិន្ទុ និងក្រុមB.A United លេខ១០ មាន៤ពិន្ទុ។
ទោះបីជាពេលនេះគណៈកម្មការប្រកួតបានរកឃើញក្រុមខ្លាំងទាំង៤ប្រចាំរដូវកាល (Top4) ក៏ពិតមែន ប៉ុន្តែនៅមិនទាន់អាចចាប់គូប្រកួតនៅឡើយនោះទេ ដោយរង់ចាំការប្រកួតរហូតដល់សប្ដាហ៍ទី១៨ រួចរាល់សិន។ តាមការបែងចែកគឺប្រកួតវគ្គ៤ក្រុមចុងក្រោយ តម្រូវឱ្យក្រុមលេខ២ប៉ះក្រុមលេខ៣ និងក្រុមលេខ១ប៉ះក្រុមលេខ៤ ដើម្បីឡើងទៅលេងវគ្គផ្តាច់ព្រ័ត្រប្រជែងយកជើងឯកប្រចាំរដូវកាលផងដែរ។
ការប្រកួតលីគហ្វូតសាលជាលើកដំបូងនៅក្នុងស្រុកនេះធ្វើឡើងពីថ្ងៃទី០៣ ខែ មិនា រហូតដល់ថ្ងៃទី២៨ ខែ កក្កដា ឆ្នាំ ២០១៨ ខណៈភាកច្រើនប្រកួតនៅថ្ងៃចុងសប្ដាហ៍ ដែលមានក្រុមជាសមាជិកចំនួន១០ក្រុមលើទីលាន ដឹប្លូស្ព័ត (The Blue Sport) ម្តុំទួលគោក។ ការប្រកួតមានរូបមន្តជាលក្ខណៈប្រកួតបែបលីគ តាមប្រព័ន្ធលីគ២ជុំ (វិលជុំសន្សំពិន្ទុ) ហើយក្រុមដែលមានពិន្ទុច្រើនជាងគេចំនួន៤ក្រុម (Top4) ត្រូវឡើងទៅប្រកួតគ្នាដណ្តើមជើងឯកប្រចាំរដូវកាល។ ក្រុមជើងឯកនឹងទទួលបានពានរង្វាន់១ មេដាយមាសម្នាក់១និងប្រាក់រង្វាន់២០លានរៀលផងដែរ។
សម្រាប់ប្រកួតសប្ដាហ៍បន្ទាប់គឺនៅថ្ងៃសៅរ៍ ទី៧ ខែកក្កដា ឆ្នាំ២០១៨ ដោយក្រុមឪម៉ាល់ ប៉ះ Home Sport FC នៅវេលាម៉ោង២:៣០នាទីល្ងាច ខណៈនៅម៉ោង៤ល្ងាចក្រុម B.A United ប៉ះក្រុមឆន្ទៈកីឡា និងនៅម៉ោង៥:៣០នាទីល្ងាចក្រុមយុវជន៧មករា ប៉ះក្រុម Down Town Sport FC។ នៅថ្ងៃអាទិត្យ ទី៨ ខែកក្កដា វិញក្រុម Panda FC ប៉ះក្រុមស.ស.យ.ក កំចាយមារ នៅម៉ោង៤ល្ងាចនិងនៅម៉ោង៥:៣០នាទីល្ងាចក្រុមឆន្ទៈកីឡា ជួបក្រុម Fan Sport FT៕
Source: Kampuchea Thmey Daily
0 Comments