លោក លឹម ប៊ុនធឿន អាជ្ញាកណ្ដាលបាល់ទាត់មកពីមន្ទីរអប់រំយុវជននិងកីឡាខេត្តកំពង់ធំ ដែលជាសមាជិកអាជ្ញាកណ្ដាលរបស់សហព័ន្ធកីឡាបាល់ទាត់ពិភពលោក (FIFA) ត្រូវបានសហព័ន្ធកីឡាបាល់ទាត់មីយ៉ាន់ម៉ា អញ្ជើញឲ្យចូលរួមដឹកនាំប្រកួតក្នុងពានរង្វាន់បាល់ទាត់អន្តរជាតិ 2018 Alpine Cup ដែលរៀបចំនៅទីក្រុងMandalay ប្រទេសមីយ៉ាន់ម៉ា។
យោងតាមទិន្នន័យរបស់គណៈកម្មការប្រកួតបានឲ្យដឹងថា លោក លឹម ប៊ុនធឿន បានដឹកនាំការប្រកួតចំនួន២លើកមកហើយ គឺពេលក្រុមម្ចាស់ផ្ទះមីយ៉ាន់ម៉ា ចាញ់ក្រុមកូរ៉េខាងត្បូង ៤ទល់៣ កាលពីថ្ងៃទី១ ខែសីហា និងពេលក្រុមមីយ៉ាន់ម៉ា ប្រកួតស្មើគ្នាជាមួយក្រុមបារ៉ែន ១ទល់១ នៅល្ងាចថ្ងៃទី៣ ខែសីហា ឆ្នាំ២០១៨ ថ្មីៗនេះ។
ពានរង្វាន់ Alpine Cup 2018 មានក្រុមចូលរួម៤ប្រកួតប្រជែងរួមមាន U23 មីយ៉ាន់ម៉ា U23 បារ៉ែន U23 ថៃ និង U19 កូរ៉េខាងត្បូង ដោយធ្វើឡើងចាប់ពីថ្ងៃទី០១ ដល់ថ្ងៃទី០៥ ខែសីហា។ ការប្រកួតនេះប្រើតាមរូបមន្តវិលជុំសន្សំពិន្ទុ ហើយក្រុមមានពិន្ទុច្រើនជាងគេ ក្រោយលេងបាន៣ប្រកួត នឹងក្លាយជាជើងឯក។ គិតត្រឹមពេលនេះក្រុមកូរ៉េខាងត្បូង កំពុងឈរកំពូលតារាងមាន៦ពិន្ទុ ហើយក្រុមបារ៉ែន ឈរលេខ២មាន៤ពិន្ទុ ហើយម្ចាស់ផ្ទះមីយ៉ាន់ម៉ា ឈរលេខ៣មាន១ពិន្ទុ និងក្រុមថៃ នៅបាតតារាងមិនទាន់មានពិន្ទុនោះទេ។
សម្រាប់ប្រកួតចុងក្រោយក្រុមកូរ៉េខាងត្បូង ប៉ះក្រុមបារ៉ែន នៅវេលាម៉ោង៣រសៀល លើទីលានកីឡដ្ឋាន Mandalarthiri Stadium ខណៈ១គូទៀតក្រុមមីយ៉ាន់ម៉ា បើកទ្វារទទួលក្រុមថៃ នៅវេលាម៉ោង៦ល្ងាចលើទីលានជាមួយគ្នា។ សហព័ន្ធកីឡាបាល់ទាត់មីយ៉ាន់ម៉ា បានបង្កើតពានរង្វាន់នេះឡើងដើម្បីឲ្យក្រុមជម្រើសជាតិក្រោមអាយុ២៣ឆ្នាំរបស់ខ្លួនប្រកួតវាស់ស្ទង់សមត្ថភាព មុនចេញទៅចូលរួមប្រកួតប្រជែងក្នុងព្រឹត្តិការណ៍ Asian Games នៅពាក់កណ្ដាលខែនេះនៅប្រទេសឥណ្ឌូណេស៊ី។
សូមរំលឹកថា គិតត្រឹមឆ្នាំ២០១៨ នេះលោក លឹម ប៊ុនធឿន គឺអាជ្ញាមន្ត្រីអាជ្ញាកណ្ដាលបាល់ទាត់ទី៣ របស់កម្ពុជា ដែលមានឱកាសបង្ហាញខ្លួនក្នុងការប្រកួតពានរង្វាន់កម្រិតកំពូលប្រចាំទ្វីបអាស៊ី AFC Champion League និងពានរង្វាន់លំដាប់ទី២ ប្រចាំទ្វីប AFC Cup ផងដែរ។ លោកធ្លាប់មានឱកាសចេញទៅដឹកនាំការប្រកួតនៅក្រៅប្រទេសក្នុងដែនសមត្ថកិច្ចរបស់សហព័ន្ធកីឡាបាល់ទាត់ទ្វីបអាស៊ី (AFC) ដោយទទួលបានកម្រៃខ្ពស់ផងដែរ៕
Source: Kampuchea Thmey Daily
0 Comments