ភ្នំពេញ ៖ សិស្សកម្ពុជាចំនួន ៤រូបទទួលបានមេដាយសរុបចំនួន៩គ្រឿងក្នុងនោះមេដាយមាស១គ្រឿង មេដាយប្រាក់១គ្រឿង និងមេដាយសំរឹទ្ធ៧គ្រឿងពីកម្មវិធីប្រកួតប្រជែងអ្នកវិទ្យាសាស្ត្រវ័យក្មេង អាស៊ានបូកបីលើកទី៧ នៅទីក្រុងកូឡាឡាំពួរ ប្រទេសម៉ាឡេស៊ី។
ការប្រកួតប្រជែងអ្នកវិទ្យាសាស្ត្រវ័យក្មេង អាស៊ានបូក៣ លើកទី៧ នៅទីក្រុងកូឡាឡាំពួរ ប្រទេសម៉ាឡេស៊ីនេះធ្វើឡើងក្រោម ប្រធានបទ "វិទ្យាសាស្ត្រ និងការបង្កើតថ្មីដើម្បីសុខភាព និងសុខុមាលភាពសង្គម" ដែលមានបេ ក្ខជនចូលរួម ចំនួន៥៧នាក់ មកពីបណ្ដាប្រទេសអាស៊ាន រួមជាមួយប្រទេសកូរ៉េ ដែលបានប្រព្រឹត្តទៅចាប់ពីថ្ងៃទី២៩ ខែកក្កដា ដល់ថ្ងៃទី០៤ ខែសីហា ឆ្នាំ២០១៨។
សិស្សកម្ពុជាដែលទទួលបានមេដាយរួមមាន១. យុវសិស្ស អៀង ហ៊ុយឃាង ភេទប្រុស វិទ្យាល័យព្រះមុនីវង្ស ខេត្តបាត់ដំបង មេដាយមាស ១គ្រឿង។២.យុវសិស្ស ឡី ឡាយអាន ភេទប្រុស សាលាអន្តរជាតិឌូវី ខេត្តបាត់ដំបង មេដាយប្រាក់ ១គ្រឿង និងមេដាយសំរឹទ្ធ២គ្រឿង។ ៣.យុវសិស្ស ស្រ៊ុន រដ្ឋា ភេទប្រុស វិទ្យាល័យហ៊ុនសែន១មិថុនា ខេត្តតាកែវ មេដាយសំរឹទ្ធ៣គ្រឿង។៤.យុវសិស្ស ពេជ្ច ពុធស្រីនាថ ភេទស្រី វិទ្យាល័យព្រះបាទសុរាម្រិត ខេត្តកំពង់ឆ្នាំង មេដាយសំរឹទ្ធ២គ្រឿង។
ក្រៅពីនេះ សិស្សកម្ពុជាក៏ទទួលបានពានពិសេសមួយ ដែលមានភាពរាក់ទាក់ជាងគេនៅក្នុងតំបន់អាស៊ាននិងជាប់លេខ១ជាកញ្ញាឯកអ្នកវិទ្យាសស្ត្រវ័យក្មេងប្រចាំអាស៊ានបូកបីឆ្នាំ២០១៨ផងដែរ។
លោកគ្រូដឹកនាំសិស្សទោចូលរួមប្រឡងលើកនេះបានមានប្រសាសន៍ថា ការប្រឡងនេះចែកចេញជា៣ប្រទេសគឺទី១ផ្តោតទៅលើការដោះស្រាយបញ្ហាសុខភាពនៅលើប្រជាជននៅលើពិភពលោកដែលសិស្សត្រូវស្រាវជ្រាវពី៣ទៅ៦ខែបន្ទាប់ធ្វើបទបង្ហាញ។ទី២ វិញ្ញាសាពិសោធន៍រួមមានរូបវិទ្យា ជីវវិទ្យានិងគីមីវិទ្យាដោយធ្វើសកម្មភាពទាំងក្នុងនិងក្រៅមន្ទីរពិសោធន៍និងទី៣ការដោះស្រាយបញ្ហាភ្លាមៗហើយបេក្ខជនប្រទេសនីមួយៗត្រូវរកដំណោះស្រាយ គំនិតច្នៃប្រឌិតបង្កើតនូវអ្វីដែលថ្មីៗដោយធ្វើការជាក្រុមជាមួយបេក្ខជនមកពីបណ្តាប្រទេសផ្សេងៗទៀត។
យុវសិស្ស អៀង ហ៊ុយឃាងដែលទទួលបានមេដាយមាសចំនួន១គ្រឿងបាននិយាយថាសមត្ថភាពរបស់សិស្សខ្មែរយើងគឺមិនចាញ់នឹងសិស្សបរទេសទេទាំងទ្រឹស្តីនិងការអនុវត្តជាក់ស្តែងប៉ុន្តែអ្វីដែលសិស្សខ្មែរយើងនៅមានការខ្វះខាតនោះ គឺភាសាអង់គ្លេសនៅមានកម្រិតនៅឡើយបើសិនជាខ្លាំងទៅលើភាសានេះនោះនឹងទទួលបានមេដាយច្រើនជាងនេះ។
យុវសិស្សបានសំណូមពរឲ្យសិស្សប្អូនៗដែលត្រៀមទៅចូលរួមប្រឡើងនៅឆ្នាំក្រោយៗទៀតត្រូវព្យាយាមរៀនភាសាអង់គ្លេសឲ្យបានខ្លាំងដើម្បីឲ្យពួកគាត់ងាយស្រួលដោះស្រាយវិញ្ញាសាបានស្រួលដោយសារវិញ្ញាសាប្រឡងប្រើប្រាស់ពាក្យបច្ចេកទេសខ្ពស់។
សម្រាប់យុវសិស្ស អៀង ហ៊ុយឃាងការចេញទៅចូលរួមប្រឡងលើកនេះទទួលបាននូវបទពិសោធន៍ជាច្រើពីសិស្សពីបណ្តាប្រទេសផ្សេងៗទៀតទាំងវិសាស្ត្រា ការអនុវត្តនិងការធ្វើការជាក្រុមជាដើម។
ប្អូនបានបញ្ជាក់ថា ប្អូនបានធ្វើការជាក្រុមជាមួយសិស្ស៥នាក់ទៀតមកពីតាមបណ្តាប្រទេសផ្សេងៗគ្នាដោយគេឲ្យវិញ្ញាសាដាច់ដោយឡែកពីគ្នា។ សម្រាប់ប្អូនគេបានដាក់វិញ្ញាសាទាក់ទងនឹងដំណោះស្រាយទាក់ទងជំងឺគ្រុនចាញ់ដោយប្អូនបានបង្កើតឧបករណ៍ថ្មីមួយដែលអាចការពារមូសមិនឲ្យចូលជិតបានដោយចំណាយថវិកាតិចហើយអាចកាត់បន្ថយការចំលងជំងឺគ្រុនចាញ់បានទៀតផង។
ប្អូនបានបន្តទៀតថា តាមរយៈឧបករណ៍នេះហើយ ទើបប្អូនទទួលបានមេដាយមាសពីកម្មវិធីការប្រកួតប្រជែងអ្នកវិទ្យាសាស្ត្រវ័យក្មេង អាស៊ានបូក៣ លើកទី៧ នៅទីក្រុងកូឡាឡាំពួរ ប្រទេសម៉ាឡេស៊ីនេះធ្វើឡើងក្រោម ប្រធានបទ "វិទ្យាសាស្ត្រ និងការបង្កើតថ្មីដើម្បីសុខភាព និងសុខុមាលភាពសង្គម"។
លោកអ៊ឹង ង៉ោហុក ប្រធាននាយកដ្ឋានមធ្យមសិក្សាចំណេះទូទៅនៃក្រសួងអប់រំយុវជននិងកីឡាបានមានប្រសាសន៍ថា នេះគឺជាកិត្តិយសមួយដ៏ធំធេងណាស់ដែលសិស្សកម្ពុជាចំនួន៤រូបបាននាំយកមេដាយមាសប្រាក់និងសំរឹទ្ធសរុបចំនួន៩គ្រឿងមកជួនជាតិមាតុភូមិហើយលទ្ធផលនេះធ្វើឲ្យប្រទេសកម្ពុជាអាចស្មើមុខស្មើមាត់ជាមួយបណ្តាប្រទេសនានានៅក្នុងតំបន់អាស៊ានក៏ដូចជានៅលើឆាកអន្តរជាតិ។
លោកបានបន្តថា លទ្ធផលគួរឲ្យមោទនៈនេះដោយសារតែក្រសួងអប់រំបានយកចិត្តទុកដាក់បំប៉នដល់សិស្សពូកែទូទាំងប្រទេសផ្នែករូបវិទ្យារយៈពេល៦ខែដែលបណ្តុះបណ្តាលដោយសាស្ត្រាចារ្យនៅសាកលវិទ្យាល័យភូមិន្ទភ្នំពេញដែលមានសមត្ថភាពនិងបទពិសោធន៍ជាច្រើនមុននឹងបញ្ជូនទៅប្រឡង។
ជាមួយគ្នានេះដែរ លោកបានថ្លែងអំណរគុណចំពោះរាជរដ្ឋាភិបាលក៏ដូចជាក្រសួងសេដ្ឋកិច្ចនិងហិរញ្ញវត្ថុដែលបានជួយគាំទ្រនិងផ្តល់ថវិកាសម្រាប់បំប៉នដល់សិស្សយើងធ្វើឲ្យសិស្សមានសមត្ថភាពពេញលេញទើបសិស្សទទួលបានមេដាយជាបន្តបន្ទាប់។
លោកអ៊ឹង ង៉ោហុក បានណែនាំដល់សិស្សខិតខំសិក្សារៀនសូត្រនិងពង្រឹងសមត្ថភាពបន្ថែមទៀតដើម្បីដណ្តើមយកមេដាយឲ្យបានកាន់តែច្រើនជួនជាតិមាតុភូមិនៅពេលទៅចូលរួមប្រឡងថ្នាក់អន្តរជាតិនៅលើកក្រោយៗទៀត៕
Source: Kampuchea Thmey Daily
0 Comments