ភ្នំពេញ ៖ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានធ្វើការចោទប្រកាន់លើគណៈកម្មាធិការជាតិរៀបចំការបោះឆ្នោត (គ.ជ.ប) ថា បានលួចបំប៉ោងសំឡេងឆ្នោត ក្នុងទម្រង់១១០៩ ឱ្យគណបក្សប្រជាជនកម្ពុជា ដែលការចោទនេះ ត្រូវបានបង្ហោះនៅលើគណនី Facebook របស់លោក ខឹម វាសនា កាលពីថ្ងៃទី០៣ ខែសីហា ឆ្នាំ២០១៨ ប៉ុន្តែការចោទនេះត្រូវបានច្រានចោល ដោយអះអាងថា ជាការចោទប្រកាន់ដោយខុសទំនង និងមិនសមហេតុផល។
តាមសេចក្តីបំភ្លឺ ដែលចេញដោយ គ.ជ.ប ចុះថ្ងៃទី០៤ ខែសីហា ឆ្នាំ២០១៨ បានលើកឡើងថា ទម្រង់១១០៩ គឺជាតារាងលទ្ធផលនៃការបោះឆ្នោតក្នុងឃុំ សង្កាត់ ដែល គណៈកម្មការឃុំ សង្កាត់រៀបចំការបោះឆ្នោត ត្រូវស្រង់តួលេខបញ្ចូលក្នុងទម្រង់នេះ ពីទម្រង់១១០២ នៃការិយាល័យទាំងអស់នៅក្នុងឃុំ សង្កាត់នោះ។ ក្នុងដំណើរការរៀបចំលទ្ធផលបោះឆ្នោតបណ្តោះអាសន្ន ទម្រង់១១០៩ គឺជាឯកសារមួយ ក្នុងចំណោមឯកសារសំខាន់ៗដទៃទៀត ដែលប្រើប្រាស់ដើម្បីរៀបចំលទ្ធផលនេះ។
តាមគ.ជ.ប យន្តការត្រួតពិនិត្យលទ្ធផលបណ្តោះអាសន្ន ធ្វើឡើងជាពីរថ្នាក់ គឺទី១- ការត្រួតពិនិត្យ និងបូកសរុបលទ្ធផលបណ្តោះអាសន្ន នៅគណៈកម្មការរាជធានីខេត្ត រៀចំការបោះឆ្នោត (គធ.ខប) ទី២- ការត្រួតពិនិត្យ ផ្ទៀងផ្ទាត់លទ្ធផលបណ្តោះអាសន្ននៅគណៈកម្មាធិការជាតិរៀបចំការ បោះឆ្នោត (គ.ជ.ប) ។
ក្នុងន័យនេះហើយ កាលពីថ្ងទី០៣ ខែសីហា ឆ្នាំ២០១៨ គណៈកម្មការរៀបចំការបោះឆ្នោត ខេត្តសៀមរាប បានត្រួតពិនិត្យ និងបូកសរុបលទ្ធផលបោះឆ្នោតបណ្តោះអាសន្ន និងបានរកឃើញ កំហុសឆ្គងក្នុងការស្រង់តួលេខបញ្ចូលទៅក្នុង ទ.១១០៩ របស់គណៈកម្មការរៀបចំការបោះឆ្នោត (គ.ឃ.ប) ឃុំ ដានរុន ហើយក៏បានចាត់ចែងឲ្យ គ.ឃ.ប ពាក់ព័ន្ធធ្វើការកែតម្រូវជាបន្ទាន់ នៅចំពោះ មុខភ្នាក់ងារគណបក្សនយោបាយ និងអ្នកសង្កេតការណ៍បោះឆ្នោត។
ប៉ុន្តែក្នុងដំណើរការកែតម្រូវកំហុសឆ្គង ភ្នាក់ងារគណបក្សសម្ព័ន្ធដើម្បីប្រជាធិបតេយ្យ ឈ្មោះ អ៊ន ស្រីម៉ិច បានថត និងបញ្ជូនទម្រង់១១០៩ ដែលមានតួលេខខុសទៅមេដឹកនាំរបស់ខ្លួន បន្ទាប់មកលោក ខឹម វាសនា បានយកទម្រង់នេះជាកម្មវត្ថុនៃការចោទប្រកាន់មកលើ គ.ជ.ប ក្នុងគោលបំណងធ្វើឲ្យមានការភាន់ច្រឡំ នាំឲ្យបាត់ទំនុកចិត្តលើការបោះឆ្នោត។
ថ្ងៃនេះទី០៤ ខែសីហា ឆ្នាំ២០១៨ នៅទីស្តីការ គ.ជ.ប បាន និងកំពុងត្រួតពិនិត្យ ផ្ទៀងផ្ទាត់ លទ្ធផលបោះឆ្នោតបណ្តោះអាសន្នពី ២៥ រាជធានី ខេត្ត នៅចំពោះមុខគណបក្សនយោបាយ អ្នកសង្កេតការណ៍ និងអ្នកសារព័ត៌មាន ហើយលទ្ធផលបណ្តោះអាសន្ននេះនឹងប្រកាសជាផ្លូវការ ដោយ គ.ជ.ប នៅថ្ងៃទី១១ ខែសីហា ឆ្នាំ២០១៨។
គ.ជ.ប គូសបញ្ជាក់ថា តួលេខដែលត្រូវបានប្រកាសលទ្ធផលបឋមនៃការបោះឆ្នោតជ្រើសតាំងតំណាងរាស្ត្រ នីតិកាលទី៦ នៅថ្ងៃទី២៩ និងថ្ងៃទី៣០ ខែកក្កដា ឆ្នាំ២០១៨ កន្លងមក នេះ ផ្អែកជាសំខាន់ និងតែមួយគត់លើកំណត់ហេតុនៃការរាប់សន្លឹកឆ្នោត គឺទម្រង់១១០២៕
Source: Kampuchea Thmey Daily
0 Comments