លាភ រដ្ឋា និង កំពែង ខ្មៅ ឆ្លង​ផុត​ដំណាក់កាល​ទី​២

ការប្រកួត​ជម្រុះ​ប្រដាល់​ដណ្តើម​ពាន​រង្វាន់​ជើងឯក​TV5 Knock Out Series by K.Cement ទម្ងន់​៦០​គីឡូក្រាម លើ​សង្វៀន TV5 ព្រែកកំពឹស កាលពី​យប់​ថ្ងៃទី​១១​ ខែ​សីហា លាភ រដ្ឋា អ្នក​ប្រដាល់​ក្លិប​ដី​ឡូ​តិ៍​មាន​រិ​ទ្ធ​ខេត្តបន្ទាយមានជ័យ និង កំពែង ខ្មៅ អ្នក​ប្រដាល់​សមាគម​កីឡាប្រដាល់​ក្រសួងកសិកម្ម បាន​ឆ្លង​ផុត​ដំណាក់កាល​ទី​២ ហើយ។

លាភ រដ្ឋា គេ​បាន​យកឈ្នះ​ម៉ន ព្រហ្ម​ម៉ាញ អ្នក​ប្រដាល់​ក្លិប​ការិយាល័យ​ទី​៥ កងទ័ពជើងគោក​ដោយ​ពិន្ទុ ក្នុងការ​ប្រកួត​ដែលមាន​តែ​បី​ទឹក​នោះ ។​រដ្ឋា ឈ្នះ​ម៉ន ព្រហ្ម​ម៉ាញ ក្នុង លក្ខ​ណះ​ប្រផុតប្រផើយ​តែប៉ុណ្ណោះ ដោយ​ឈ្នះ​ក្នុង​លទ្ធផល​៣​ទល់​២ គឺ​ក្នុងចំណោម​ចៅក្រម​៥​រូប មាន​៣​រូប​បានផ្តល់​ពិន្ទុ​ឲ្យ​គេ​ឈ្នះ ហើយ​២​រូប​អោយគេ​ចាញ់​។​

ម៉ន ព្រហ្ម​ម៉ាញ ត្រូវ​កណ្តាប់ដៃ​របស់រ​បស់​លាភ រដ្ឋា​មិន​តិចដៃ​ទេ​ក្នុង​ការប្រកួត​៣​ទឹក​នោះ ។ ប្រកួត​បី​ទឹក ម៉ន ព្រហ្ម​ម៉ាញ រត់​តែ​ពេញ​រេញ​នោះ ដោយសារ​ខ្លាច​កណ្តាប់ដៃ​លាភ រដ្ឋា ដែល​សម្រុក​វាយ​មិន​បណ្តា​ក់ដៃ​នោះ។​

គួរ​បញ្ជាក់ថា ការប្រកួត​ជម្រុះ​ក្នុង​ដំណាក់​ទី​២​នេះ ក៏​ប្រកួត​បី​ទឹក​ដូច​ក្នុងដំណាក់កាល​ទី​១​ដែរ ។ ដូច្នេះ ម៉ន ព្រហ្ម​ម៉ាញ គេ​ត្រូវ​ជ្រុះ​ធ្លាក់​ចេញពី​ការប្រកួត​ដណ្តើមពាន​រង្វាន់​ជើងឯក​TV5 Knock Out Series by K.Cement ទម្ងន់​៦០​គីឡូក្រាម​ត្រឹមនេះ ។ ឯ លាភ រដ្ឋា​គេ​នឹងត្រូវ​នៅ​បន្ត​ការប្រកួត​ក្នុងដំណាក់កាល​ទី​៣​ទៀត។​

ចំណែក កំពែង ខ្មៅ គេ​បានឈ្នះ​លើ​ដៃគូ​ដោយ​ស្វ័យប្រវត្តិ ដោយសារតែ​សេក ចៅ​ជូត ក្លិប​អង្គរ​មានជ័យ​ខេត្តសៀមរាប ដែលជា​ដៃគូ​របស់គេ​មាន​ជម្ងឺ​មិន​អាចមក​ធ្វើការ​ប្រកួត​បាន ម្ល៉ោះហើយ​ចៅ​ជូត​ត្រូវ​ចាញ់​ដោយ​ស្វ័យប្រវត្តិ។​

ដូច្នេះ កំពែង ខ្មៅ គេ​ត្រូវ​នៅ​បន្ត​ការប្រកួត​ក្នុងដំណាក់កាល​ទី​៣​ទៀត ឯ សេក ចៅ​ជូត​ត្រូវ​ជ្រុះ​ធ្លាក់​ត្រឹមនេះ ។​កំពែង ខ្មៅ បើ​សេក ចៅ​ជូត មិន​ឈឺ​មក​ប្រកួត​វិញ​នោះ គឺ​ពិបាក ហើយ​ព្រោះ​ចៅ​ជូត គេ​ល្អ​និង​ខ្លាំង ។​

គួរ​បញ្ជាក់ថា នៅក្នុង​ការប្រកួត​ដំណាក់កាល​ទី​២​នេះ ក៏​ជាការ​ប្រកួត​ចាញ់​ធ្លាក់​ដែរ ។ អ្នក​ប្រដាល់​ទាំង​១៦​នាក់ ដែល​ចំ​រ៉ា​ញ់​បាន​ក្នុងដំណាក់កាល​ទី​១​នោះ នឹងត្រូវ​ជួប​ប្រកួត​គ្នា​ជម្រុះ​ចោល​៨​នាក់ ទុក​៨​នាក់ ដែលជា​អ្នកឈ្នះ​សម្រាប់​បន្ត​ការប្រកួត​ក្នុងដំណាក់កាល​ទី​៣ ដែលជា​ការប្រកួត​វគ្គ​ពាក់កណ្តាល​ផ្តាច់ព្រ័ត្រ និង ផ្តាច់ព្រ័ត្រ ដើម្បី​ដណ្តើម​ពានរង្វាន់​ជើងឯក ។​

កំពែង ខ្មៅ ថ្វីត្បិតតែ​បានឈ្នះ​ក្នុងការ​ប្រកួត​ជម្រុះ​ពានរង្វាន់​នេះ​ក្តី ប៉ុន្តែ​ត្រូវគេ​តម្រូវអោយ​ប្រកួត​មិត្តភាព​ជាមួយ​សេក គឹម​សាន្ត អ្នក​ប្រដាល់​ក្លិប​អង្គរ​មានជ័យ​ខេត្តសៀមរាប ដែល​ក្រោយ​បញ្ចប់​ការប្រកួត​៥​ទឹក​នោះ លទ្ធផល​បាន​ត្រឹម​ស្មើគ្នា​ប៉ុណ្ណោះ ។​

ដោយឡែក ពេជ្រ ម្ទេសខ្មាំង អ្នក​ប្រដាល់​ក្លិប​អា​រុណ​រះ​កីឡា ដែល​គេ​ផ្គូ​អោយ​ជួប​ប្រកួត​ជាមួយ​បរទេស​នោះ គេ​បាន​ផ្តួល​អ្នក​ប្រដាល់​ថៃ​ឃុន ស៊ី​លី​ក ក្នុង​ទឹក​ទី​២ ដោយ​ទាត់​ស៊ី​លី​ក អោយ​ឈឺ​ជើង​ខាងស្តាំ ហើយ​ក្រោយ​អាជ្ញាកណ្តាល​រាប់​៨​នោះ ម្ទេសខ្មាំង​ក៏​សម្រុក​ដាល់​ប្រដាល់​ថៃ​នោះ​ទាល់តែ​សន្លប់​លែង​ក្រោក​តែម្តង ។​ឃុន ស៊ី​លី​ក ត្រូវ​ម្ទេសខ្មាំង​ដាល់​ចំ​គល់​ថ្គាម​មួយ​ដៃ​យ៉ាងដំណំ ធ្វើអោយ​អ្នក​ប្រដាល់​ថៃ​រូបនោះ ដួល​ដេក​លើ​រេញ ទោះបី​អាជ្ញាកណ្តាល​រាប់​ដល់​ដប់​ហើយ​ក្តី ក៏​គេ​ក្រោក​មិន​រួច​ដែរ ។

ឯ ភិន សុទី អ្នក​ប្រដាល់​ក្លិប​ទីបញ្ជាការដ្ឋាន​កងទ័ព​ជើង​ទឹក បាន​វាយ​ចាញ់​ម៉ន ចៅ​ក្របី អ្នក​ប្រដាល់​ក្លិប​ការិយាល័យ​ទី​៥ កងទ័ពជើងគោក ក្នុង​ទឹក​ទី​៣ ។ ភិន សុទី ត្រូវ​ចៅ​ក្របី វាយ​អោយ​អាជ្ញាកណ្តាល​រាប់​៨​ក្នុង​ទឹក​ទី​២​ចំនួន​២​ដង ហើយ​មកដល់​ទឹក​ទី​៣ ក៏ត្រូវ​ចៅ​ក្របី​វាយ​កែង​ត្រូវ​ដួល​ទៀត​ដែរ ដែល​ដួល​ម្តងទៀត​នេះ ភិន សុទី​ត្រូវ​អាជ្ញាកណ្តាល​បញ្ឈប់​លែងអោយ​ប្រកួត​តែម្តង៕ ​



Source: Kampuchea Thmey Daily